04 އޯގަސްޓް 2016 - 06:23
މީގެ ދެތިން ދުވަސް ކުރިން ޗައިނާގައި ހިނގި ކަމަށް ބުނާ ހާދިސާއެއްގެ ވީޑިއޯއެއް ސޯޝަލް މީޑިއާގައި އާންމުވެ އެތައް ބަޔަކު ބިރުގަންނަވާލައިފި އެވެ.
މި ވީޑިއޯ އިން ފެންނަނީ ޗައިނާގެ ހޮސްޕިޓަލެއްގައި ބަހައްޓާފައި ހުރި ސީސީޓީވީ ކެމެރާއަކަށް ރެކޯޑްވެފައިވާ މަންޒަރުތަކެއް ކަމަށް ބުނެ އެވެ. ފެންނަނީ ހޮސްޕިޓަލުގައި އޮތް މަރުވެފައިވާ މީހެއްގެ ހަށިގަނޑުގެ ތެރެއިން ދުން ކަހަލަ އެއްޗެއް ނުކުމެގެން ދާތަނެވެ. ވީޑިއޯގައި ބުނަނީ އެމީހާގެ ހަށިގަނޑުން ނުކުތީ އެމީހާގެ ރޫހު ނުވަތަ ފުރާނަ ކަމަށެވެ.
ރިޕޯޓްތައް ބުނާ ގޮތުގައި މިއީ 2014 ވަނަ އަހަރުގެ ކޮންމެވެސް ދުވަހެއްގެ ފަތިހު ހިނގި ކަމެކެވެ. މި މީހާ ބާއްވާފައި އޮތީ ކޮން ހޮސްޕިޓަލެއްގައި ކަމެއް ބުނެފައެއް ނުވެ އެވެ.
ވީޑިއޯ ބެލި އެއްބަޔަކު ބިރު ގަތް ނަމަވެސް ގިނަ ބަޔަކު ބުނަނީ މިއީ ފޭކް ވީޑިއޯއެއް ކަމަށެވެ. ރޫހަކީ ފެންނަ އެއްޗެއް ނޫން ކަމަށާއި އެހެންވެ ވީޑިއޯ އަކީ އަސްލެއް ނޫންކަން ޔަގީންވާ ކަމަށް ބުނެ ގިނަ ބަޔަކު އޮންލައިން ފޯރަމްތަކުގައި ހިޔާލު ފާޅުކޮށްފައިވެ އެވެ.
ވީޑިއޯއިން ފެންނަނީ މަރުވެފައިވާ މީހެއް ނަމަ އޭނާގެ ހަށގަނޑު ހާމަޔަށް ބާއްވާފައި އޮތީ ކީއްވެތޯ އާއި މަރުވެފައި އޮތް މީހަކު އެގޮތަށް ބާއްވާފައި އެހާ ދަން ގަޑިއަކު ކައިރީގައި އެއްވެސް މީހަކު ވެސް ނެތީ ކީއްވެތޯ ވެސް ބައެއް މީހުން ސުވާލުކޮށްފައިވެ އެވެ. އަނެއް ސުވާލަކަށް ވެފައި ވަނީ، އެއީ މަރުވެފައިވާ މީހެއް ނަމަ ހަށިގަނޑުން ފުރާނަ ނުވަތަ ރޫހު އެހާ ފަހުން ނިކުމެގެން ދަނީ ކީއްވެތޯ އެވެ.