30 އޯގަސްޓް 2018 - 10:07
މިއުނިކް (އޮގަސްޓް 30) - ގައުމީ ޓީމަށް ކުޅުން ހުއްޓާލިއިރު ޖަރުމަނުގެ ތަރި މެސުޓް އޮޒިލް ދެއްކި ބައެއް ވާހަކަތަކާ ހެދި މީހުން އެ ގައުމާ މެދު ދެކޭގޮތް ބަދަލުވެފައިވާ ކަމަށާއި އެކަމަށް އޭނާ މައާފަށް އެދެން ޖެހޭނެ ކަމަށް ޖަރުމަނުގެ ކޯޗު ޔަކީމް ލޯ ބުނެފި އެވެ.
އޮޒިލް ގައުމީ ޓީމަށް ކުޅުން ހުއްޓާލިކަން އިއުލާންކުރަން އާންމުކުރި ބަޔާނުގައި ބުނެފައިވަނީ އޭނާއާ މެދު ވަރަށް ބޮޑަށް ނަސްލީ ތަފާތު ކުރުންތައް އޮތް ކަމަށާއި ޖަރުމަނު ފެޑެރޭޝަނުން އޭނާއާ މެދު އިހުތިރާމް ކުޑަކޮށް ދެކޭތީ ދެން ޖަރުމަނު ޓީމަށް ކުޅެން ބޭނުމެއް ނުވީ ކަމަށެވެ.
އޮޒިލާ މެދު ނަސްލީ ތަފާތު ކުރުންތައް ޖަރުމަނުން ގެންގުޅެން ފެށީ ވޯލްޑް ކަޕް ފެށުމުގެ އެއް މަސް ކުރިން ތުރުކީގެ ރައީސް ރަޖަބު ތައްޔިބު އުރުދުގާންއާ އެކު އޮޒިލާއި ޖަރުމަނުގެ ކުޅުންތެރިއާ އިލްކާއި ގުންޑޮގާން ބައްދަލުކޮށް ނަގާފައިވާ ފޮޓޯއެއް ސޯޝަލް މީޑިއާގައި އާންމުވި ހިސާބުންނެވެ. އޮޒިލްގެ އާއިލާ ނިސްބަތްވަނީ ތުރުކީ އަށެވެ.
ވޯލްޑް ކަޕްގެ ގްރޫޕް ސްޓޭޖުން ޖަރުމަނު ކެޓިއިރު، ގިނަ ބަޔަކު އެކަމުގެ ޒިންމާ އެޅުވީ އޮޒިލް ބޮލުގަ އެވެ. ފާޑުކިޔުންތައް ގިނަވެ ގައުމީ ޓީމަށް ކުޅުން ހުއްޓާލަން އޮޒިލް ނިންމުމުން އޭނާގެ ނިންމުމަށް އިހުތިރާމްކުރާ ކަމަށް ޖަރުމަނު ސަރުކާރުން ވަނީ ބުނެފަ އެވެ. އެކަމަކު ނަސްލީ ތަފާތު ކުރުން އޮންނަ ކަމަށް އޮޒިލް ދެއްކި ވާހަކައާ މެދު ގިނަ ކުޅުންތެރިން ނުރުހެ އެވެ. އަދި އޮޒިލްގެ އެ ވާހަކަތަކާ މެދު ހިތްހަމަ ނުޖެހިގެން ޖަރުމަނުގެ ކުޅުންތެރިއާ ޓޮނީ ކްރޫސް ވެސް ވާހަކަ ދެއްކި އެވެ.
އަންނަ މަހު އޮންނަ ބައިނަލްއަގްވާމީ މެޗުތަކަށް ޖަރުމަނުން ނެގި ސްކޮޑާ ބެހޭގޮތުން މީޑިއާގައި ވާހަކަ ދައްކަމުން ކޯޗު ލޯ ވަނީ އޮޒިލްއާ ވާހަކަ ދައްކަން މަސައްކަތްކުރި ކަމަށް ބުނެފަ އެވެ.
"ޓީމުން ރިޓަޔާކުރިކަމެއް އޮޒިލް އަހަންނަށް ނާންގާ. މީގެ ކުރިން ރިޓަޔާކުރާ ކުޅުންތެރިން އަހަރެން ގާތުގައި ބުނޭ. އޮޒިލް ނިންމީ ތަފާތު މަގަކުން ދާން. އަހަރެން އޮޒިލްއާ ވާހަކަ ދައްކަން ވަރަށް މަސައްކަތްކުރިން. މެސެޖް ވެސް ކުރިން ފޯނުން ގުޅައިގެން ވެސް. އެކަމެއް ނުވި،" ލޯ ބުންޏެވެ،
"އަހަރެންގެ ނަޒަރުގައި ދެއްކި ބައެއް ވާހަކަތަކަށް އޮޒިލް މަާފަށް އެދެން ޖެހޭ. އަހަރެން މި ޓީމުގައި ވަރަށް ދުވަސް ވެއްޖެ. ނަސްލީ ތަފާތުކުރުމަކީ ޓީމުގައި އޮންނަ ކަމެއް ނޫން."
ޖަރުމަނުގެ ވޯލްޑް ކަޕް ސްކޮޑުން ފުރުސަތު ނުލިބުނު އެންމެ ހުނަރުވެރި ކުޅުންތެރިއަކީ މެންޗެސްޓާ ސިޓީގެ ވިންގް ލިރޯއީ ސާނޭ އެވެ. މި ފަހަރުގެ ޓީމުގައި ލޯ ވަނީ ސާނޭ އަށް ފުރުސަތު ދީފަ އެވެ.
"ވޯލްޑް ކަޕަށް ނެގީ އޭރު އެންމެ ރަނގަޅު ސްކޮޑު. މި ފަހަރު ފުރުސަތު މިދިނީ މިހާރަށް ބަލާއިރު އެންމެ ރަނގަޅު ކުޅުންތެރިންނަށް. ވަކި ކުޅުންތެރިއަކަށް ވަކި ގޮތެއް ނުހަދަން،" ލޯ ބުންޏެވެ.
އަންނަ މަހު ހަ ވަނަ ދުވަހު ޔުއެފާގެ ނެޝަނަލް ލީގުގައި ޖަރުމަނު ކުޅޭ ފުރަތަމަ މެޗުގައި ނުކުންނާނީ ދުނިޔޭގެ ޗެމްޕިއަން ފްރާންސާ ދެކޮޅަށެވެ. އޭގެ ތިން ދުވަސް ފަހުން އެކުވެރިކަމުގެ މެޗެއްގައި ޕެރޫއާ ބައްދަލުކުރާނެ އެވެ.