06 އޯގަސްޓް 2016 - 15:54
މާޒިޔާ ސްޕޯޓްސް އެންޑް ރިކްރިއޭޝަނުން ރާއްޖޭގެ ހަތަރު ރަށެއްގައި އެކަޑަމީ ގާއިމްކުރަން ނިންމައި، އެ ރަށްރަށުގެ ފަރާތްތަކާ އެކު މިއަދު އެއްބަސްވުމުގައި ސޮއިކޮށްފި އެވެ.
މިއަދު މެންދުރު ފަހު އެފްއޭއެމް ހައުސްގައި އޮތް ރަސްމިއްޔާތެއްގައި އެކަޑަމީގެ މަސައްކަތް ފަށަން މާޒިޔާ އިން ސޮއިކުރީ ހދ. ނޮޅިވަރަމް، ރ. ދުވާފަރު، ނ. ހޮޅުދޫ އަދި ބ.ތުޅާދޫގެ ފަރާތްތަކާ އެކު އެވެ. މާޒިޔާ އިން ބުނީ އެކަޑަމީގެ މަސައްކަތް ފަށަން ހުރިހާ ކަމެއް ނިމިފައިވާ ކަމަށާއި ކުރިއަށް އޮތް ދެ ހަފްތާއެއްގެ ތެރޭގައި ފަށާނެ ކަމަށެެވެ.
މީގެ އިތުރުން މާޒިޔާ އިން ވަނީ އެ ކްލަބުގެ އެކަޑަމީ ކުރިއަށް އޮތް ދެ އަހަރަށް ސްޕޮންސާކުރާ އެލް މޮބައިލްއާ އެކު އެއްބަސްވުމުގައި ސޮއިކޮށްފަ އެވެ. މާޒިޔާގެ ފަރާތުން އެއްބަސްވުމުގައި ސޮއިކުރީ އެ ކްލަބްގެ ޗެއާމަން އަހުމަދު ސާޖިދެވެ. އެލް މޮބައިލްގެ ފަރާތުން ސޮއިކުރެއްވީ މެނޭޖިން ޑިރެކްޓަރު މުހައްމަދު ޝަރަތެވެ.
"އަޅުގަނޑުމެންނާ މާޒިޔާއާ އަބަދުވެސް ހާއްސަ ގުޅުމެއް އޮވޭ. މާޒިޔާގެ ފަރާތުން އަޅުގަނޑުމެން ބޭނުންވާ ކަންކަން ވަރަށް ފުރިހަމަ އަށް ކޮށްދޭ. ފުޓްބޯޅައިން އެލް މޮބައިލް އަބަދުވެސް އެހީތެރިވާނީ މާޒިޔާ އަށް،" ކުރީގެ މަޝްހޫރު ބެޑްމިންޓަން ކުޅުންތެރިޔާ ޝަރަތު ވިދާޅުވި އެވެ.
މިއަދުގެ ރަސްމިއްޔާތުގައި ވާހަކަ ދައްކަވަމުން މާޒިޔާގެ ޖެނެރަލް ސެެކްރެޓަރީ އަބްދުލް ވައްހާބު ވިދާޅުވީ އެ ކްލަބުން މި ހަތަރު ރަށުގައި އެކަޑަމީގެ މަސައްކަތް ފަށަން ނިންމީ ރަށްރަށުގެ ކުދިންނަށް ވެސް އެންމެ ރަނގަޅު ފެންވަރުގައި ފުޓްބޯޅައިން ކުރިއަށް ދިއުމަށް ފުރުސަތު ދިނުމުގެ ގޮތުން ކަމަށެވެ.
"މި ރަށްތަކުގެ ހުރިހާ ކުދިންނަށް ވެސް އެކަޑަމީއާ ގުޅުމުގެ ފުރުސަތު އެބައޮތް. އަޅުގަނޑުމެން ފުރަތަމަ މިދެނީ ކޮންމެ ރަށަކަށް ވެސް 50 ކުޅުންތެރިންނަށް ބޭނުންވާ ސާމާނު. މި ރަށްތަކުން ވަރަށް ފުރިހަމަ އަށް ސަޕޯޓް ލިބޭނެ ކަމުގެ ޔަގީންކަން އެބައޮތް،" ވައްހާބު ވިދާޅުވި އެވެ.
އޭނާ ވިދާޅުވީ އެކަޑަމީ މި ފެށި ހަތަރު ރަށަކީ މާޒިޔާއާ އަބަދުވެސް ގާތްގުޅުމެއް ބަހައްޓަމުން އަންނަ ރަށްރަށް ކަމަށެވެ.
"އަޅުގަނޑުމެން މި ރަށްތަކުގައި އެކަޑަމީ ފަށަން ނިންމީ އެ ފަރާތްތަކުން އެކަމަށް އެދިގެން. ފުރަތަމަ މި ހަތަރު ރަށުގައި ފެށި ނަމަވެސް ކުރިއަށްދާ ގޮތަށް ބަލާފައި މި އަހަރު ތެރޭގައި އިތުރު ތިން ރަށެއްގައި އެކަޑަމީ ފެށޭނެ ކަމަށް ބެލެވޭ،" ވައްހާބު ވިދާޅުވި އެވެ.
މި ވަގުތު ރަށްރަށަށް ދެނީ އެކަޑަމީ އަށް ބޭނުންވާ ސާމާނުކަމުގައިވީ ނަމަވެސް މުސްތަގުބަލުގައި ސްޕޮންސަރުން ލިބޭ ވަރަކުން އެ ރަށްތަކުގެ ފުޓްބޯޅައިގެ ޑިވެލޮމެންޓަށް ވެސް މަސައްކަތް ކުރާނެ ކަމަށް މާޒިޔާ އިން ބުނެ އެވެ.
މާޒިޔާ އިން އެކަޑަމީ ހެޑްގެ ގޮތުގައި ހަމަޖައްސާފައިވަނީ އެފްއޭއެމްގެ ޔޫތު ޑިވެލޮޕްމެންޓް ޕްރޮގްރާމުގެ ކޯޗު އިބްރާހިމް ޝާފިއު (ޝާއްކޮ) އެވެ.