02 އޯގަސްޓް 2018 - 10:46
ދޯހާ (އޮގަސްޓް 2) - ގަތަރުގެ ހައްޖުވެރިން މި އަހަރު ހައްޖަށް ދިއުމުގައި އެ ގައުމުން ހުރަސްތައް ކުރިމަތިކުރަމުންދާ ކަމަށް ބުނާ ވާހަކަތައް ދޯހާ އިން ދޮގުކޮށްފި އެވެ.
ގަތަރުގެ ހައްޖު މިނިސްޓްރީން ވަނީ އިސްލާމް ދީނުގެ ފަސް ރުކުނުގެ ތެރޭގައި ހިމެނޭ މަތިވެރި އަޅުކަން ސިޔާސީ ކަންކަމުގައި ބޭނުން ނުކުރުމަށް އެދިފަ އެވެ. އަދި ގަތަރުން މި އަހަރު ހައްޖަށް ދާން ބޭނުންވާ މީހުންނަށް، ސައުދީ އަރަބިއާގެ ކަމާބެހޭ ފަރާތްތަކާ ގުޅިގެން އިންތިޒާމްތައް ހަމަޖައްސަމުންދާ ކަމަށް ވެސް ބުނެފައިވެ އެވެ.
މައްކާގެ ގަވަރުނަރު ވިދާޅުވެފައި ވަނީ ގަތަރުގެ ހައްޖުވެރިން ސައުދީ އަށް އަދި ގޮސްފައި ނުވާ ކަމަށެވެ.
"ގަތަރުގެ އެއްވެސް ހައްޖުވެރިއަކު އިއްޔެއާ ހަމައަށް މައްކާ އަށް އެތެރެވެފައެއް ނުވޭ،" ގަވަރުނަރު ޚާލިދު ބިން ފައިސަލް އަލް ސައުދު ވިދާޅުވި އެވެ.
ސައުދީ އަރަބިއާ، ޔުނައިޓެޑް އަރަބި އެމިރޭޓްސް، ބަހުރޭން އަދި މިސްރުން ގަތަރާ ސިޔާސީ ގުޅުން ކަނޑާލުމަށް ފަހު ވިޔަފާރީގެ ދަތިކުރުމުގެ ފިޔަވަޅުތައް އެޅީ މިދިޔަ އަހަރުގެ ޖޫން މަހު އެވެ. އަދި ސައުދީ، ޔޫއޭއީ، ބަހުރޭނުގައި ތިބި ގަތަރުގެ ރައްޔިތުން 14 ދުވަސްތެރޭ ނުކުތުމަށް އެންގި އެވެ.
އެ ހަތަރު ގައުމުން ތުހުމަތު ކުރަނީ ގަތަރުން ޓެރަރިޒަމަށް ވާގިވެރިވާ ކަމަށެވެ. އެކަމަކު އެ ހުރިހާ ތުހުމަތެއް ގަތަރުން ދޮގު ކުރެ އެވެ.