11 އޯގަސްޓް 2018 - 19:31
ރިޔާޒް (އޮގަސްޓް 11) - ޔަމަނަށް ދިން ވައިގެ ހަމަލާއެއްގައި ސްކޫލް ބަހެއްގައި ތިބި 29 ކުދިން މަރުވި މައްސަލަ ތަހުގީގު ކުރާނެ ކަމަށް ސައުދީ ކޯލިޝަނުން ބުނެފި އެވެ.
ސީނިއާ އޮފިޝަލުންނާ ހަވާލާދީ ސައުދީގެ އަލް އަރަބިއްޔާ ޓީވީން ބުނީ ވައިގެ ހަމަލާ އިން ލިބުނު ގެއްލުން ކޯލިޝަނުން ބަލަމުންދާ ކަމަށެވެ.
ސައުދީ ކޯލިޝަނުން ވައިގެ ހަމަލާ ދީނީ ހޫތީންގެ ބާރުގެ ދަށުގައި އޮންނަ ސާދާ ޕްރޮވިންސްގެ މާރުކޭޓެއްގެ ކައިރީ ޕާކް ކޮށްފައި އޮތް ބަހަކަށެވެ. ބަސް ދަތުރުކޮށްފައި ދިޔައީ ޕިކްނިކް ދަތުރެއް ނިންމާފައި ކުދިން ގޮވައިގެން ސްކޫލަށް ކަމަށް ސޭވް ދަ ޗިލްރަން އިން ބުނެ އެވެ. ބަހަށް ވައިގެ ހަމަލާ ދިނީ މާރުކޭޓްގެ ކައިރީގައި ބަސް މަޑުކޮށް ލުއި ބުއިމެއް ގަތުމަށް ޑްރައިވަރު ފިހާރަ އަށް ވަތް ވަގުތު ކަމަށްވެ އެވެ. ބަހުގައި ތިބީ 15 އަހަރުން ދަށުގެ ކުދިންނެވެ.
ހޫތީން ހިންގާ ހެލްތު މިނިސްޓްރީން ބުނީ ވައިގެ ހަމަލާގައި މަރުވި މީހުންގެ އަދަދު 51 އަރާފައިވާ ކަމަށެވެ. އަދި 79 މީހުން ޒަޚަމްވެފައިވާ ކަމަށް ވެސް ބުނެފައިވެ އެވެ.
ހޫތީންގެ ސުޕްރީމް ރިވޮލިއުޝަނަރީ ކައުންސިލްގެ ލީޑަރު މުހައްމަދު އަލީ އަލް ހޫތީ ބުނީ ސައުދީ ކޯލިޝަނުގެ ހަމަލާ ބައިނަލްއަގުވާމީ ފެންވަރުގައި ތަހުގީގު ކުރަން ޖެހޭ ކަމަށެވެ.
ޔޫއޭއީ އާއި ސައުދީ ހިމެނޭ ކޯލިޝަނުން ނެރުނު ބަޔާނެއްގައި ވަނީ ސައުދީ ބޯޑަރު ކައިރީގައި އޮންނަ ސާދާ އަށް ވައިގެ ހަމަލާ ދިން ކަމަށް އެއްބަސްވެފަ އެވެ. ނަމަވެސް ހަމަލާ ދިނީ ހޫތީން މިސައިލް ހަމަލާ ދިނުމަށް ބޭނުން ކުރާ ތަނަކަށް ކަމަށް ބުނެފައިވެ އެވެ.