12 ޖުލައި 2018 - 11:59
މެޑްރިޑް (ޖުލައި 12) - ތައިލެންޑުގެ ތަމް ލުއާން ހޮހަޅައިން ސަލާމަތުން ނެރުނު 12 ކުދިންނާއި ކޯޗު ސްޕެނިޝް ލަ ލީގާގެ މެޗެއް ބަލަން ދިއުމަށް ދައުވަތު ދީފި އެވެ.
"ހޮހަޅައިން ނެރުނު ކުދިންނާއި ކޯޗަށް ފަސޭހަ ވަގުތެއްގައި ސްޕޭން ލީގުގެ މެޗެއް ބަލާލަން އައުމަށް އަޅުގަނޑު އަމިއްލަ ގޮތުން ވެސް ދައުވަތު ދެން،" ލަ ލީގާގެ ރައީސް ހާވިއަ ޓެބާސް ވިދާޅުވި އެވެ. "އެ ކުދިން ސްޕޭނަށް ދިއުމުގެ ޚަރަދާ އެކު ފުޓުބޯޅައިން ލިބޭ އުފާ އެ ކުދިންނާ އެކު ހިއްސާ ކުރަން ބޭނުންވޭ."
ތައިލެންޑުގެ ވައިލްޑް ބޯ ފުޓުބޯޅަ ޓީމުގެ ކުޅުންތެރިން ހޮހަޅައިގައި ތާށިވީ މިދިޔަ މަހު 23 ވަނަ ދުވަހު އެވެ. އުނދަގޫ އަދި ނުރައްކާ އޮޕަރޭޝަނަކަށް ފަހު ހުރިހާ ކުދިން ސަލާމަތްކޮށް ނިމުނީ އަންގާރަ ދުވަހު އެވެ. މި މަހު 2 ވަނަ ދުވަހު އިނގިރޭސި ޑައިވަރުން އެ ކުދިން ހޯދި އިރު އެއް ކުއްޖަކު ހުރީ ރެއާލް މެޑްރިޑުގެ ޖޯޒީއެއްގަ އެވެ.
ލަ ލީގާ އިން ބުނީ ލީގުގެ ހުރިހާ ޓީމުތަކުން ވެސް އެ ކުދިންނަށް ދައުވަތު ދޭން އެދިފައިވާ ކަމަށެވެ. ދައުވަތަށް އިޖާބަ ދިނުމުގެ ގޮތުން ބާސެލޯނާ އިން ވަނީ ކޭމްޕް ނޯގައި ކުޅޭ މެޗެއް ބަލާލަން އެ ކުދިންނަށް ދައުވަތު ދީފަ އެވެ. ބާސެލޯނާގެ އެކަޑަމީގައި ބާއްވާ އިވެންޓަކަށް ވެސް އެ ކުދިންނަށް ވަނީ ދައުވަތު ދީފަ އެވެ.
އާދިއްތަ ދުވަހު ކުޅޭ ވޯލްޑް ކަޕް ފުޓުބޯޅަ މުބާރާތުގެ ފައިނަލް މެެޗު ބަލަން ދިއުމަށް ވެސް އެ ކުދިންނަށް ވަނީ ފީފާގެ ރައީސް ދައުވަތު ދެއްވައިފަ އެވެ. ނަމަވެސް ހޮސްޕިޓަލުން ދޫނުކުރާތީ އެ ކުދިންނަށް ފައިނަލް މެޗަަށް މޮސްކޯ އަށް ދެވޭ ގޮތެއް ނުވި އެވެ.
މެންޗެސްޓާ ޔުނައިޓެޑުން ވެސް ވަނީ އެ ކުދިން އޯލްޑް ޓްރެފޯޑަށް ޒިޔާރަތް ކުރަން ދައުވަތު ދީފަ އެވެ.