30 އޯގަސްޓް 2018 - 20:38
މުއިއްޒު: މިއީ ވިޔަފާރި އާއި އިގްތިސާދުގެ ބްރިޖް. މިއީ އާއިލީ ގުޅުމުގެ ބްރިޖް.
މުއިއްޒު: މިއީ ރައީސް ޔާމީނާއި ޗައިނާގެ ރައީސާ ދެމެދު އޮތް ގުޅުމުން އުފަންވި ބްރިޖެއް. އެއްވެސް އެހެން ޒަމާނެއްގައި ކުރި މަސައްކަތަކުން އައި ބްރިޖެއް ނޫން.
މިނިސްޓަރު މުއިއްޒު ވާހަކަ ދައްކަވަނީ: އުފާވެރި ވަގުތެއް. މުސްތަގުބަލަށް އޮތް ޖީލަށް އުފާވެރި ވަގުތެއް
ރާއްޖޭގައި މިހާތަނަށް ނުބާއްވާ ފެންވަރަށް ބްރިޖްގައި ހަވާ އެރުވުމުގެ ރަސްމިއްޔާތެއް ކުރިއަށް އެބަދޭ.
ބްރިޖްގައި ލޭޒާގެ ކުޅިވަރުތައް ކުރިއަށް އެބަދޭ.
ރައީސް ޔާމީނާއި ޗައިނާގެ މަންދޫބު ވެންގް ޝިއާޓާއޯ ސިނަމާލެ ބްރިޖް ހުޅުއްވައިދެއްވައިފި. ބްރިޖް ހުޅުއްވައިދެއްވީ ބްރިޖްގެ މައި ދޮރު ދިއްލާލުމާ އެކު
ރައީސް: މިއީ ތަރަައްގީގެ އާ ފެށުމެއް.
ރައީސް ޔާމީން: ހުޅުމާލެ ހިއްކަން ފެށިއިރު އޮތް އެންމެ ބޮޑު ގޮންޖެހުމަކަށް ވީ ހުޅުމާލެ އާއި މާލެއާ ދޭތެރޭގައި ދަތުރު ފަތުރު ކުރުން. މި ދޭތެރޭގައި ބްރިޖެއް އަޅަން ޖެހޭ. އެކަމަކު އެވަރުގެ ތަނަވަސް ކަމެއް ނެތް. އެހެންވެ، އަޅުގަނޑު އެކަން ޗައިނާގެ ރައީސަށް ދެންނެވިތާ ތިން އަހަރާ 11 މަސް ދުވަހުގެ ތެރޭގައި މި ވަނީ ބްރިޖް ހަގީގަތަކަށް ވެފައި.
ރައީސް ޔާމީން: މި ބްރިޖަކީ އަޅުގަނޑުމެންނަށް ވެސް ބޮޑު ގައުމަކާ އެކު ކަންކަން ކުރެވިދާނެ ކަމުގެ މިސާލެއް.
ރައީސް ޔާމީން ވާހަކަފުޅު ދައްކަވަނީ: ދެ ލައްކަ އަށް ވުރެ ބޮޑު އާބާދީ އަކަށް، 1997 ގައި ހުޅުމާލެ ތަރައްގީ ކުރި ހިސާބުން ފެށިގެން ކޮންމެ ދުވަހަކު އެ ރަށަށް ދިވެހިން ކަނޑު ހުރަސްކޮށްފައި ކުރަމުން އައީ ވަރަށް އުނދަގޫ ދަތުރުތަކެއް. އަޅުގަނޑުގެ މަގުސަދަކަށް ވީ އެކަން ފަސޭހަކޮށް އެކަން ބަދަލުކޮށްލަން. އެކަން މި ބްރިޖާ އެކު ނިމިގެން ހިނގައްޖެ.
ވެން ޝިއާޓޯ: ޗައިނާ އިން ރާއްޖޭގެ އިސްތިގުލާލަށް އަބަދުވެސް އިހުތިރާމް ކުރާނެ
ވެން ޝިއާޓޯ: މި ބްރިޖާ އެކު ރާއްޖެ އާއި ޗައިނާގެ ގުޅުން އިތުރު ހަރުފަތަކަށް ހިނގައްޖެ
ވެން ޝިއާޓޯ: މިއީ ޗައިނާ އާއި ރާއްޖޭގެ ގުޅުމާއި އެކުވެރިކަން ރަމްޒުކޮށްދޭ ބްރިޖެއް. މި ބްރިޖާ އެކު ރާއްޖޭގެ ރައްޔިތުންގެ ހުވަފެންތަކުގައި ކުލަ ޖެހިއްޖެ. ޗައިނާ އޮތީ ރާއްޖޭގެ އިންފްރާސްޓްރަކްޗާ ތަރައްގީ ކުރުމުގައި އެހީވެދިނުމަށް ތައްޔާރަށް.
ޗައިނާގެ މަންދޫބު ވެން ޝިއާޓޯ ވާހަކަ ދައްކަވަނީ: މިއީ ރައީސް އަބްދުﷲ ޔާމީން ޗައިނާ އަށް ވަޑައިގެން ޗައިނާގެ ރައީސް އަރިހު ދަންނަވައިގެން ޗައިނާ އިން ހަދައިދީފައިވާ ބްރިޖެއް. ދެ ގައުމު ގުޅިގެން މި ބްރިޖް ފެންވަރު ރަނގަޅު އަދި ރީތި ބްރިޖަކަށް ހެދުމަށް ވަރަށް ގިނަ މަސައްކަތްތަކެއް، އަދި ވަރަށް ގިނަ މަޝްވަރާތަކެއް ކުރެވިއްޖެ.
މިރޭގެ ހަފުލާ ރޭވިފައިވާ ގޮތުން ބްރިޖް ހުޅުއްވައިދެއްވާނީ ރައީސް އަބްދުﷲ ޔާމީނާއި ބްރިޖް ހުޅުވުމަށް ޗައިނާ އިން ވަޑައިގެންނެވި ހާއްސަ މަންދޫބު ވެން ޝިއާޓޯ. މި ރަސްމިއްޔާތުގައި ބްރިޖްގެ މަސައްކަތާ ގުޅޭ ހާއްސަ ޕްރެޒެންޓޭޝަނެއް ދައްކާނެ.
ރައީސް ވާހަކަފުޅު ދެއްކެވުމަށް ފަހު ބްރިޖް ހުޅުވައި، އޭގެ ފަހުން މި ބްރިޖްގައި ރައީސާއި އޮފިޝަލުން ދަތުރުފުޅު ކުރައްވާނެ.
ހަވާ އެރުވުމާއި ބަޑިބޭހުގެ ކުޅިވަރުތައް ބާއްވަން ހަމަޖެހިފައި ވަނީ ހުޅުވުމުގެ ރަސްމިއްޔާތު ނިމުމަށް ފަހު
ހުޅުލެ އާއި މާލެ ގުޅާލާ ބްރިޖް ހުޅުވުމުގެ ރަސްމިއްޔާތާއި އެ މުނާސަބާއާ ގުޅިގެން މިރޭ ބާއްވަން ހަމަޖެހިފައިވާ އަލިފާނުގެ ކުޅިވަރުތައް ބެލުމަށް އެތައް ހާސް ބަޔަކު އާޓިފިޝަލް ބީޗް ސަރަހައްދަށް ޖަމާވެއްޖެ އެވެ.
ބްރިޖް ހުޅުވުމުގެ ރަސްމިއްޔާތު މިހާރު ވަނީ ފަށައިފަ އެވެ. މި ރަސްމިއްޔާތު ބާއްވާނީ އާޓިފިޝަލް ބީޗް ސަރަހައްދުގައި އެކަމަށް ހާއްސަކޮށް މިއަދު ތައްޔާރުކުރި ތަނެއްގަ އެވެ. މި ރަސްމިއްޔާތުގައި ރައީސް އަބްދުﷲ ޔާމީނާއި ޗައިނާ އާއި ދިވެހި ސަރުކާރުގެ އިސް ބޭފުޅުން ބައިވެރިވެ ވަޑައިގަންނަވަ އެވެ.
- މާލެ އާއި ހުޅުލެ ގުޅުވާލި ބްރިޖު އެޅުމުގެ މަސައްކަތުގެ ފުރަތަމަ މަރުހަލާ އަކީ އެކަމަށް ބޭނުންވާ މެޝިނަރީޒްތައް ބޭރުން ގެނައުން. ބޮޑެތި ކްރޭންތަކާއި އެހެން ވެސް ސާމާނު ގެނައި.
- ފައުންޑޭޝަންގެ މަސައްކަތް ކުރަން ޕްލެޓްފޯމެއް އެޅީ މެއި، 2016 ގައި.
- އެންމެ ގޮންޖެހުން ބޮޑު މަސައްކަތަކީ ބްރިޖުގެ ފައުންޑޭޝަނަށް ބޭނުންވާ ހޮޅިތައް ފެއްތުން. ބްރިޖުގެ މައި ހަތް ތަނބު އިންނައިރު، އެ ތަނބުތަކުގައި ޖަހާފައިވާ ބިޔަ 35 ހޮޅި ވަނީ ކަނޑު އަޑިއަށް ފައްތާފައި.
- މެއި، 30، 2017، ގައި ބްރިޖުގެ ކޮންކްރީޓް ތަނބުތައް ފެނުން މައްޗަށް އެރި.
- މާލެ އާއި ހުޅުލޭ ކޮޅުން ބްރިޖް، މައި ކަނޑާ ހަމައަށް ގެންދިޔައީ ކޮންކްރީޓް ޝީޓްތަކުން. އެކަމަކު ކަނޑުގައި ޖަހާފައިވާ ބިޔަ ތަނބުތަކުގެ ދެމެދުން ބްރިޖް ގުޅުވާލީ، ޗައިނާގައި ތައްޔާރުކޮށްގެން ގެނައި "ސުޕަސްޓްރަކްޗާ" އިން. އޭގެމަތީގައި ތާރުއަޅައި، ލައިޓްތައް ވަނީ ހަރުކޮށްފައި.
- ގަޑިއަކު 60 ކިލޯ މީޓަރަށް ދުއްވާ ގޮތަށް ޑިޒައިންކޮށްފައިވާ ބްރިޖުން ގާތްގަނޑަކަށް ތިން މިނެޓުން ހުޅުލެ އާއި މާލެ ހުރަސްކޮށްލެވޭނެ.
- ވެހިކަލްތަކަށް ހަތަރު ލޭން އޮންނާނެ، އެއީ ހުޅުލޭ ކޮޅަށް ޚާއްސަ ދެ ލޭނާއި މާލޭ ކޮޅަށް ދެ ލޭން. މާލޭ ކޮޅުގެ ދެ ލޭންގައި، 3.5 މީޓަރު ހުންނައިރު، އަނެއް ދެ ލޭންގައި 3.2 މީޓަރު ހުންނާނެ.
- ބްރިޖްގެ މަސައްކަތަށް 200 މިލިއަން ޑޮލަރު ޚަރަދުވާ އިރު އޭގެ ތެރެއިން 116 މިލިއަން ޑޮލަރަކީ ޗައިނާ ސަރުކާރުގެ ހިލޭ އެހީ. އަދި 72 މިލިއަން ޑޮލަރަކީ ޗައިނާގެ ލޯނު އެހީ. މި މަޝްރޫއަށް ދިވެހި ސަރުކާރުން 12 މިލިއަން ޑޮލަރު ހޭދަކުރޭ.
- ބްރިޖު ދަތުރުތަކަށް އާއްމުކޮށް ހުޅުވާލާނީ އަންނަ މަހުގެ 7 ގައި.