08 ސެޕްޓެމްބަރ 2018 - 12:43
މި މަހުގެ 23 ގައި އޮންނަ ރިޔާސީ އިންތިހާބުގައި ބޭނުން ކުރާ ވޯޓު ކަރުދާސްކޮޅުގެ ޑިޒައިން ނިންމައި ކުރިއަށް އޮތް ހަފްތާގައި ޕްރިންޓް ކުރަން ބަޔަކާ ހަވާލު ކުރުމުގެ މަސައްކަތް ކުރަމުން އަންނަ ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް މިއަދު ވިދާޅުވެއްޖެ އެވެ.
ރިޔާސީ އިންތިހާބާ ބެހޭ ގޮތުން ބޭއްވި ނޫސްވެރިންގެ ބައްދަލުވުމެއްގައި ޝަރީފް ވިދާޅުވީ ރިޔާސީ އިންތިހާބަށް ވާން ޖެހޭ ތައްޔާރީތައް ނިމުމަކާ ހަމައަށް އައިސްފައިވާ ކަމަށެވެ.
އޭނާ ވިދާޅުވި ގޮތުގައި މިފަހަރުގެ ވޯޓު ކަރުދާހުގައި ވަރުގަދަ ސެކިއުރިޓީ ފީޗާޒްތަކެއް ހިމެނިފައިވާނެ އެވެ. އަދި އޭގެ ސައްހަކަން ކަށަވަރުކޮށްފައި ނޫނީ އެއްވެސް ވޯޓު ކަރުދާހެއް ނުގުނާނެ ކަމަށް ވެސް ވިދާޅުވި އެވެ.
ޝަރީފު ވިދާޅުވި ގޮތުގައި، ސައްހަކަން ކަށަވަރުކުރަން އެއްވެސް ކަހަލަ ވަސީލަތެއް އީސީން ބޭނުން ކުރަން ޖެހިއްޖެ ނަމަ، އެކަން ކުރަން ވެސް ކޮމިޝަން އޮތީ ތައްޔާރަށެވެ.
"ކޮންމެ ވޯޓު ކަރުދާހެއްގެ ސައްހަކަން ކަށަވަރުކޮށްފައި ގުނާނީ،" ޝަރީފް ވިދާޅުވި އެވެ.
އޭނާ ވިދާޅުވީ 2013 ގައި ބޭއްވި ރިޔާސީ އިންތިހާބުގައި ސައްހަ ނޫން ކަރުދާސްތަކެއް ހުރި ކަމުގެ ރިޕޯޓުކުރި ކަމަށެވެ. އެހެންކަމުން އެފަދަ ކަމެއް ދިމާވެއްޖެ ނަމަ އެކަން ސައްހަކޮށްފައި ނޫނީ ކައުންޓު ނުކުރާނެ ކަމަށް ވިދާޅުވި އެވެ.
ވޯޓު ކަރުދާސްކޮޅު އޮޅުވާލުމުގެ ގޮތުން އެއްވެސް ކަމެއް ނުކުރާނެ ކަމުގެ ކިހާ ޔަގީންކަމެއް އޮތްތޯ އާއި ކަރުދާސްކޮޅު ޕްރިންޓު ކުރާއިރު، ކެންޑިޑޭޓުންގެ މަންދޫބުންނަށް ފުރުސަތު ދޭނެތޯ ނޫސްވެރިއަކު ކުރި ސުވާލަށް ޝަރީފް ސީދާ ޖަވާބެއް ނުދެއްވަ އެވެ. އޭނާ ހަމައެކަނި ވިދާޅުވީ ވޯޓު ކަރުދާސް ޑިޒައިންކޮށް، ޕްރިންޓު ކުރުމުގެ މަސައްކަތް ކުރާނީ ގާނޫނުގައިވާ ގޮތުގެ މަތިން ކަމަށެވެ.
"ވޯޓު ކަރުދާސް ޕްރިންޓު ކުރުމާ ގުޅޭ ގޮތުން އެއްވެސް ރިޔާސީ ކެންޑިޑޭޓެއްގެ ފަރާތުން ސުވާލެއް އައިސްފައި ނެތް. އެއްވެސް ސުވާލެއް އަތުވެއްޖެ ނަމަ، އެ ފުރުސަތު ދިނުމާ ބެހޭ ގޮތުން ގާނޫނުގައި ބުނާ ގޮތަކަށް އަމަލު ކުރާނީ. ގާނޫނުގައި އެ ކެންޑިޑޭޓަކަށް ދިނުން ލާޒިމް ކުރާ ނަމަ، އެ ފުރުސަތު ދޭނަން. ގާނޫނުގައި ލާޒިމް ނުކުރާ ކަމަކަށް ފުރުސަތެއް ނުދެވޭނެ،" ޝަރީފް ވިދާޅުވި އެވެ.