22 ޖުލައި 2018 - 06:49
ޗައިނާއިން އެމެރިކާ އަށް އެތެރެކުރާ މުދަލުން ޓެކްސް ނެގުމަށް، ވައިޓް ހައުސް އިން ގެންގުޅޭ ސިޔާސަތުގެ ސަބަބުން، އެޕަލް، ފިޓްިބިޓް އަދި ސޮނޮސް ފަދަ އުފެއްދުންތަކުގެ އަގު ބޮޑުވެދާނެ އެވެ. ވިޔަފާރި ދިރާސާކުރާ މީހުން ދެކޭ ގޮތުގައި، ޓެކުހުން ރެކުމަށް ޓެކްނޮލޮޖީ ކުންފުނިތަކުން ކުރިން ބޭނުންކުރި އުކުޅުތަކުން ދެން ހިމާޔަތެއް ނުލިބޭނެ އެވެ.
އެމެރިކާ އަށް ޗައިނާއިން އެތެރެކުރާ މުދަލުން ޓެކްސް ނެގުމުގައި، ވައިޓް ހައުސް އިން އެކި ފަހަރު ދައްކަނީ އެކި ވާހަކަ އެވެ. ބައެއް މުދަލުން ޓެކްސް ނަގައި، ބައެއް މުދަލުން ޓެކްސް ނުނެގުމަކީ ވެސް ސިޔާސަތެކެވެ. ޗައިނާ އިން އެމެރިކާ އަށް އެތެރެކުރާ ހުރިހާ މުދަލަކުން ޓެކްސް ނަގާނެ ކަމަށް މިހާރު އެބަ ބުނެ އެވެ.
ޓެކްނޮލޮޖީ މަސްރަހުގައި ވާހަކަތައް ހުރި ގޮތަށް ބަލާއިރު، ހުރިހާ މުދަލަކުން ޓެކްސް ނަގަން ނިންމައިފި ނަމަ، އައިފޯން އަދި އައިޕެޑް ފަދަ އެޕަލްގެ އުފެއްދުންތަކުގެ އަގު 10 ޕަސެންޓް ބޮޑުވާނެ އެވެ. އެ ފަދައިން ފިޓްބިޓް އަދި ސޮނޮސްގެ އުފެއްދުންތަކުގެ އަގު ވެސް މައްޗަށް ޖެހޭނެ އެވެ.
އެމެރިކާ ސަރުކާރުން ނަގާ ޓެކްސް ކުރިން ނިސްބަތްކުރެވިފައި އޮތީ ވަކި އައިޓަމްތަކަކަށް ދެވިފައި އޮންނަ ކޯޑް ނަންބަރަށް ބަލައިގެންނެވެ. އެހެންކަމުން، އައިފޯން ފަދަ އުފެއްދުންތަކުން ޓެކްސް ނުނެގުމަށް، އެ ފަދަ އައިޓަމްތަކަށް ކަނޑައަޅާފައި އޮންނަ ކޯޑް ނަންބަރު ލިސްޓުން އުނިކުރަން މަސައްކަތްތަކެއް ވެސް ވަނީ ކުރެވިފަ އެވެ. އެހެން ނަމަވެސް، އިސްތިސްނާއެއް ނެތި ހުރިހާ އުފެއްދުމަކަށް ޓެކްސް ނަގާ ނަމަ، އެޕަލް، ފިޓްބިޓް އަދި ސޮނޮސް ފަދަ އުފެއްދުތަކުގެ އަގު މައްޗަށް ޖެހޭނެ ކަމަށް ދަނީ ބުނެވެމުންނެވެ. އެހެން ނަމަވެސް މި ނޫން ގޮތެއް ހަމަޖެއްސޭތޯ މަސައްކަތްކުރާނެ ކަމަށް، ޒިންމާ ނަގަންޖެހިފައި ތިބި ކުންފުނިތަކުން ބުނެ އެވެ.