26 އޯގަސްޓް 2018 - 07:04
ކާޖޮލް ދާދި ފަހުން ބުނި ގޮތުގައި އޭނާގެ ހަޔާތާ ބެހޭ ފިލްމެއް ހަދާކަށް ބޭނުމެއް ނޫނެވެ. އަދި އެކަމަށް ޝައުގުވެރިކަމެއް ވެސް ނެތް ކަމަށް ބުންޏެވެ.
އެކަމަކު ބައޮގްރަފިކަލް ޑްރާމާއެއްގައި މީހެއްގެ ރޯލް ކުޅެން ލިބިއްޖެ ނަމަ ހޮވުމަކަށް ވާނީ މަންމަ ތަނޫޖާ ނުވަތަ މާމަ ޝޮބްނާ ސަމާތުގެ ރޯލް ކުޅެން ކަމަށް ކާޖޮލް ބުނެފި އެވެ. ފިލްމްފެއާ މަޖައްލާ އަށް ދިން އިންޓަވިއުއެއްގައި ކާޖޮލް ބުނީ އޭނާގެ މަންމަ އާއި މާމަގެ ހަޔާތުގެ ވާހަކައަކީ ވަރަށް ޝައުގުވެރި ވާހަކަތަކެއް ކަމަށެވެ.
އެ ދެ މީހުންނަކީ ވަރަށް ވަރުގަދަ ދެ ޝަހުސިއްޔަތުން ކަމަށް ބުންޏެވެ.
"އަހަންނަށް ޔަގީން އެ ދެ މީހުންނާ ބެހޭ ބައޮގްރިފިކަލް ޑްރާމާއަކަށް އަހަންނަށް އިންސާފުކޮށް ދެވިދާނެ ކަމަށް،" އެކްޓަރު އަޖޭ ދޭވްގަންގެ އަންހެނުން ބުންޏެވެ.
ކާޖޮލްގެ މަންމަ ތަނޫޖާ، 74، އަކީ 1960 އާއި 1970 ގެ އަހަރުތަކުގައި ވަރަށް ވިދާލި ބަތަލާއެކެވެ. އަދި އޭނާގެ މަންމަ ޝޮބްނާއަކީ 1940 ގެ އަހަރުތަކުގައި ވިދާލި ބަތަލާއެކެވެ. އުމުރުން 83 އަހަރުގައި 2000 ވަނަ އަހަރު މަރުވެފައިވާ ޝޮބްނާއަކީ ބަތަލާއެއްގެ އިތުރުން ޑައިރެކްޓަރެއް އަދި ޕްރޮޑިއުސަރެއް ވެސް މެ އެވެ.
އޭނާގެ ހަތަރު އަންހެން ދަރިންގެ ތެރެއިން ތަނޫޖާ އާއި ނޫޓާންއަކީ ހިންދީ ސިނަމާގެ އެންމެ މޮޅެތި އަދި އެންމެ ކާމިޔާބު ބަތަލާއިންގެ ތެރޭގައި ހިމެނުނު ތަރިންނެވެ. ނޫޓާންއަކީ އެކްޓަރު މޯނިޝް ބޭލްގެ މަންމަ އެވެ.
މިހާރު ދެ ކުދިން ތިބި ކާޖޮލްއަކީ ވެސް ބޮލީވުޑްގެ އެންމެ ހުނަރުވެރި އެއް ބަތަލާ އެވެ. ކާމިޔާބު އެތައް ފިލްމެއް ކުޅެފައިވާ ކާޖޮލްގެ ކުރިއަށް އޮތް ފިލްމަކީ އަންނަ އޮކްޓޯބަރު މަހުގެ 12 ގައި ރިލީޒް ކުރާ "ހެލިކޮޕްޓާ އީލާ" އެވެ.