03 އޯގަސްޓް 2018 - 20:17
ބެއިޖިން (އޮގަސްޓް 3) - "އަޅުގަނޑަށް ވެސް ޚިޔާލު ފާޅުކުރުމުގެ މިނިވަންކަން ލިބިގެންވެ އެވެ." މިއީ ރިޓަޔާކޮށްފައިވާ ޗައިނާގެ ޔުނިވާސިޓީ ޕްރޮފެސަރަށް އިންޓަވިއުގައި ބުނެލެވުނު ފަހު ޖުމްލަ އެވެ.
ވޮއިސް އޮފް އެމެރިކާ (ވީއޯއޭ) އަށް އުމުރުން 84 އަހަރުގެ ސަން ވެންގުއާން އިންޓަވިއު ދެނިކޮށް ޗައިނާ ފުލުހުން ވަނީ އޭނާގެ ގޭގެ ދޮރު ހަލާކުކޮށްލައިގެން ވަދެ ހައްޔަރުކޮށްފަ އެވެ.
ޕްރޮފެސަރު ސަން މީގެ ކުރިން ވެސް ވަނީ ޗައިނާ ސަރުކާރަށް ފާޑުކިޔައިފަ އެވެ.
ޕްރޮފެސަރު ސަންގެ ގާތް މީހުން ބުނި ގޮތުގައި ޖިނާން ސިޓީގެ ފުލުހުން އޭނާ ހައްޔަރުކުރި ފަހުން ޚަބަރެއް ނުވެ އެވެ. އޭނާ ހައްޔަރު ކުރީ ޗައިނާ ސަރުކާރުގެ ބޭރުގެ އިންވެސްޓްމަންޓާ ގުޅޭ ގޮތުން އިންޓަވިއު ދެނިކޮށެވެ. އޭގެ ކުރިން އޭނާ ވަނީ ޗައިނާ އިން ބޭރުގެ ގައުމުތަކަށް ދޭ އެހީ އާއި ލޯނާއި އިންވެސްޓްމަންޓާ ގުޅޭ ގޮތުން ރައީސް ޝީ ޖިން ޕިން އަށް ސިޓީއެއް ފޮނުވައިފަ އެވެ. އަދި ރިޔާސީ ދައުރު އުވާލަން ނިންމުމުން ވެސް އޭނާ ވަނީ އެ ސިޓީގައި ފާޑުކިޔައިފަ އެވެ.
ވީއީއޭ އިން ޓްވިޓާގައި ޝެއާކޮށްފައިވާ ވީޑިއޯގައި ޕްރޮފެސަރު ސަންގެ ބައެއް ވާހަކަތަކުގެ އަޑު އިވެ އެވެ.
"އެ އައީ މިހާރު ވެސް އެ މީހުން. އެބަތިބި ހަތެއް ނޫނީ އަށް މީހުން،" އިންޓަވިއު ކުރަމުން ދިޔަ މީހާ ގާތު ޕްރޮފެސަރު ސަން ބުންޏެވެ. "ކީކޭ އަހަރެން ބުނީ؟ ގޯސް އެއްޗެއް ބުނެވުނުތަ؟"
"ޗައިނާގެ ބައެއް މީހުންނަކީ އަދިވެސް ފަގީރުން. އެހެންވެ މި ގައުމުގެ ފައިސާ އެފްރިކާ އާއި އެހެން ހިސާބުތަކަށް އުކަމުން ނުދޭ،" ޗައިނާގެ ފޮރިން އިންވެސްޓްމަންޓް ސިޔާސަތަށް ފާޑު ކިޔަމުން އޭނާ ބުންޏެވެ.
ދެން އިވިގެން ދިޔައީ ޕްރޮފެސަރު ސަންގެ އަޑު ގަދަވަމުން ދިޔަ އަޑެވެ.
"ކަލޭމެން ތިޔަ ކުރަނީ ކީއް؟ އަޅުގަނޑުގެ ގެއަށް ތިޔަ ވަނީ ވެސް ގަވާއިދާ ޚިލާފަށް. އަޅުގަނޑަށް ވެސް ޚިޔާލު ފާޅު ކުރުމުގެ މިނިވަންކަން ލިބިގެންވޭ،" ޕްރޮފެސަރު ސަން ފުލުސް މީހާއާ ދިމާލަށް އެހެން ބުނުމާ އެކު ލައިން ކަނޑައިގެން ދެ އެވެ.
ޝެންޑޮން ޔުނިވާސިޓީގެ ކުރީގެ ފިޒިކްސް ޕްރޮސަރު ސަން އަކީ ޗައިނާ ސަރުކާރަށް ފާޑުކިޔުމުގެ ސަބަބުން 1960 ގެ އަހަރުތަކުން ފެށިގެން އެކި ފަހަރު މަތިން ޖަލަށްލާފައިވާ މީހެކެވެ. އޭނާ އަށް ޕާސްޕޯޓް ހަދައިދޭން ދެކޮޅު ހެދުމުން ގައުމުން ބޭރަށް ދެވޭ ގޮތް ވެސް ނުވެފައިވާ ކަމަށް ނިއު ޔޯކް ޓައިމްސް އިން ބުނެފައިވެ އެވެ.