02 ސެޕްޓެމްބަރ 2018 - 11:44
މާލެ އާއި ހުޅުލެއާ ދެމެދު އަޅާފައިވާ ބްރިޖު މިދިޔަ ބުރާސްފަތި ދުވަހުގެ ރޭ ހުޅުވުމާއެކު، ޕީޕީއެމްގެ ރިޔާސީ ކެމްޕޭނަށް އައީ ބޮޑު އީދެކެވެ. ރައީސް އަބްދުﷲ ޔާމީން ޕްރޮމޯޓްކުރަން މުޅިން ވެސް ބްރިޖުގެ ފޮޓޯތަކެވެ. އޭގެ ތެރެއިން ވެސް، އެމްޑީޕީގެ އެކްޓިވިސް ނައީމާ މުހައްމަދު (ނައީމާއްތަ) ބްރިޖަށް އެރުން މިވީ ސިޔާސީ ގޮތުން މާ ޚާއްސަ ކަމަށެވެ. ސޯޝަލް މީޑިއާގައި މިހާރު އާއްމުވެފައި ވަނީ، ސަރުކާރުގެ ބައެއް އިސް ވެރިންނާ އެކު ބްރިޖު މަތީގައި، ހިނިތުންވެފައި ނައީމާއްތަ ނަގާފައި ހުރި ފޮޓޯތަކެވެ.
ޕީޕީއެމްގެ ކެމްޕޭންގެ ފޯރި ގަދަކޮށްލަން ނައީމާއްތަގެ ފޮޓޯތައް ބޭނުން ކުރާ އިރު، އިދިކޮޅަށް މި ކަންވީ މާޔޫސްކަން ގެނުވި ކަމަށެވެ. ވާނީ ވެސް އެހެންތާ އެވެ؛ އެމްޑީޕީގެ ވެރިކަން 2012 ގައި ނިމުނު ފަހުން، އެ ޕާޓީގެ އެންމެ ވަރުގަދަ އެކްޓިވިސްޓެއްގެ ގޮތުގައި ދެމިހުރި ނައީމާއްތަ މި ފެނުނީ، އެންވަޔަރްމެންޓް މިނިސްޓަރު ތޯރިގް އިބްރާހީމާއި ފޭދޫ ދާއިރާގެ މެމްބަރު އިބްރާހިމް ދީދީ (އައިބީ)އާ އެކު އަތްގުޅުވާލައިގެން ހުއްޓަ އެވެ.
އެއާއެކު، އެއް ބަޔަކު ކުރި ސުވާލަކީ ނައިމާއްތަ ކޮޅު ބަދަލުކުރީ ހެއްޔެވެ؟ މި ސުވާލުގެ ޖަވާބު ދިނީ ރައްޔިތުންގެ މަޖިލީހުގެ ޕީޕީއެމްގެ ބައެއް މެމްބަރުންނާއި އެ ޕާޓީގެ ބައެއް އެކްޓިވިސްޓުންނެވެ.
ޕީޕީއެމްގެ ބައެއް މެމްބަރުންނާ އެކު ވަރަށް ގާތްކޮށް، ނައިމާއްތަ ހުރި ފޮޓޯ އާއްމުކޮށް، ނިހާން ކުރެއްވި ޓުވީޓެއްގައި ވިދާޅުވީ އެމްޑީޕީގެ ރެލީތަކުގެ އެންމެ އިސްކޮށް ފެންނަ ނައީމާއްތަ ވެސް ރައީސް އަބްދުﷲ ޔާމީންގެ ތަރައްގީ ލޮލުން ދެކި އަތުން ހިފައިފި ކަމަށެވެ.
އެހެން މީހަކު ބުނެފައި ވަނީ، "ނައީމާއްތަ ވެސް ބޮޑުފަޅި ހިޔާރުކޮށްފި" ކަމަށެވެ.
ނިހާނަށް ތާއީދުކޮށް ޓުވީޓްކުރި އެކަކު ލިޔެފައި ވަނީ ރައީސް ޔާމީނަކީ އަސްލު އިކޮނޮމިސްޓެއް ކަން ޔަގީންވެއްޖެ ކަމަށް ނައީމާއްތަ ވެސް ބުނެފައިވާ ކަމަށެވެ. ރައީސް ޔާމީންގެ ތަރައްގީ ނައީމާއްތަ ވެސް ބަލައިގަންނަނީ އުފަލުން ކަމަށް ބުނެ ލިޔެފައިވާ އެތައް ވާހަކަތަކާ އެކު، ސޯޝަލް މީޑިއާގައި އެއް ބަޔަކު އަނެއް ބަޔަކަށް ވުރެ ފޯރިގަދަ އެވެ.
މި ކޯޅުމުގެ ހަގީގަތް، ރާއްޖެ ޓީވީ މެދުވެރިކޮށް ހާމަކޮށްދިނީ ނައީމާއްތަ އެވެ.
ސޯޝަލް މީޑިއާގައި މިހާރު އާއްމުކޮށްފައިވާ ނައީމާއްތަގެ ވީޑިއޯގައި، އޭނާ ބުނީ ބްރިޖަށް ދިޔައީ، "އެއީ، ނައީމާއްތަގެ ވެސް ބްރިޖަށްވާތީ" ކަމަށެވެ.
"ނައީމާއްތަ ވެސް ޓެކްސް ފައިސާ ދައްކައިގެން [ހެދި ބްރިޖަކަށްވާތީ] އެރީ. އެހެންވީމަ އެ ބްރިޖުން އަރައިގެން ދާން ފެށީމާ، އެ މީހުން [ޕީޕީއެމްގެ އިސް ބޭފުޅުންނާއި ސަޕޯޓަރުން] ނައީމާއްތައާ އެކީ ފޮޓޯގަނޑެއް ނަގަން ބޭނުންވީމަ، ނައީމާއްތަ އަށް ނެގޭނެ ފޮޓޯ. ނައީމައްތަ ނުރުހުމެއް ނުދައްކާނަން، ނައީމާއްތަ ޒާތީ ވެގެނެއް ނޫޅޭނަން، ވަކި އެހެނެއް. އަދި ޔާމީނަކާ ވެސް،"
އެކަމަކު އޭނާގެ ފިކުރަކީ އެމްޑީޕީ ކަމަށާއި އެ ފިކުރު ވިއްކާނުލާނެ ކަމަށް ނައީމާއްތަ ބުންޏެވެ. އެމްޑީޕީގެ ވެރިކަން ބަދަލުވި ފަހުން މިހާތަނަށް ބޭއްވި ހުރިހާ މުޒާހަރާތަކެއްގެ އިސް ސަފުގައި ނައީމާއްތަ ހަރަކާތްތެރިވެފައިވެ އެވެ. މި މުޒާހަރާތަކުގެ ތެރެއިން އެތައް ފަހަރަކު ހައްޔަރު ވެސް ކޮށްފައިވެ އެވެ.
އިދިކޮޅު ސަޕޯޓަރުން، ޕީޕީއެމަށް ރައްދު ދެމުން އަންނަނީ، ނައީމާއްތަގެ މި ވީޑީއޯ އިންނެވެ.
ކެމްޕޭންގެ މޫސުމެވެ؛ ނަގާ ފޮޓޯއަކުން ނުވަތަ ބުނާ ބަހަކުން ވެސް ސިޔާސީ ގޮތުން އެއް ބަޔަކު އަނެއް ބަޔަކަށް ފައިދާ ނަގާނެ ކަން ނައީމާއްތަ ބްރިޖުގައި ހުއްޓައި ނެގި ފޮޓޯތަކުން މިއޮތީ ފެންނާށެވެ.