03 އޯގަސްޓް 2018 - 22:35
މޯލްޑިވްސް އިންލަންޑް ރެވެނިއު އޮތޯރިޓީ (މީރާ)އިން އަމަލުކުރާ ގޮތުގެ ސަބަބުން ކުދި ވިޔަފާރިތައް ބަނގުރޫޓުވަމުން ދާ ކަމަށް ބުނެ ފާޑުކިޔާ ފަރާތްތަކަށް މީރާގެ ކޮމިޝަނާ ޖެނެރަލް ޔަޒީދު މުހައްމަދު މިރޭ ރައްދު ދެއްވައިފި އެވެ.
މީރާގެ އަށް ވަނަ އަހަރީ ދުވަހުގެ މުނާސަބަތުގައި ދަރުބާރުގޭގައި ބޭއްވި ޖަލްސާގައި ވާހަކަދައްކަވަމުން ޔަޒީދު ވިދާޅުވީ ބޭރުގެ އެކި ފަރާތްތަކުން އެ އޮތޯރިޓީއަށް ތައުރީފްކުރާއިރު، އަމިއްލަ މަސްލަހަތުތަކެއް ހިމާޔަތްކުރަން އުޅޭ މަދު ބަޔަކު މީރާގެ ތަސައްވުރު ހުތުރުކޮށް، ރާއްޖޭގެ ޓެކްސް ނިޒާމް ހަލާކުކޮށްލަން ހަގީގަތާ ހިލާފު ވާހަކަތައް ފަތުރާތީ ހިތާމަކުރައްވާ ކަމަށެވެ.
ފާޑުކިޔާ ފަރާތްތަކަށް އަމާޒުކޮށް ޔަޒީދު ވަނީ އެތައް ސުވާލެއް ކުރައްވައިފަ އެވެ.
- ޖީއެސްޓީގެ ސަބަބުން ކުދި ވިޔަފާރިތައް ބަނގުރޫޓުވަމުންދާ ކަމަށް ބުނަމުންދާއިރު، ޖީއެސްޓީއަކީ މުދަލާއި ހިދުމަތް ހޯދާ އާއްމު ރައްޔިތުން ދައްކާ އެއްޗެއްކަން އެ ބޭފުޅުންނަށް އެނގިވަޑައިނުގަންނަވަނީތޯ؟
- ޖީއެސްޓީއަށް ރަޖިސްޓްރީކުރުމަކީ އެންމެ ކުދި ވިޔަފާރިތަކުން ކުރަން ވެސް ނުޖެހޭ ކަމެއްކަން އެ ބޭފުޅުންނަށް ހަމަ އެނގިވަޑައިނުގަންނަވަނީތޯ؟
- ވިޔަފާރީގެ ފައިދާއިން ނަގާ ޓެކުހުގެ ސަބަބުން ހީނަރުވެގެންދާ ކަމަށް ބުނާއިރު، އެންމެ ކުދި ވިޔަފާރިތަކުން ބީޕީޓީ ދައްކަން ނުޖެހޭކަން އެ ބޭފުޅުންނަށް ނޭނގޭތޯ؟
- ގަވައިދުތައް ހަދަހަދައިގެން މީރާ އިން ކުދި ވިޔަފާރިތައް ޖޫރިމަނާކުރަމުންދާ ވާހަކަދައްކަމުން ދާއިރު، މިއީ ގާނޫނު ހަދާ މަޖިލީހުން ސީދާ ހައްދަވާފައިވާ ޓެކުހުގެ ގާނޫނުގައި ކަނޑައަޅާފައިވާ ޖޫރިމަނާތަކެއްކަން ހަމަ އެނގިވަޑައިނުގަންނަވަނީތޯ؟
ޔަޒީދު ވިދާޅުވީ މީރާގެ ހިސާބުތައް ދައްކާ ގޮތުން އަހަރެއްގެ މައްޗަށް ދިހަ މިލިއަން ރުފިޔާއަށް ވުރެ މަދުން އާމްދަނީ ލިބޭ ވިޔަފާރިތަކުގެ ތެރެއިން ބީޕީޓީ ދައްކަން ޖެހެނީ ވަރަށް މަދު ވިޔަފާރިއަކުން ކަމަށެވެ.
"އެހެންކަމުން މީރާއިން ބީޕީޓީ ގާނޫނު ތަންފީޒުކުރަމުންދާ ގޮތުގެ ސަބަބުން ކުދި ވިޔަފާރިތައް އިނދަޖެހެމުން ދާ ކަމަށް މި ބޭފުޅުން ފަތުރަމުންދާ ވާހަކައަކީ އެއްވެސް ހަގީގަތެއް އޮތް ވާހަކައެއް ނޫން،" ޔަޒީދު ވިދާޅުވި އެވެ.
"ޓެކްސް ދެއްކުމުގެ އިތުރުން ގާނޫނުގައި ކަނޑައަޅާފައިވާ ޒިންމާތައް އާދާކުރުމުގައި ދިމާވާ އިދާރީ ދަތިތައް ހައްލުކުރުމުގައި، މީރާއިން ކުދި ވިޔަފާރިތަކަށް ވަނީ ބޮޑެތި ލުއިތަކެއް ދީފައި."
އޭނާ ވިދާޅުވި ގޮތުގައި ޓެކްސް ބަޔާން ހުށަހެޅުމާއި ހިސާބުތައް ބެލެހެއްޓުމާއި އޮޑިޓްކުރުމުގައި ދީފައިވާ ލުއިތަކުގެ އިތުރުން، މިދިޔަ އަހަރު ކުދި ވިޔަފާރިތަކުގެ ތެރެއިން 3،000އެއްހާ ވިޔަފާރީގެ ޖޫރިމަނާއަށް ވެސް ލުއި ދިނެވެ.
"މީގެ ނަތީޖާއެއްގެ ގޮތުން މި ވިޔަފާރިތައް މިހާރު ވަނީ ޓެކުހުގެ ނިޒާމުތައް އަދާކުރާ ފަރާތްތަކަށް ބަދަލުވެފައި. މީރާއިން ކުރަމުންދާ މަސައްކަތަކީ ގައުމު ތަރައްގީކުރުމަށް ކިތަންމެ މުހިންމު މަސައްކަތެއް ކަމުގައި ވިޔަސް، މި މަސައްކަތަކީ ހުރިހާ އެންމެން ރުހޭ މަސައްކަތެއް ނޫން،" ޔަޒީދު ވިދާޅުވި އެވެ.