07 އޯގަސްޓް 2018 - 15:59
މިނިވަން ނޫހުގެ ނޫސްވެރިޔާ އަހުމަދު ރިލްވާން މަރުވެއްޖެކަމަށް ރައީސް އަބްދުﷲ ޔާމީން މިއަދު ވިދާޅުވުމުން އިދިކޮޅު ރިއާސީ ކެންޑިޑޭޓް އިބްރާހިމް މުހައްމަދު ސޯލިހް (އިބޫ) އެކަމަށް ވަރަށް ބޮޑަށް ފާޑުވިދާޅުވެއްޖެ އެވެ.
ގދ. މަޑަވެލީ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް އެ ގޮތަށް ވިދާޅުވި އިރު، މިއީ ރިލްވާން މަރުވެފައިވާ ކަން ސަރުކާރުގެ ރަސްމީ ފަރާތަކުން އިއުލާން ކުރި ފުރަތަމަ ފަހަރެވެ.
ލ. މާބައިދޫގައި "މިނިވަން ޖަގަހަ" ހުޅުވުމަށް ފަހު ރައްޔިތުންނާ މުހާތަބު ކުރައްވަމުން އިބޫ ވަނީ ރިލްވާން ހާދިސާގައި ކަން ހިނގި ގޮތް ރައީސް ޔާމީނަށް އެނގިވަޑައިގެން ހުންނަވައި އެ މައުލޫމާތު ކަމާ ބެހޭ އިދާރާތަކަށާއި ޝަރީއަތާ ހިއްސާ ނުކުރެއްވީ ކީއްވެގެންތޯ ސުވާލު އުފައްދަވާފަ އެވެ.
ރިލްވާންގެ އާއިލާ އިން އެ ހާދިސާގެ މައުލޫމާތު ހޯދުމަށް އެތައް ފަހަރަކު އެދިފައިވާއިރު އެކަން ނުކޮށްދީ، އާންމު ޖަލްސާއެއްގައި ދެއްކެވި ވާހަކަފުޅެއްގެ ތެރެއިން ރިލްވާން މަރުވެފައިވާ ކަމަށް ވިދާޅުވުމަކީ ރައީސެއްގެ މަގާމުގައި ހުންނަ މީހަކު ކޮށްގެން ވާނޭ ކަމެއް ނޫން ކަމަށް އިބޫ ވިދާޅުވި އެވެ.
"ތަހުގީގަށް ވެސް ޝަރީއަތަށް ވެސް ރިލްވާން މަރުވިކަން ސާބިތު ކުރެވިފައެއް ނެތް.. މިއީ ވަރަށް އިހާނަތްތެރިކޮށް އެ މަނިކުފާނު ކުރެއްވި ކަމެއް. މިއަދު ކިހިނެއްތޯ ރިލްވާންގެ އާއިލާ އިން ކެތްކުރާނީ،" އިބޫ ވިދާޅުވި އެވެ.
އަދި އިބޫ ވަނީ ރިލްވާނަށް ވީގޮތާއި އެ ހާދިސާ ހިނގި ގޮތުގެ ތަފްސީލާ ގުޅޭ ގޮތުން ރައީސް ޔާމީނަށް ސުވާލުތަކެއް ހުށަހަޅުއްވާފަ އެވެ.
އިދިކޮޅު ކޯލިޝަންގެ ވެރިކަމެއްގައި އެފަދަ މައްސަލަތައް ތަހުގީގު ކުރައްވާނެ ކަމަށާއި އަދި އެ ދުވަހަކުން ރައީސް ޔާމީން ޖަވާބުދާރީ ކުރުވާނެ ކަމަށް އިބޫ ވިދާޅުވި އެވެ.
ރައީސްގެ އެ ވާހަކަފުޅާ ގުޅިގެން ފުލުހުން ވިދާޅުވީ ރިލްވާންގެ މައްސަލައިގައި އެއްވެސް މައުލޫމާތެއް ދެވެން ނެތް ކަމަށެވެ.