08 ސެޕްޓެމްބަރ 2018 - 10:53
އީސްޓް ރުތެފޯޑް (ސެޕްޓްބަރު 8) – ބްރެޒިލްގެ ގައުމީ ޓީމުގެ ދާއިމީ އާ ކެޕްޓަން ނޭމާ ޖެހި ގޯލާ އެކު އެކުވެރިކަމުގެ މެޗެއްގައި އެމެރިކާ އަތުން 2-0 އިން ބްރެޒިލް މޮޅުވެއްޖެ އެވެ.
އެމެރިކާގައި ކުޅުނު މި މެޗަށް ބްރެޒިލް ކޯޗު ޓީޓޭ ނެރުނީ ވަރަށް ވަރުގަދަ ޓީމެކެވެ. ގޯލްކީޕަރު އެލިސަން އާއި ތިއާގޯ ސިލްވާ އާއި ޑަގްލަސް ކޮސްޓާ އާއި ފިލިއްޕެ ކުޓީނިއޯ އަދި ކަސެމިރޯ އާއި ފަބީނިއޯގެ އިތުރުން ރޮބާޓޯ ފިރްމީނިއޯ ވެސް ކުޅުނެވެ.
މި މެޗުގެ 11 ވަނަ މިނެޓުގައި ބްރެޒިލަށް ލީޑު ނަގައިދިނީ ލިވަޕޫލުގެ ފޯވާޑް ފިރްމީނިއޯ އެވެ. މިއީ ޑަގްލަސް ކޮސްޓާ ތަނަވަސްކޮށްދިން ފުރުސަތެއްގައި އޭނާ ޖެހި ގޯލެކެވެ. ދެ ވަނަ ގޯލް ނޭމާ ޖެހީ 43 ވަނަ މިނެޓުގައި ލިބުނު ޕެނަލްޓީއަކުންނެވެ.
މެޗުގެ ދެ ވަނަ ހާފުގައި އެމެރިކާ އިން ވަނީ ލައިބީރިއާގެ ރައީސް އަދި އެ ގައުމުގެ ކުރީގެ ފޯވާޑް ޖޯޖް ވެއާގެ ދަރިފުޅު ޓިމޮތީ ވެއާ އަރުވައިފަ އެވެ. ޕީއެސްޖީ އަށް ކުޅޭ ތިމޮތީ އުފަންވެ އަދި އުޅެބޮޑުވީ ވެސް އެމެރިކާގަ އެވެ.
ރޭ ކުޅުނު އަނެއް މެޗުގައި އާޖެންޓީނާ އިން ވަނީ ގުއަޓަމާލާ އަތުން 3-0 އިން މޮޅުވެފަ އެވެ. އަމިއްލަ ދަނޑުގައި ކުޅުނު މެޗުގައި އާޖެންޓީނާ އަށް ގޯލް ޖަހައިދިނީ ޒޮންގާލޯ މާޓިނޭޒާއި ޖިއޮވާނީ ލޮ ސެލްސޯ އަދި ޖިއޮވާނީ ސިމިއޯނީ އެވެ.
މިއީ އާޖެންޓީނާގެ ކުރީގެ މިޑްފީލްޑަރު އަދި އެތުލެޓިކޯ މެޑްރިޑުގެ ކޯޗު ޑިއެގޯ ސިމިއޯނީގެ ދަރިފުޅު ޖިއޮވާނީ އާޖެންޓީނާ ގައުމީ ޓީމަށް ކުޅެދިން ފުރަތަމަ މެޗެވެ. ފިއޮރެންޓީނާ އަށް ކުޅެމުން އަންނަ ޖިއޮވާނީ އަކީ އާޖެންޓީނާގައި މިވަގުތު ހުރި އެންމެ އުއްމީދީ އެއް ފޯވާޑެވެ.
މި މެޗުގެ ސްކޮޑުގައި އާޖެންޓީނާގެ މުހިއްމު ކުޅުންތެރިން ކަމަށްވާ ކެޕްޓަން ލިއޮނަލް މެސީ އާއި ގޮންޒާލޯ ހިގައިން އާއި އެންހެލް ޑި މަރިއާ އަދި ސާޖިއޯ އަގުއޭރޯ ނުހިމެނެ އެވެ.