07 އޯގަސްޓް 2018 - 11:40
ރ. މުރަވަންދޫން ފުރައިގެން މާލެ ދަތުރުކުރި ސަޕްލައި ދޯންޏެއް ބ. ވަންޑޫމާފަރަށް އެރުމާ ގުޅިގެން، އެ ދޯނި ފުން ކުރުމުގެ މަސައްކަތް އެމްއެންޑީއެފް ނޮދަން އޭރިއާ ކޯސްޓްގާޑުން ފަށައިފި އެވެ.
އެމްއެންޑީއެފުން ބުނީ ސަޕްލައި ދޯނި އަރާފައި ވަނީ "ރީތި ބީޗް" ރިސޯޓުގެ އިރު ދެކުނުގައި އޮންނަ ވަންޑޫމާފަރަށް ކަމަށެވެ، މި ދޯނި ފަރަށް އެރީ ކީއްވެގެން ކަމެއް އަދި ނޭނގެ އެވެ.
އަދި މި ހާދިސާގެ މައުލޫމާތު ލިބުނީ ރޭ ދަންވަރު 01:55 ހާއިރު ކަމަށާއި ފަރަށް އަރާފައި ވަނީ "ޑީ ބުލޫ ކެރިއަރ" ނަމަކަށް ކިޔާ 98 ފޫޓުގެ ސަޕްލައި ދޯންޏެއް ކަމަށް އެމްއެންޑީއެފުން ބުންޏެވެ.
އެމްއެންޑީއެފުން ބުނީ މި ހާދިސާ ހިނގި ވަގުތު އެ ދޯނީގައި ހަތަރު މީހުން ތިބި ކަމަށާއި އެއީ ތިން ބިދޭސީންނާއި ދިވެއްސެއް ކަމަށެވެ. މި ހާދިސާގައި އެއްވެސް މީހަކަށް ގެއްލުމެއް ނުލިބެ އެވެ.
ފަރަށް އެރުމުގެ ސަބަބުން ދޯނި އޮތީ ވަރަށް ބޮޑަށް ވާތް ފަރާތަށް އަރި އަޅާލައިފަ އެވެ. ވާތް ފަރާތުން ބޮޑު ބައެއް އަޑި އަށް ގޮސްފައި އޮތް އިރު، ދޯނީގެ ކަނާތް ފަރާތް އެކުގައި ހެން އޮތީ ފެނުން މައްޗަށް އުފުލިފަ އެވެ. މި ދޯނި ފުން ކުރުމުގެ މަސައްކަތް މިހާރު ވެސް ކުރަމުން އަންނަ ކަމަށް އެމްއެންޑީއެފުން ބުންޏެވެ.