01 އޯގަސްޓް 2016 - 06:24
ތެއްލާފައި ހުންނަ ކާނާއަކީ ސިއްހަތަށް ގެއްލުން ލިބޭ އެއްޗެއްކަން އެންމެންނަށް ވެސް އެނގެ އެވެ. ނަމަވެސް ފަހުގެ ދިރާސާތަކަށް ބަލާލުމުން ތެއްލި އެއްޗެތި ކިތަންމެ ކާހިތް ވިޔަސް އެފަދަ އެއްޗިއްސެއް ނުކުރާނެ އެވެ. ޚާއްސަކޮށް އުނަގަނޑު ހިމަކޮށް ބަރުދަން ލުއިކުރަން ބޭނުންވާ ނަމަ އެވެ.
ހިކެން ބޭނުންވާ މީހުންގެ މަސައްކަތަށް އެންމެ ބޮޑަށް ހުރަސް އަޅަނީ ބަޓަރު، ޗީޒް އަދި ތެއްލާފައި ހުންނަ ކާނާ އިންނެވެ. މިފަދަ ކާނާ ކެއުމުން އެމީހެއްގެ ކެއުން ކޮންޓްރޯލްކުރުން ސިކުނޑިއަށް ބުރައަކަށް ވާކަމަށް ފަހުގެ ދިރާސާއަކުން ވަނީ ހާމަވެފަ އެވެ.
މި ދިރާސާއިން ދައްކާ ގޮތުން ތެޔޮ ގިނައިން ހުންނަ ކާނާ ކެއުމުން ހައިޕޮތަލަމަސް އަށް އަސަރު ކުރެ އެވެ. މިއީ ބަނޑުހައިކަން ރެގިއުލޭޓްކުރުމަށް އެހީވޭ ސިކުނޑީގެ ބަޔެކެވެ.
ސެޗުރޭޓެޑް ފެޓްސް ގިނައިން ހުންނަ ކާނާ ކެއުމުން ސިކުނޑީގައި އިންފްލެމޭޝަން ނުވަތަ ދުޅަ އުފެދޭ ގޮތް ވެއެވެ. އަދި ސިކުނޑި ރަނގަޅަށް މަސައްކަތްކުރުމަށް ހުރަހަކަށް ވެއެވެ. އެހެންކަމުން ކާ މިންވަރު ކޮންޓްރޯލްކުރުމަށް ސިކުނޑިއަށް ނުކުޅެދެ އެވެ.
އެހެންގޮތަކަށް ބުނާނަމަ ކެވޭ މިންވަރު ކޮންޓްރޯލްކުރަން މަސައްކަތް ކުރާ މީހުން، ކާން ފެށުމަށްފަހު ހުއްޓާލާނީ ކޮން ވަގުތެއްގައިތޯ އާއި ކާނީ ކޮން ވައްތަރެއްގެ ކާނާއެއްތޯ ނިންމަން އުނދަގޫވެ އެވެ. މިއީ ފަލަބަލީގެ މީހުންނަށް ވެސް ފެންނަ އަލާމަތްތަކެވެ.
މީގެ ކުރިން ވެސް ވަނީ ތެޔޮގިނަ ކާނާ ކެއުމުން ސަރުބީ ވިރުވައިދިނުމުގެ ނިޒާމަށް ނުރަނގަޅު އަސަރުތަކެއް ކުރާކަން ކުރިން ކޮށްފައިވާ ބައެއް ދިރާސާތަކުން ދެއްކި ނަމަވެސް ތެލުލި އެއްޗެތި ކެއުމުން ސީދާ ސިކުނޑިއަށް އޭގެ ނުރަނގަޅު އަސަރު ކުރާކަށް ހާމަވި މިއީ ފުރަތަމަ ފަހަރުކަމަށް ސައިންސްވެރިން ބުނެ އެވެ.
އޭގެ ބަދަލުގައި އަންސެޗުރޭޓެޑް ފެޓްސް ހިމެނޭ ކާނާގެ ތެރެއިން މަސް، އެވަކާޑޯ ނުވަތަ ޒައިތޫނި ތެޔޮ ފަދަ އެއްޗެތި ކެއުމުން ވަރަށް ބޮޑު ތަފާތެއް ފެނިގެން ދާކަމަށް ވެސް ރިސާޗަރުން ވަނީ ބުނެފަ އެވެ.
މި ދިރާސާއިން ދެއްކި ގޮތުގައި މި ދެންނެވި ފަދަ އަންސެޗުރޭޓެޑް ފެޓްސް ހުންނަ ކާނާ ކެއުމުން ސިކުނޑީގެ ފަންކްޝަން އާދައިގެ ގޮތަކަށް މަސައްކަތް ކުރެ އެވެ. އަދި ބޭނުންވާ ވަރަށް ވުރެ އިތުރަށް ކެވުނަ ނުދީ ހަށިގަނޑު ހަމަޖައްސާލަ އެވެ.
ދިރާސާގައި އިސްކޮށް މަސައްކަތްކުރެއްވި އެއް ބޭފުޅަކު ވިދާޅުވީ ފެޓީ ޑައެޓް ނުވަތަ ސަރުބީ ގިނަ ކާނާ ކެއުމުން ސިކުނޑިއަށް ކުރާ އަސަރު އެނގުމުން އެ ބޭފުޅުންވެސް ވަރަށް ބޮޑަށް ހައިރާންވި އެވެ.
ކެވެނީ ސަރުބީ ގިނަ ކާނާކަން އެނގި ހުރެ ކެއުމުން ވެސް ފަލަބަލީގެ ނުރައްކާ ކުޑަވެ އެތައް ބައިވަރު މެޓަބޮލިކް ބަލިތަކަކުން ސަލާމަތްވުމުގެ ފުރުސަތު ލިބޭ ކަމަށް ވެސް ސައިންސްވެރިން ވަނީ ބުނެފަ އެވެ.