16 އޯގަސްޓް 2018 - 08:15
ބްރޮކޮލީ އާއި ކޭލް އަދި ކެބެޖު ކޮލޮން ކެންސަރާ ދެކޮޅަށްމަސައްކަތްކުރާ ކަމަށް ފަހުގެ ދިރާސާއެއްގައި ބުނެފި އެވެ.
އިމިއުނިޓީ ޖާނަލްގައި ޝާއިއުކޮށްފައިވާ ލަންޑަނުގެ ފްރެންސިން ކްރިކް އިންސްޓިއުޓްގެ ދިސާސާގައި ބުނި ގޮތުގައި މި ތަރުކާރީތަކަކީ ކެންސަރާ ދެކޮޅަށް ހަނގުރާމަކޮށްދޭ ކެމިލްކަލްގެ މާއްދާތަކުން މުއްސަނދިވެފައިވާ އެއްޗެކެވެ.
އެހެންވެ އާންމުކޮށް ބްރޮކޮލީ އާއި ކޭލް އާއި ކެބެޖް ފަދަ ބާވަތްތައް ކެއުން ވަރަށް މުހިއްމު ކަމަށް ބުންޏެވެ.
އެ ދިރާސާގައި ފާހަގަކޮށްފައިވާ ގޮތުގައި ބްރެޒިކާ ޖީނަސްގެ އާއިލާގެ ތަރުކާރީގެ ބާވަތްތަކަކީ އިންޑޯލް-3 ކާބިނޯލް (އައި3ސީ) އިން މުއްސަނދިވެފައިވާ ބާވަތެކެވެ. އެ ބާވްތަކުގެ ތަރުކާރީގެ ތެރޭގައި ބްރޮކޮލީ، ކޭލް، ކެބެޖް އަދި ކޯލިފްލާވާ، ބްރަޒެލްސް އަދި ސްޕްރައިޓްސް ފަދަ ބާވަތްތައް ހިމެނެ އެވެ.
ދިރާސާ ޓީމުގައި ހިމެނޭ ފްރެންސިން ކްރިކް އިންސްޓިއުޓްގެ ގްރޫޕް ލީޑަރު ޑރ. ޖިޓާ ސްޓޮކިންޖާ ވިދާޅުވި ގޮތުގައި ކެންސަރާއި މީހާގެ ކެއުމުގެ ވައްޓަފާޅިއާ ވަރަށް ބޮޑް ގުޅުމެއްވެ އެވެ. އެހެންވެ ކޮލޮން ކެންސަރު ފަދަ ބަލިތަކުން ރައްކާތެރިވުމަށްޓަކައި އެކަމަށް ހާއްސަ ކެއުންތަކަށް އިސްކަން ދިނުން މުހިއްމުވެ.
"މި ދިރާސާ އިން ވެސް އެނގޭ ކަމަކީ އެއީ. ކެއުމުގައި ތަރުކާރީގެ ބާވަތްތައް ހިމެނުމަކީ އަބަދު ވެސް ވަރަށް ބޮޑަށް ސަމާލު ކަމެއް ދޭން ޖެހޭ ކަމެއް،" އޭނާ ވިދާޅުވި އެވެ.