14 އޯގަސްޓް 2018 - 12:24
ސާފް ސުޒުކީ ކަޕަށް ތައްޔާރުވުމުގެ ގޮތުން ޕާކިސްތާން ގައުމީ ޓީމާ އެކު މެޗެއް ކުޅެން މަސައްކަތް ކުރަމުން އަންނަ ކަމަށް އެފްއޭއެމުން ބުނެފި އެވެ.
ގަތަރުގައި ޓްރެއިނިން ކޭމްޕް ފުރިހަމަ ކުރަމުން އަންނަ ގައުމީ ފުޓްބޯޅަ ޓީމު ކުޅޭ ފުރަތަމަ މެޗުގައި މިރޭ ނުކުންނާނީ ގަތަރުގެ ދެ ވަނަ ޑިވިޝަނުގެ ކްލަބެއް ކަމަށްވާ އަލް މަހިޔާ ސްޕޯޓްސް ކްލަބާ ދެކޮޅަށެވެ. އެނގިފައިވާ ގޮތުގައި ޕާކިސްތާނާ ދެކޮޅަށް މެޗެއް ކުޅެން ގައުމީ ޓީމުން މަސައްކަތް ކުރަމުން އަންނަނީ މި މަހު 26 ވަނަ ދުވަހު ގަތަރުގަ އެވެ.
އެފްއޭއެމްގެ ޖެނެރަލް ސެކްރެޓަރީ ހުސެއިން ޖަވާޒް (ޖަވާ) "މިހާރަ"ށް ވިދާޅުވީ ޕާކިސްތާނާ ދެކޮޅަށް މެޗެއް ކުޅެން މަސައްކަތް ކުރަމުން އަންނަ ކަމަށެވެ.
"ވިސާގެ މައްސަލަތަކެއް ޕާކިސްތާނުގެ ޓީމުގައި އުޅޭތީ އަދި މެޗު އެއްކޮށެއް ހަމައެއް ނުޖެހޭ. މަސައްކަތް ކުރަމުން މި ދަނީ ޕާކިސްތާނާ ދެކޮޅަށް މެޗެއް ކުޅެން،" ޖަވާ ވިދާޅުވި އެވެ.
ކްރޮއޭޝިއާގެ ކޯޗު ޕީޓަ ސެގާޓްގެ އިރުޝާދުގެ ދަށުން ގައުމީ ޓީމުން ގަތަރުގައި ފަރިތަކުރުންތައް ބާއްވަމުން އަންނައިރު އޭނާ މީގެ ކުރިން ވަނީ މެޗުތަކެއް ކުޅޭނެ ކަމަށް ބުނެފަ އެވެ. އަދި އެ މެޗުތަކުގައި ވިސްނާނީ ނަތީޖާ އަށް ނޫން ކަމަށާއި ކުޅުންތެރިންނަށް ފުރުސަތު ދިނުމަށް ކަމަށެވެ.
ބްރެޒިލްގެ ގިނަ ކްލަބްތަކެއްގައި މަސައްކަތްކުރި ކޯޗު ހޯސޭ އެންޓޯނިއޯ ނޮގޭރާގެ އިރުޝާދުގެ ދަށުން ޕާކިސްތާން ވަނީ މިދިޔަ ޖުލައި މަހު ޕްރެކްޓިސްތައް ފަށައިފަ އެވެ. އެ ޓީމުން ވަނީ މި ފަހަރުގެ އޭޝިއަން ގޭމްސްގައި ވާދަކުރާތީ ޒުވާން ޓީމާ އެކު ޕްރެކްޓިސްތައް ފަށައިފަ އެވެ. ބަހްރޭނުގައި ޓްރެއިނިން ކޭމްޕެއް ވެސް ވަނީ ފުރިހަމަކޮށްފަ އެވެ.
މި ފަހަރުގެ އޭޝިއަން ގޭމްސް އަކީ ތިން އަހަރަށް ފަހު ޕާކިސްތާން ވާދަކުރާ ފުޓްބޯޅައިގެ ފުރަތަމަ މުބާރާތެވެ. ޕާކިސްތާނުގެ ހައި ކޯޓުން އެ ގައުމުގެ ފުޓްބޯޅަ އިދާރާ އަށް 2015 ވަނަ އަހަރު ނުފޫޒު ފޯރުވަން މަސައްކަތްކުރުމުން މިދިޔަ އަހަރުތަކުގައި އެ ގައުމުގެ ފުޓްބޯޅަ އޮތީ ވަރަށް ބޮޑަށް ވެއްޓިފަ އެވެ. މި ފަހަރުގެ އޭޝިއަން ގޭމްސް އާއި ސާފަކީ އެ ގައުމުގެ ފުޓްބޯޅަ އަލުން ހަމަމަގަށް އަޅުވަން ލިބޭ ފުރުސަތެއް ކަމަށް އެ ގައުމުން ގަބޫލުކުރެ އެވެ.
ކުރިއަށް އޮތް ދެ މުބާރާތަށް ސާފުން ނެގި ބޮޑު ސްކޮޑުގައި ޔޫރަޕްގެ ގައުމުތަކުގައި ކުޅޭ އެ ގައުމުގެ ބައެއް ކުޅުންތެރިން ވަނީ ހިމަނައިފަ އެވެ.
އަންނަ މަހު 4-15 އަށް ޑާކާގައި ކުރިއަށްދާ ސާފް ސުޒުކީ ކަޕްގައި ޕާކިސްތާން އޮތީ ބަންގްލަދޭޝް، ނޭޕާލް އަދި ބޫޓާނާ އެކު ގްރޫޕް އޭ ގަ އެވެ. ދެ ވަނަ ގްރޫޕްގައި އޮތީ ރާއްޖެ އާއި އިންޑިއާ އަދި ސްރީލަންކާ އެވެ.
ޕާކިސްތާން އަތުން 1991 ވަނަ އަހަރުގެ ސާފް ގޭމްސްގެ ފައިނަލުން ރާއްޖެ ބަލިވިއިރު، 2003 ގެ ސާފް ޗެމްޕިއަންޝިޕުގެ ސެމީގައި ރާއްޖެ މޮޅުވި އެވެ. އަދި 2008 ވަނަ އަހަރުގެ ސާފް ޗެމްޕިއަންޝިޕުގެ ގްރޫޕް ސްޓޭޖުން މެޗުން ރާއްޖެ ވަނީ 3-0 އިން މޮޅުވެފަ އެވެ.