25 މެއި 2016 - 20:46
އަތުކުރިއަށް އޮޅާލެވޭ ގޮތަށް ސްމާޓްފޯނެއް އުފައްދާފައިވާ ކަމަށާއި އެ ފޯނު ވަރަށް އަވަހަށް ދައްކާލާނެ ކަމަށް ޗައިނާ ކުންފުންޏަކުން ބުނެފި އެވެ.
"މޮޒީ ގްރޫޕް" އިން ބުނީ އޮޅާލެވޭ ގޮތަށް ހަދާފައިވާ ޓަޗްސްކްރީން ހިމެނޭ ފޯނަކީ އަތުކުރީގައި އުޅައެއް ގޮތަށް އަޅައިގެން ވެސް އުޅެވިދާނެ އެއްޗެއް ކަމަށާއި އެގޮތަށް ބާއްވައިގެން ފޯނު ބޭނުންކުރެވޭނެ ކަމަށެވެ. ބޭނުން ނަމަ ހަމަ އާދައިގެ ފޯނެއް ގޮތަށް ވެސް ބޭނުންކުރެވެ އެވެ.
އެ ކުންފުނިން ބުނީ މި ފޯނުގެ ސްކްރީން އުފެއްދުމަށް ބޭނުންކޮށްފައި ވަނީ މިހާތަނަށް ހޯދިފައިވާ އެންމެ ތުނި މެޓީރިއަލް ކަމަށްވާ "ގްރާފީން" ކަމަށެވެ. މިއީ ތުންޏަސް ވަރަށް ވަރުގަދަ، ޓްރާންސްޕޭރެންޓް އަދި ލަންބައިގެން ގެންގުޅެވޭ މާއްދާއެކެވެ.
އޮޅާލައިގެން ގެންގުޅެވޭ ފޯނުގެ ޕްރޮޓޮޓައިޕެއް އުފައްދާފައިވާ ކަމަށާއި މިހާރު މަސައްކަތްކުރަމުން ދަނީ މި އަހަރު ފަހުކޮޅު ޗައިނާގެ ބާޒާރަށް މީގެ 100،000 ފޯނު ނެރެން ކަމަށް މޮޒީ ގްރޫޕުން ބުންޏެވެ.
އެކި ބައްޓަންތަނަކަށް ސްމާޓްފޯން ސްކްރީން މީގެ ކުރިން ހަދާފައި ވިޔަސް މިގޮތަށް އޮޅާއިގެން ގެންގުޅެވޭ ފަދަ ފޯނެއް އުފައްދައިފައެއް ނުވެ އެވެ. ނަމަވެސް އޮޅާލެވޭ ފޯނު ފުރަތަމަ އުފައްދަނީ "ބްލެކް އެންޑް ވައިޓް" ސްކްރީނާ އެކުގަ އެވެ. ފޯނު އީޖާދުކުރި ކުންފުނިން ބުނެފައި ވަނީ މިގޮތަށް ކުލަ ސްކްރީނެއް ހެދުމަކީ ވަރަށް ބޮޑު ގޮންޖެހުމެއް ކަމަށާއި އެކަން ކާމިޔާބުކުރެވޭނީ 2018 ހިސާބުގައި ކަމަށެވެ.