03 އޯގަސްޓް 2016 - 00:11
ޓެކްސް ނުދައްކާ ފަރާތްތަކުން މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ނަން ކިލަނބު ކުރަން ކެނޑިނޭޅި މަސައްކަތް ކުރަމުންދާ ކަމަށާއި އެކަމަކު ޒިންމާ އަދާކުރުމުގައި ފަހަތަށް ނުޖެހޭނެ ކަމަށް ކޮމިޝަނަ ޖެނެރަލް އޮފް ޓެކްސޭޝަން ޔަޒީދު މުހައްމަދު މިރޭ ވިދާޅުވެއްޖެ އެވެ.
މީރާގެ ހަ ވަނަ އަހަރީ ދުވަސް ފާހަގަ ކުރަން ބޭއްވި ޖަލްސާގައި ޔަޒީދު ވިދާޅުވީ މީރާގެ މަސައްކަތްތަކަކީ އެންމެން ރުހޭ ކަހަލަ މަސައްކަތަކަށް ނުދެވާނެ ކަމަށެވެ.
"ރުހުމުގައި ފައިސާ [ޓެކްސް] ނުދައްކާ ފަރާތްތަކަށް އެންފޯސްކޮށްގެން ފައިސާ ހޯދުމަކީ ޓެކްސް ދައްކާ ފަރާތްތަކުގެ މެދުގައި އިންސާފާއި ހަމަހަމަކަން ގާއިމު ކުރުމަށް ކިތަންމެ މުހިއްމު މަސައްކަތެއް ކަމުގައި ވިޔަސް މިކަމާ މެދު ރުޅި އަންނަ ފަރާތްތައް ވަރަށް ގިނަ،" ޔަޒީދު ވިދާޅުވި އެވެ.
އޭނާ ވިދާޅުވީ ގާނޫނީ ގޮތުން މީރާ އަށް ލިބިދޭ ބާރު ބޭނުންކޮށްގެން ޓެކްސް ފައިސާ ހޯދަން އުޅުމުން، އެ މުއައްސަސާ އަށް އޮންނަ އިތުބާރު ގެއްލުވާލަން އުޅޭ ކަމަށެވެ.
"ނަމަވެސް މިފަދަ ފަރާތްތަކަށް އަޅުގަނޑު ވަަރަށް ސާބިތުކަމާ އެކީ ދަންނަވަން ބޭނުން ވަނީ މީރާގެ ގާނޫނީ ޒިންމާ އަދާ ކުރުމަށް ކުރާ މަސައްކަތްތަކަށް މިފަދަ ފިނޑި އަމަލުތަކުގެ ސަބަބުން އެއްވެސް ކަހަލަ އުނިކަމެއް އަޔަކަ ނުދޭނަމޭ،" ޔަޒީދު ވިދާޅުވި އެވެ.
އަބަދު ވެސް މީރާ އޮންނާނީ، އޭނާ ވިދާޅުވި ގޮތުގައި، ތެދުވެރިކަމާއި ސާބިތުކަމާ އެކު ގާނޫނީ ޒިންމާ އަދާ ކުރުމުގަ އެވެ.
ޔަޒީދު ވަނީ މިދިޔަ ހަ އަހަރުގެ ތެރޭގައި މީރާ އިން ހޯދީ ކާމީޔާބީތައް ވެސް ފާހަގަކުރައްވާފަ އެވެ.
ރައްޔިތުންނާ ވީހާ ވެސް ގާތުން، ފަސޭހަކަމާ އެކު މީރާގެ ހިދުމަތްތައް ލިބޭނެ އިންތިޒާމް ހަމަޖައްސަމުން އަންނަ ކަމަށް އޭނާ ވިދާޅުވި އެވެ. އެ ގޮތުން، އޭނާ ވިދާޅުވީ މީރާގެ އޮފީސްތައް ރާއްޖޭގެ ހަ އަތޮޅެއްގައި މިހާރު ގާއިމު ކުރެވިފައިވާ އިރު، މި އަހަރު ނިމުމުގެ ކުރިން އިތުރު ފަސް އަތޮޅެއްގައި އޮފީސް ގާއިމު ކުރާނެ ކަމަށެވެ.
ޔަޒީދު ވިދާޅުވީ އޭޝިއަން ޑިވެލޮޕްމަންޓް ބޭންކް (އޭޑީބީ)ގެ އެހީގައި ގާއިމު ކުރާ ކަސްޓަމަ ރިލޭޝަންޝިޕް މެނޭޖްމަންޓް ސިސްޓަމް ގާއިމު ކުރުމުގެ މަސައްކަތް ވެސް މިހާރު ކުރިއަށް ދާ ކަމަށެވެ. އަދި މީރާގެ ހިދުމަތްތައް ކޮންމެ ތަނެއްގައި ހުރެގެން ވެސް ހޯދޭނެ ގޮތަށް ފަރުމާ ކުރާ މޮބައިލް އެޕްލިކޭޝަން ވަރަށް އަވަހަށް ތައާރަފް ކުރާނެ ކަމަށް ވެސް ވިދާޅުވި އެވެ.