24 ޖުލައި 2018 - 10:39
ކުރިއަށް އޮތް ރިޔާސީ އިންތިހާބުގައި ވޯޓުލާ މީހުންގެ ލިސްޓުގައި ފޮޓޯ ހިމަނަން ނުޖެހޭ ގޮތަށް ރިޔާސީ އިންތިހާބުގެ ގަވާއިދު އިސްލާހުކޮށް އިއްޔެ ގެޒެޓް ކޮށްފި އެވެ.
ރިޔާސީ އިންތިހާބާ ބެހޭ ގަވާއިދު އާދީއްތަ ދުވަހު ގެޒެޓް ކުރިއިރު އޭނާ އޮތީ އިންތިހާބީ މަރުކަޒުތަކުގައި ބަހައްޓާ ވޯޓުލާ މީހުންގެ ލިސްޓުގައި ފޮޓޯ ހިމަނަންޖެހޭނެ ކަމަށެވެ. ނަމަވެސް އިލެކްޝަންސް ކޮމިޝަނުގެ މެންބަރު އަހުމަދު އަކްރަމް ވިދާޅުވެފައި ވަނީ ގަވާއިދުގައި އެގޮތަށް އޮތީ ގެޒެޓް ކުރުމުގެ ކުށަކުން ކަމަށެވެ.
އިސްލާހުކޮށް ގެޒެޓްކުރި ގަވައިދުގައި މިހާރު އޮތީ ވޯޓުލާ މީހުންގެ ލިސްޓުގައި ހިމަނަންޖެހޭނީ ފުރިހަމަ ނަމާއި ޖިންސާއި އަތޮޅާއި ރަށާއި އެޑްރެހާއި އުފަން ތާރީހާއި ދިވެހި ރައްޔިތެއްކަން އަންގައިދޭ ކާޑުގެ ނަންބަރު ކަމަށެވެ.
މީގެ ކުރިން އިލެކްޝަންސް ކޮމިޝަނުން ބުނެފައި ވަނީ ވޯޓުލާ މީހުންގެ ލިސްޓުގައި ފޮޓޯ ނުޖެހުމަށް ނިންމީ ލިބިފައިވާ ޝަކުވާތައް ގިނަކަމުން ކަމަށެވެ.
"ފޮޓޯ ނުޖެހުމަށް ގިނަ ބަޔަކު އެދުނު. އޭގެ ތެރޭގައި މޫނު ބުރުގާ އެޅި ގިނަ މީހުން ހިމެނޭ. އެ ކަންކަމަށް ބެލުމަށް ފަހު ނިންމީ ވޯޓާސް ލިސްޓުގައި ފޮޓޯ ނުޖަހަން،" އަކްރަމް ކުރިން ވިދާޅުވެފައިވެ އެވެ.
ސެޕްޓެމްބަރު، 23ގައި، ބާއްވާ ރިޔާސީ އިންތިހާބުގައި 263،000 މީހުންނަށް ވޯޓުލުމުގެ ހައްގު ލިބިފައިވާއިރު 483 ވޯޓު ފޮށި ބަހައްޓާނެ އެވެ.