26 އޯގަސްޓް 2018 - 12:28
އިސްލާމްއާބާދު (އޮގަސްޓް 26) - ޕާކިސްތާނުގެ ރައީސް އާއި ބޮޑު ވަޒީރު ވެސް ހިމެނޭ ގޮތަށް ސަރުކާރުގެ އިސްވެރިން ފަސްޓް ކްލާހުގައި ދަތުރު ކުރުން މަނާކޮށްފި އެވެ.
ބޮޑު ވަޒީރު އިމްރާން ޚާން ރިޔާސަތު ބެލެހެއްޓި ކެބިނެޓުގެ ބައްދަލުވުމެއްގައި ނިންމާފައި ވަނީ ޚަރަދު ކުޑަކުރުމުގެ ގޮތުން ސަރުކާރުގެ ހުރިހާ ވެރިން ވެސް ދެން މީގެ ފަހުން ދަތުރު ކުރާނީ ބިޒްނަސް ކްލާހުގައި ކަމަށެވެ. އޭގެ ތެރޭގައި އުއްތަމަ ފަނޑިޔާރާއި ސެނެޓުގެ ޗެއާމަން، ނޭޝަނަލް އެސެމްބްލީގެ ރައީސް އަދި ޗީފް މިނިސްޓަރުންނާއި ސިފައިންގެ ވެރިޔާ ހިމެނެ އެވެ.
ބޭރު ގައުމުތަކަށް ދަތުރު ކުރައްވާ އިރު ޚާއްސަ މަތިންދާ ބޯޓެއް ބޭނުން ކުރުން ވެސް ބޮޑު ވަޒީރު ވަނީ މަނާކޮށްފަ އެވެ.
ޖުލައި 25 ވަނަ ދުވަހު ބޭއްވި އާއްމު އިންތިޚާބު ކާމިޔާބު ކުރެއްވުމާ އެކު އިމްރާޚާން ވަނީ ބޮޑު ވަޒީރުގެ ރަސްމީ ގެކޮޅުގައި ދިރިނޫޅުއްވާނެ ކަމަށް ވިދާޅުވެފަ އެވެ. އޭގެ ބަދަލުގައި ދިރިއުޅުއްވާނީ ބޮޑު ވަޒީރުގެ މިލިޓަރީ ސެކްރެޓަރީ ކުރިން ދިރިއުޅުއްވި ކުޑަ ގެއެއްގައި ކަމަށް ވިދާޅުވި އެވެ. އިމްރާން ޚާން ވަނީ ދެ ވެހިކަލާއި ދެ ސާވަޓުން ބޭނުން ކުރަން ނިންމަވައިފަ އެވެ.
ސަރުކާރުގެ މަސައްކަތުގެ ދުވަހަކީ މިހާރު އޮންނަ ފަސް ދުވަހުގެ ބަދަލުގައި ހަ ދުވަހަށް ބަދަލު ކުރަން ވެސް ކެބިނެޓުގައި މަޝްވަރާ ކުރި އެވެ. ހަފުތާއަކު ފަސް ދުވަހަށް 2011 ވަނަ އަހަރު މަސައްކަތް ބަދަލުކުރީ ކަރަންޓް ކެނޑުމުގެ މައްސަލަ ބޮޑުވާތީ ތެލުގެ ޚަރަދު ކުޑަ ކުރުމުގެ ގޮތުންނެވެ. ނަމަވެސް ހަފުތާއަކު ފަސް ދުވަހު މަސައްކަތް ކުރި ނަމަވެސް ސަރުކާރުގެ ޕާފޯމެންސަށް ބަދަލެއް ނާންނަ ކަމަށް ކެބިނެޓުން ވަނީ ނިންމައިފަ އެވެ. މިހާރު އޮންނަ މަސައްކަތު ގަޑި 8-4 ގެ ބަދަލުގައި 9-5 އަށް ވަނީ ބަދަލުކޮށްފަ އެވެ.