08 އޯގަސްޓް 2018 - 15:07
ގދ. ފަރެސްމާތޮޑާ އެއާޕޯޓް ހަދަން ބިން ހިއްކާ އިރު، އެ ރަށު ފަޅުތެރޭގައި އިރުން އޮތް ފަސް ފަޅުރަށް، އެއްފަސްވެގެންދާ ގޮތަށް ހިއްކާތީ، ތިމާވެށީގެ ހިމާޔަތުގައި މަސައްކަތް ކުރާ ޖަމިއްޔާ އީކޯކެއާ އިން ކަންބޮޑުވުން ފާޅުކޮށްފި އެވެ.
ފަރެސްމާތޮޑާ އެއާޕޯޓަށް ބޭނުންވާ ބިން ހިއްކާ އިރު، އެ ރަށުގެ އިރުމަތިން ކައިރިކައިރީގައި އޮންނަ ކަނޑައްދުވާ، ހަންޑައިދުވާ، ދޫނިރެހާ، ކާޅެހުއްޓާ، އަދި މާރެހާ އެކުވެގެންދާނެ އެވެ.
އީކޯކެއާ އިން ބުނީ އެއީ ފަރެސްމާތޮޑާ އާއި ކައިރީގައިވާ ރަށްރަށުން ސިޔާސީ ގޮތުން ސަރުކާރަށް ލިބިދާނެ އެއްބާރުލުމަކަށް ބަލާފައި ކުރިއަށް ގެންދާ މަޝްރޫއެއް ކަމަށެވެ.
މި މަޝްރޫއާ ގުޅިގެން ތައްޔާރުކޮށްފައިވާ ތިމާވެއްޓަށް އަސަރުކުރާނެ މިންވަރު ބަލާ ރިޕޯޓް (އީއައިއޭ)ގައި ވާ ގޮތުން، 8-11 މިލިއަން ޑޮލަރު ހޭދަވާނެ ކަމަށް ބެލެވޭ އެއާޕޯޓް ހަދަން 17.2 ހެކްޓަރުގެ ބިން ހިއްކަން ޖެހެ އެވެ.
އީކޯކެއާ އިން ކަންބޮޑުވާ ކަންކަމުގެ ތެރޭގައި އެއާޕޯޓް ހެދުމަށްޓަކައި އެ ފަސް ފަޅުރަށުން 14،000-16،000 ގަސް ކެނޑުމުގެ އިތުރުން، އެ ރަށްތަކުގެ ވަށައިގެންވާ ސަރަހައްދުގެ ކަނޑުގެ ދިރުންތަކަށް ކުރާނެ ނޭދެވޭ އަސަރު ހިމެނެ އެވެ.
"މި ހުރިހާ ކަމަކުން ވެސް އަލުން އިއާދަނުކުރެވޭ ވަރުގެ ބޮޑު ގެއްލުންތަކެއް ތިމާވެއްޓަށް ލިބޭނެ އެވެ،" އީކޯކެއާގެ ބަޔާނުގައިވެ އެވެ.
އެކަމަކު ތިމާވެށީގެ ގެއްލުންތަކަށް ވުރެ އެއާޕޯޓެއްގެ މުހިންމުކަން ފަރެސްމާތޮޑާގެ މީހުންނަށް ބޮޑެވެ. އެ ރަށު ކައުންސިލް މެމްބަރު ނަސްރުﷲ މުހައްމަދު ވިދާޅުވީ ބިން ހިއްކުމުގެ މަސައްކަތް ކުރާ އިރު ތިމާވެއްޓަށް ގެއްލުން ވިޔަސް، އެއީ ކޮންމެހެން ކުރަން ޖެހޭ ކަމެއް ކަމަށެވެ. އަދި އެއާޕޯޓް ހަދަން އެ ރަށު ރައްޔިތުންގެ އެއްބާރުލުން އޮތް ކަމަށް ވެސް ވިދާޅުވި އެވެ.
"[އީއައިއޭ] ރިޕޯޓުގައި ހުރި ލަފަޔާ އެއްގޮތަށް އެއާޕޯޓު ހެދުމުގެ މަސައްކަތް ކުރިއަށް ގެންދާނީ،" ނަސްރުﷲ ވިދާޅުވި އެވެ.
ފަރެސްމާތޮޑާ އެއާޕޯޓް އަޅަނީ މީހުން އުޅޭ ކޮންމެ ރަށަކުން ބައި ގަޑިއިރުގެ ތެރޭގައި ދަތުރު ކުރެވޭނެ އެއާޕޯޓެއް ހަދަން ސަރުކާރުން ގެންގުޅޭ ސިޔާސަތުގެ ދަށުންނެވެ.
މި އެއާޕޯޓް ހަދަން ރާއްޖޭގެ މަޝްހޫރު ވިޔަފާރިވެރިޔާ ޗަމްޕާ މުހައްމަދު މޫސާ ވަނީ ހަތަރު މިލިއަން ޑޮލަރުގެ ލޯނެއް ސަރުކާރަށް ދީފަ އެވެ.