12 އޯގަސްޓް 2018 - 13:37
ފިޓްނަސްއާ ގުޅޭ ދެ ކޯހެއް، މެޕްސް ކޮލެޖުގައި އިއްޔެ ތައާރަފުކޮށް، ކުރިމަތިލާން ހުޅުވާލައިފި އެވެ.
ސެޓްފިކެޓް 3 އިން އެރޮބިކްސް އެންޑް ގްރޫޕް ފިޓްނެސް އިންސްޓްރަކްޓާ ކޯހާއި އެޑްވާންސްޑް ސެޓްފިކެޓް އިން ފިޓްނަސް އިންސްޓްރަކްޓާ އެންޑް ޕާސަނަލް ޓްރެއިނާ ކޯސް ކުރިއަށްގެންދިއުމުގެ އެއްބަސްވުމުގައި، މެޕްސް ކޮލެޖުގެ ވައިސް ރެކްޓާ މެތިއު ސްޓްރީޓް އަދި އަޒުމް ޓްރެއިނިން އެންޑް ކޮންސަލްޓަންސީގެ މެނޭޖިން ޑިރެކްޓަރު ޒަމީލާ އަހުމަދު ވަނީ ސޮއިކުރައްވައިފަ އެވެ.
މެޕްސް އިން މި ކޯސް ހިންގާނީ އަޒުމް ޓްރެއިނިން އެންޑް ކޮންސަލްޓަންސީއާ ގުޅިގެންނެވެ. އެއީ ރާއްޖޭގައި ފިސާފްގެ ޓްރެއިނިންތައް ހިންގުމުގެ ހުއްދަ ލިބިފައިވާ ހަމައެކަނި ފަރާތެވެ.
ޒަމީލާ ވިދާޅުވި ގޮތުގައި އެ ދެ ކޯސް އަމާޒުކޮށްފައިވަނީ ވަޒީފާގެ އުޅޭ މީހުންނަށް ހާއްސަކޮށެވެ. އެހެންވެ ކިޔެވުން ބާއްވަން ހަމަޖައްސާފައިވަނީ ހަވީރު ކަމަށް އޭނާ ވިދާޅުވި އެވެ.
އެރޮބިކްސް ކޯހުގެ މުއްދަތަކީ ތިން މަހެވެ. ޕާސަނަލް ޓްރެއިނާ ކޯހުގެ މުއްދަތަކީ ހަ މަސް ދުވަހެވެ.
"ކޮންމެ ކޯހަކަށް ވެސް ތިރީސް ޖާގަ ކަނޑައަޅާފައި މި ވަނީ. ކިޔަވައިދިނުމުގައި، ޕްރެކްޓިކަލް ފިޔަވައި އެހެން ހުރިހާ ބައިތަކެއް ކުރިއަށްގެންދާނީ މެޕްސް އިން،" ޒަމީލާ ވިދާޅުވި އެވެ.