24 ޖުލައި 2018 - 12:12
ސްރީ ލަންކާގެ ރޯޔަލް އިންސްޓިޓިއުޓްގެ ކަލާސް އެވޯޑުގައި އެންމެ މޮޅު އަންހެން ކުޅިވަރު ކުޅުންތެރިއާ އާއި އެންމެ މޮޅު ޓޭބަލް ޓެނިސް ކުޅުންތެރިއާގެ މަގާމް ރާއްޖޭގެ ފާތިމަތު ދީމާ އަލީ ހޯދައިފި އެވެ.
މިއީ އެނގިފައިވާ ގޮތުގައި ރާއްޖޭން ބޭރުގެ މިފަދަ އެވޯޑެއްގައި ދިވެހި ކުއްޖަކު މިހާތަނަށް ހޯދި އެންމެ ބޮޑު ކާމިޔާބެވެ. ލަންކާގެ ރޯޔަލް އިންސްޓިޓިއުޓް އޮފް އިންޓަނޭޝަނަލް ސްކޫލް އޮފް ހަޔާ އެޑިއުކޭޝަންގައި ކިޔަވާ ދީމާ ހޯދީ 2016/2017 ވަނަ އަހަރުގެ ބެސްޓް ސްޕޯޓްސް ވިމެން އޮފް ދަ އިޔާގެ އެވޯޑް އަދި އެންމެ މޮޅު ޓޭބަލް ޓެނިސް ކުޅުންތެރިއާގެ އެވޯޑެވެ. މި އެވޯޑުގައި ވާދަކުރީ އެ އިންސްޓިޓިއުޓުން ލަންކާގައި ހިންގާ ސްކޫލްތަކުގެ ދަރިވަރުންނެވެ.
ދީމާ އަކީ މުޅި ލަންކާގެ 10 އަހަރުން ދަށުގެ އެއް ވަނަ އަދި ވެސްޓަން ޕްރޮވިންސުގެ 10 އަހަރުން ދަށާއި 12 އަހަރުން ދަށުގެ އެއް ވަނަ ކުޅުންތެރިޔާ އެވެ. އޭނާ މިދިޔަ 12 އަހަރުން ދަށުގެ އެންމެ މޮޅު ހަތަރު ކުދިންގެ ތެރޭގައި ހިމެނުނީ އޭނާ އަށް ވުރެ ތިން އަހަރު ދޮށީ ކުދިންނާ ވާދަކޮށްގެންނެވެ. އެއާ އެކު ލަންކާގެ ރަށްވެހިކަން ހޯދައިދީ އޭނާ ލައްވާ ލަންކާގެ ގައުމީ ޓީމަށް ކުޅުވަން އެ ގައުމުން ބޭނުންވި އެވެ. އެކަމަކު ދީމާގެ އާއިލާ އިން ބޭނުންވީ ދިވެހި ގައުމީ ޓީމަށް ކުޅުވާށެވެ.
ދީމާ ވަނީ ގައުމީ މުބާރާތުގައި ފުރަތަމަ ފަހަރަށް މި އަހަރު ވާދަކޮށް 12 އަހަރުން ދަށުގެ ޗެމްޕިއަންކަން ހޯދައި 16 އަހަރުން ދަށުގެ ފައިނަލުގައި ކުޅެފަ އެވެ. ސްވިޑަންގައި މި އަހަރު ބޭއްވި ވޯލްޑް ޓީމް ޓޭބަލް ޓެނިސް ޗެމްޕިއަންޝިޕުގައި އޭނާ ވަނީ ރާއްޖެ ތަމްސީލްކޮށްފަ އެވެ. އުމުރުން 10 އަހަރުގެ ދީމާ އަކީ އެ މުބާރާތުގައި ވާދަކުރި އެންމެ ހަގު ކުޅުންތެރިއާ އެވެ.