24 އޯގަސްޓް 2018 - 12:09
އަންނަ މަހުގެ 10 ވަނަ ދުވަހުން ފެށިގެން ދައްކަން ނިންމާފައިވާ، ސްޓާ ޕްލަސްގެ އާ ޓީވީ ސިލްސިލާ "ކަސޯޓީ ޒިންދަގީ ކީ" ގެ ދެވަނަ ސީޒަން ދެއްކުން ފަސްކޮށްފި އެވެ.
އިންޑިިއާ ފޯރަމުން ބުނި ގޮތުގައި ޕްރޮޑިއުސަރު އެކްތާ ކަޕޫރާއި ސްޓާ ޕްލަސް އިން މިހާރު ނިންމާފައި ވަނީ އަންނަ މަހުގެ 25 ވަނަ ދުވަހުން ފެށިގެން ސިލްސިލާ ދައްކާށެވެ. ނަމަވެސް މިހާރު ޝޫޓިން ކުރިއަށްދާ ސިލްސިލާ ލަސްކުރި ސަބަބެއް ބުނެފައެއް އެވެ.
ސްޓާ ޕްލަސް އިން މީގެ އަހަރުތަކެއް ކުރިން ގެނެސް ދިން އެންމެ ކާމިޔާބު ސިލްސިލާތަކުގެ ތެރޭގައި ހިމެނޭ "ކަސޯޓީ" ގެ ދެވަނަ ސީޒަނެއް ގެނެސް ދެނީ މުޅިން ތަފާތު ކާސްޓަކާ އެކުގަ އެވެ. އާ ޝޯގެ ޕްރޮމޯ ތީމް ލަަވައާ އެކު ދައްކަން ފަށާފައި ވަނީ މިދިޔަ މަހުގެ 26 އިން ފެށިގެންނެވެ.
"ކަސޯޓީ" ސީޒަން ދޭއްގައި ޕްރޭނާގެ ރޯލް ކުޅެނީ އެރިކާ ފެނަންޑޭކަން ކަށަވަރުކޮށް ދިން ނަމަވެސް، މީގެ އިތުރު މުހިއްމު ކެރެކްޓާތަކުން ފެންނާނެ ތަރިން މުޅިއަކުން އަދި ކަށަވަރެއް ނުވެ އެވެ.
އެކަމަކު ރިޕޯޓްތައް ބުނަނީ އަނޫރާގް ބާސޫގެ ރޯލުން ފެނިގެން ދާނީ ޕާތު ސަމްތާން ކަމަށާއި ކޮމަލިކާގެ ރޯލުން ފެނިގެން ދާނީ "ޔޭ ރިޝްތާ ކިޔާ ކެހެލާތާ ހޭ" ގައި ކުރިން އަކްޝަރާގެ ރޯލް ކުޅުނު ހީނާ ހާން ކަމަށެވެ.
ނަމަވެސް އެކްތާ އާއި "ކަސޯޓީ 2" ގެ ޓީމުން ވަނީ ކާސްޓުން ސިއްރުކޮށްފަ އެވެ.
މި ސިލްސިލާ ސްޓާ ޕްލަސް އިން ދައްކަން ފަށާ އިރު، ފުރަތަމަ ތިން އެޕިސޯޑް ބޮލީވުޑްގެ މަޝްހޫރު އެކްޓަރު ޝާހްރުކް ހާން ނެރޭޓްކޮށް ދޭން ވަނީ ހަމަޖެހިފަ އެވެ. އެގޮތުން ސިލްސިލާ ޕްރޮމޯޓް ކުރުމުގެ ގޮތުން ޝާހްރުކާއި އެކްތާ ހިމެނޭ ކުޑަކުޑަ ވީޑިއޯ ކްލިޕެއް ވެސް މިހާރު ވަނީ ބެލުންތެރިންނަށް ދައްކާލައިފަ އެވެ.