05 ސެޕްޓެމްބަރ 2018 - 12:31
އިސްލާމްއާބާދު (ސެޕްޓެމްބަރު 5) - ޕާކިސްތާނުގެ ރައީސްކަމުގެ މަގާމަށް ދަތުގެ ޑޮކްޓަރެއްގެ ގޮތުގައި މަސައްކަތް ކުރެއްވި އަދި ބޮޑު ވަޒީރު އިމްރާން ޚާންގެ އަރިސް ބޭފުޅެއް ކަމަށްވާ ޑރ. އާރިފް އަލްވީ އިންތިޚާބުކޮށްފި އެވެ.
ޖުލައި މަހު ބޭއްވި އިންތިޚާބު ކާމިޔާބު ކުރި ޕާކިސްތާން ތަހްރީކީ އިންސާފް (ޕީޓީއައި) އަށް ނިސްބަތްވާ ބޭފުޅަކަށް ރައީސްކަން ލިބުމަކީ، ތަޖްރިބާކާރުން ބުނާ ގޮތުގައި، ބޮޑު ވަޒީރު އިމްރާން ޚާންގެ ބާރު އިތުރަށް ވަރުގަދަވާނެ ކަމެއް ކަމަށެވެ.
ރައީސް ކަމަށް ޑރ. އާރިފް އަލްވީ އިންތިޚާބުކޮށްފައި ވަނީ ޕާކިސްތާނުގެ ގާނޫނު ހަދާ މަޖިލިސްތަކުގެ ހާހަކަށް ވުރެ ގިނަ މެންބަރުންގެ ވޯޓުންނެވެ. ރައީސް ހޮވުމަށް ވަނީ ޕާލަމެންޓުގެ ދެ ގޭގެ އިތުރުން ހަތަރު ޕްރޮވިންސްގެ އެސެމްބްލީތަކުގައި ވެސް ވޯޓުލައިފަ އެވެ.
ވޯޓުލުން ނިމުނުތާ ގަޑިއެއްހާ އިރު ތެރޭ ޕާކިސްތާނުގެ ރަސްމީ ޓީވީން ވަނީ އަލްވީ ކާމިޔާބުކޮށްފި ކަމަށް ބުނެފަ އެވެ. އިލެކްޝަންސް ކޮމިޝަންސްގެ ތަރުޖަމާން އަލްތާފް އަހުމަދު ވިދާޅުވީ އަލްވީ އަށް 353 ވޯޓު ލިބިވަޑައިގެންނެވި ކަމަށެވެ. އޭނާއާ ދެކޮޅަށް ވާދަކުރެއްވި ޖާމިއަތުލް އުލަމާ އިސްލާމް ޕާޓީގެ މައުލާނާ ފަޒުލުއްރަހުމާން އަށް ލިބިވަޑައިގެންނެވީ 185 ވޯޓެވެ. ފަޒުލުއްރަހުމާން ރައީސްކަމަށް ގެނައުމަށް ޕާކިސްތާން މުސްލިމް ލީގު-ނަވާޒް (ޕީއެމްއެލް-އެން) އިން ތާއީދު ކުރި އެވެ. އަދި ޕާކިސްތާން ޕީޕަލްސް ޕާޓީ (ޕީޕީޕީ) ގެ ކެންޑިޑޭޓް އައިތާޒް އަހުސަން އަށް ލިބިވަޑައިގެންނެވީ 124 ވޯޓެވެ.
ނަތީޖާ އަށް ފަހު އަލްވީ ވިދާޅުވީ އޭނާ ވާނީ ޕާކިސްތާނުގެ ހުރިހާ ރައްޔިތުންގެ ރައީސަކަށް ކަމަށެވެ.
އެމެރިކާގެ މިޝިގަން ޔުނިވާސިޓީ އާއި ސެން ފްރެންސިސްކޯގެ ޔުނިވާސިޓީ އޮފް ޕެސިފިކުން ތައުލީމް ހާސިލް ކުރައްވާފައިވާ އަލްވީ ސިޔާސީ ދާއިރާ އަށް ވެންނެވުމުގެ ކުރިން ވަނީ ދަތުގެ ޑޮކްޓަރެއްގެ ގޮތުގައި މަސައްކަތް ކުރައްވައިފަ އެވެ. އޭނާ ވަނީ ޕީޓީއައިގެ ސެކްރެޓަރީ ޖެނެރަލްކަން 2006 ވަނަ އަހަރުން ފެށިގެން އަށް އަހަރު ވަންދެން ކުރައްވައިފަ އެވެ. އަދި 2013 ވަނަ އަހަރު ވަނީ ދެކުނުގެ ކަރާޗީން ޕާލަމެންޓުގެ ގޮނޑިއަކަށް ހޮވިވަޑައިގެންފަ އެވެ. އަދި ޖުލައި މަހުގެ އިންތިޚާބުގައި ވެސް ގޮނޑި ކާމިޔާބު ކުރައްވައިފަ އެވެ.
އަލްވީ ވިދާޅުވީ އޭނާގެ ބައްޕަ ހަބީބުއްރަހުމާން އަލްވީ އަކީ އިންޑިއާގެ ފުރަތަމަ ބޮޑު ވަޒީރު ޖަވާހަރްލާލް ނެހްރޫގެ ދަތުގެ ޑޮކްޓަރު ކަމަށެވެ. އަލްވީގެ އާއިލާ އަކީ އިންޑިއާ އިން ޕާކިސްތާނަށް ހިޖުރަކުރި ބައެކެވެ.