24 ޖުލައި 2018 - 09:39
ޓިއުރިން (ޖުލައި 24) – ޗެމްޕިއަންސް ލީގު ކާމިޔާބުކުރުމަށް ޔުވެންޓަސް އިން ކުރަމުން އަންނަ މަސައްކަތުގައި، އެ ޓީމާ އަލަށް ގުޅުނު ޕޯޗުގީސް ފޯވާޑް ކްރިސްޓިއާނޯ ރޮނާލްޑޯ ތަފާތު ދައްކާނެ ކަމަށް އެ ޓީމުގެ ކުރީގެ މިޑްފީލްޑަރު އަންދްރޭ ޕިރްލޯ ބުނެފި އެވެ.
ރޮނާލްޑޯ ވަނީ މިދިޔަ ފަސް ޗެމްޕިއަންސް ލީގުގެ ތެރެއިން ހަތަރު މުބާރާތް ރެއާލް މެޑްރިޑާ އެކު ކާމިޔާބުކޮށްފަ އެވެ. އަދި މެންޗެސްޓާ ޔުނައިޓެޑާ އެކު ވެސް އެ މުބާރާތް ކާމިޔާބުކުރި އެވެ.
އަނެއްކޮޅުން އެ މުބާރާތުގައި ޔުވެންޓަސްގެ ނަސީބު ވަރަށް ދެރަ އެވެ. ޖުމްލަ ދެ ފަހަރު ތަށި ހޯދި ނަމަވެސް ހަތް ފަހަރު ފައިނަލުން ބަލިވީ އެވެ. މިދިޔަ ތިން އަހަރު ތެރޭ ދެ ފަހަރު ފައިނަލުން ވަނީ ބަލިވެފަ އެވެ.
ޗެމްޕިއަންސް ލީގު ދެ ފަހަރު ކާމިޔާބުކޮށްފައިވާ ޕިރްލޯ ބުނީ ޔުވެންޓަސް އަށް މި ވަގުތު ބޭނުންވާ ބައެއް ކަންކަން ރޮނާލްޑޯއާ އެކު ޓީމަށް އަންނާނެ ކަމަށެވެ.
"ވަރުގަދަ ޗެމްޕިއަނަކު ޔުވެންޓަސްއާ ގުޅުމުން އަހަރެން އުފާވޭ. އެފަދަ ކުޅުންތެރިއަކު ގެނައުމުން ޗެމްޕިއަންސް ލީގާ ވަރަށް ގާތަށް އެދެވެނީ. ރޮނާލްޑޯ އަށް އެހީތެރިވެވިދާނެ ޔުވެންޓަސް އަށް ޗެމްޕިއަންސް ލީީގު ކާމިޔާބުކުރަން،" ޕިރްލޯ ބުންޏެވެ. "އޭނާ އަކީ މަތީ ފަންތީގެ ކުޅުންތެރިއެއް. އޭނާ ތަފާތު ގެންނާނެ. އަހަރެމެންނަށް ރީތި މަންޒަރުތަކެއް ފެންނާނެ."
އޭސީ މިލާނުގައި ކާމިޔާބު ދުވަސްތަކެއް ހޭދަކުރުމަށް ޕިރްލޯ ވަނީ ޔުވެންޓަސްއާ ގުޅި ގިނަ ކާމިޔާބީތަކެއް ހޯދައިފަ އެވެ. އޭނާ އަށް ވެސް ހޯދައިނުދެވުނު ތަށްޓަކީ ޗެމްޕިއަންސް ލީގެވެ.