07 އޯގަސްޓް 2018 - 07:28
ބަރުދަން ލުއިކުރުމަށް ޑައެޓްކުރާ ބައެއް މީހުން، ކެފެއިން ހުންނަ ބުއިންތައް، ޑައެޓް ކާމިޔާބުކުރުމުގެ ގޮތުން ބޭނުންކުރި ކަމުގައި ވިޔަސް އެއީ ބޭކާރު އެއްޗެއް ކަމަށް ދިރާސާއެއްގައި ބުނެފި އެވެ.
ކުޑަ ދިރާސާއަކަށް ފަހު ސައިންސްވެރިން ބުނީ ކެފެއިން އަކީ ކާހިތްވުން ކުޑަކޮށްދޭ އަދި ބަރުދަން ލުއިކޮށްދޭ ވެސް އެއްޗެއް ނޫން ކަމަށެވެ.
މި ދިރާސާ ކުރުމަށް، 18-50 އަހަރާ ދެމެދުގެ، ސިއްހަތު ރަނގަޅު 50 މީހަކު ބައިވެރިކޮށްފައިވެ އެވެ. މި މީހުންނަށް ހަތަރު އައުންސްގެ ކޮފީގައި ހުންނަ ވަރުގެ ކެފެއިން އަޅައިގެން ޖޫސް ދިނުމުން އެ މީހުން ހެނދުނުގެ ނާސްތާގައި ކޭ މިންވަރު 10 ޕަސެންޓް މަދުވި އެވެ. އެއީ 70 ކެލަރީސް މަދު މިންވަރެކެވެ.
ނަމަވެސް ކެއުމަށް އައި މި ބަދަލު މުޅި ދުވަހު މިގޮތުގައި ނުހިފެހެއްޓުނުކަން ދިރާސާއިން އެނގުނެވެ. ހެނދުނު ކެލަރީސް މަދުވި މިންވަރު ދުވަހުގެ ފަހު ބައިގައި އިތުރުވި އެވެ. އެހެންވެ، މުޅި ދުވަހަށް ބަލާއިރު ކެއުން މަދެއް ނުވެ އެވެ.
ކާނާއިން ހަށިގަނޑަށް ކުރާ އަސަރަށް ވެސް ކެފެއިން ސަބަބުން އެއްވެސް ބަދަލެއް އަންނަ ކަމަކަށް ދިރާސާއަކުން ނުދެއްކި އެވެ. އަދި ބޮޑީ މާސް އިންޑެކްސް (ބީއެމްއައި) އަށް ކެފެއިންގެ ސަބަބުން އަސަރެއް ނުކުރި އެވެ.
ސްޓޭޓް ޔުނިވަސިޓީ އޮފް ނިއު ޔޯކްގެ އެސިސްޓެންޓް ޕްރޮފެސަރު ލީ ޕެނެކް-ޝާލީ ވިދާޅުވީ ބަރުދަން ލުއިކުރުމަށް ކުރާ ޑައެޓްތަކުގައި ކެފެއިން ހިމެނުމަކީ ވަރަށް އާންމުކޮށް އާދައެއް ކަމަށެވެ. އެކަމަކު މީގެ ކުރިން ކޮށްފައިވާ ބައެއް ދިރާސާތަކުން ވެސް، މިކަމުގައި ކެފެއިން އިން ކުރާ ފައިދާއާ މެދު ސުވާލު އުފައްދާފައިވާކަން ފާހަގަކޮށް ދިރާސާގައި ބުނީ ޑައެޓް ކާމިޔާބުކުރުމަށް ކެފެއިން އިން އެހީ ނުވާކަން މިހާރު އިތުރަށް ޔަގީންވެއްޖެ ކަމަށެވެ.
މި ދިރާސާ މިހާރު ވަނީ ޖާނަލް އޮފް ދަ އެކަޑަމީ އޮފް ނިއުޓްރިޝަން އެންޑް ޑައެބެޓީކްސްގައި ޝާއިއުކޮށްފަ އެވެ.