04 އޯގަސްޓް 2018 - 07:31
ދުޅަހެޔޮ ސިއްހަތަކަށް ފައިދާހުރި ކާނާ ވަރަށް މުހިއްމެވެ. ކެއުމުގެ ތެރޭގައި މޭވާއާއި ތަރުކާރީ ހިމެނުމުގެ ގޮތުން ތަފާތު ބުއިންތައް ތައްޔާރުކޮށް އުޅެއެވެ. މިގޮތުން އުފައްދާ ސްމޫތީގެ ބާވަތްތައް ތައްޔާރުކުރުމަށްޓަކައި ގިނަ ވަގުތުތަކެއް ހޭދަކުރަންޖެހެއެވެ. މޭވާ އާއި ތަރުކާރީ ދޮވުމާއި މެށުމާއި ކޮށުމުގައި ހޭދަކުރަންޖެހޭ ވަގުތު ވަރަށް ގިނައެވެ. އޭގެ ބަދަލުގައި ކުޑަ ހިނދުކޮޅެއްގެ ތެރޭގައި ސްމޫތީ ތަށްޓެއް ހަދާލަން ބޭނުންހެއްޔެވެ؟ އަވާޒީ މެޝިނެއް ހޯދުމުން ފުދޭނެއެވެ.
އަވާޒީ އަކީ ކޮފީ މެޝިން އަސްލަކަށް ބަލައިގެން ހަދާފައިވާ މެޝިނެކެވެ. މި މެޝިނަށްލާ ސްމޫތީ ޕެކެޓް ހުންނަނީ ގަނޑުކޮށްފައެވެ. މިއީ 100 ޕަސެންޓް ރީސައިކަލްކުރެވޭ ޒާތުގެ ކޮތަޅުގައި ބަންދުކޮށްފައިވާ ޖޫހެކެވެ. އަދި ސްމޫތީ ތައްޔާރުކޮށްފައިވަނީ ވެސް އަސްލު މޭވާ އާއި ތަރުކާރީންނެވެ. އާޓިފިޝަލް އެއްވެސް ބާވަތެއް ނުހިމަނައެވެ.
އަވާޒީ މެޝިނުން ސްމޫތީ ހެދުމަށްޓަކައި މެޝިންގެ މަތީގައިވާ އާނގައަކަށް ސްމޫތީ ޕެކެޓްލާނީއެވެ. ދެން ފިތަކަށް އޮބާލުމުން މެޝިންތެރޭން އަރާ ހޫނަކުން ސްމޫތީގެ ގަނޑުފިލަމުން ކޮތަޅުގެ ފުލުން ތަށްޓަށް ފައިބާނެއެވެ. ހޫނަކުން ގަނޑުފިލިޔަސް ތަށްޓަށް ފައިބާއިރު މުޅީން ފިންޏެއް ނުކެނޑޭނެއެވެ. ވަގުތުން ބޯލަން ވަރަށް ކަމުދާނެއެވެ. ސްމޫތީގެ ފިނިކެނޑިގެން ތަށްޓަށް ފޭބުމަށް ނަގާނީ އެންމެ ހައެއްކަ މިނިޓެވެ.
އަވާޒީ މެޝިން ފަރުމާކޮށްފައިވާ ގޮތުން މެޝިންތެރެއަކަށް ޖޫހެއް ނޭޅޭނެއެވެ. އެހެންވީމާ މިކްސަރު ދޮންނަ ގޮތަށް ދޮންނާކަށް ނުޖެހޭނެއެވެ. ހުރިހާ ގޮތަކަށް ބަލާއިރުވެސް މި މެޝިނަކީ ބޭނުންކުރާ މީހުންނަށް ފައިދާހުރި އެއްޗެކެވެ. ވަގުތު ސަލާމަތްކުރެވެއެވެ. އަޑުމަޑުކަމަށްވެސްވެއެވެ. އަދި ސްމޫތީ ހަދަންވާއިރަށް ކާނާގެ ތާޒާކަން ކެނޑިދާނެތީ ކަންބޮޑުވާކަށް ވެސް ނުޖެހެއެވެ.
އަވާޒީ މެޝިން މިވަގުތު ވިއްކަން ހުރީ 299 އެމެރިކާ ޑޮލަރަށެވެ. ބެލެވޭ ގޮތުގައި ގަނޑުކުރި ސްމޫތީ ޕެކެޓް ވިއްކާނީ 4.99 ޑޮލަރަށެވެ. އެކި ގައުމުތަކުގައި މި ޕެކެޓްގެ އަގު ތަފާތުވުން އެކަށީގެންވެއެވެ.