10 ޖުލައި 2018 - 18:52
ސެއިން ޕީޓާސްބާގް (ޖުލައި 10) - ވޯލްޑް ކަޕް ފުޓްބޯޅަ މުބާރާތުގެ ސެމީ ފައިނަލުގައި މިރޭ ފްރާންސާ ދެކޮޅަށް ކުޅޭއިރު ބެލްޖިއަމުން އެ ޓީމަށް ދޭން ޖެހޭ އިހުތިރާމް ދޭނެ ކަމަށާއި އެކަމަކު ޖެހިލުމެއް ނުވާނެ ކަމަށް އެ ޓީމުގެ ތަރި ކެވިން ޑިބްރޭނާ ބުނެފި އެވެ.
ގިނަ ބަޔެއްގެ ނަޒަރުގައި މި ފަހަރުގެ ވޯލްޑް ކަޕްގެ ފޭވަރިޓެއްގެ ގޮތުގައި ބެލެވުނު ބްރެޒިލްގެ މައްޗަށް ކުއާޓާ ފައިނަލުގައި ބެލްޖިއަމުން ކުރި ހޯދީ 2-1 އިންނެވެ. އެ މެޗުން ލިބުނު ހިތްވަރާ އެކު ބެލްޖިއަމުން މިރޭ ސެމީ ފައިނަލުގައި ފްރާންސާ ދެކޮޅަށް ނުކުންނާނީ ފުރިހަމަ ޔަގީންކަމާ އެކު ކަމަށް ޑިބްރޭނާ ވަނީ ބުނެފަ އެވެ.
"ބްރެޒިލަކީ މި މުބާރާތުގެ ޗެމްޕިއަންކަން ފަސް ފަހަރު ހޯދި ޓީމެއް. އެކަމަކު އަހަރެމެން ޓީމެއްގެ ގޮތުގައި ކުޅެގެން ބްރެޒިލް ވެސް ބަލިކޮށްފިން. ދެން މި މުބާރާތަށް ބަލާނަމަ ފްރާންސް އަންނަނީ ވަރަށް މޮޅަށް ކުޅެމުން. އެކަމަކު އަހަރެމެންގެ ކުޅުންތެރިންގެ ހުނަރަށް ބަލާއިރު ފްރާންސް ދެކެ ޖެހިލުންވާން ޖެހޭ ކަމަށް ނުދެކެން. އެއީ ދެ ޓީމަށް ވެސް އޮތީ ހަމަހަމަ ފުރުސަތެއް،" ޑިބްރޭނާ ބުންޏެވެ.
ބެލްޖިއަމް ޓީމުގައި ހިމެނޭ ކުޅުންތެރިންނަކީ ކްލަބް ލެވެލްގައި އެންމެ ވާދަވެރި ޓީމުތަކަށް ކުޅޭ ކުޅުންތެރިންނެވެ. ބެލްޖިއަމްގެ ކެޕްޓަން އެޑެން ހަޒާޑް އިންގްލެންޑުގެ ޗެލްސީގެ ކުޅުންތެރިއެކެވެ. ޑިބްރޭނާ ކުޅެނީ ޗެލްސީގެ ވާދަވެރި ކްލަބް މެންޗެސްޓާ ސިޓީ އަށެވެ. އަދި އެހެން ކުޅުންތެރިންނަށް ބަލާއިރު ބެލްޖިއަމްގެ އެއް ވަނަ ފޯވާޑް ރޮމެލޫ ލުކާކޫ އަކީ މެންޗެސްޓާ ޔުނައިޓެޑްގެ ކުޅުންތެރިއެކެވެ.
ޑިބްރޭނާ ބުނީ ގައުމީ ޓީމަށް އައިސް ބެލްޖިއަމް ކޯޗު ރޮބާޓޯ މާޓިނޭޒް ފުރަތަމަ ކުރި ކަމަކީ ކުޅުންތެރިންނަށް ކްލަބްގެ ވާދަވެރިކަމާއި ގައުމީ ޓީމުގެ މުހިއްމުކަން ކިޔައިދިނުން ކަމަށެވެ.
"އަހަރެން ދެކޭ ގޮތުގައި ވަރަށް ގިނަ ގައުމީ ޓީމުތަކުގައި ދިމާވޭ ކްލަބްގެ ވާދަވެރިކަން. އެކަން އަހަރެމެންގެ ތެރޭގައި ނެތުމުގެ އެންމެ ބޮޑު ކްރެޑިޓެއް ދޭން ޖެހެނީ މާޓިނޭޒަށް. ޓީމާ ހަވާލުވުމަށް ފަހު މާޓިނޭޒް ދިޔައީ ކުޅުންތެރިންނަށް އެ ކަންތައްތަކާ ކުރިމަތިލާނެ ގޮތްތައް ކިޔައިދެމުން،" ޑިބްރޭނާ ބުންޏެވެ.
ބެލްޖިއަމްގެ ރަން ޖީލުން އަންނަނީ މި ފަހަރުގެ މުބާރާތުގައި ތަފާތު މޮޅު ކުޅުމެއް ދައްކަމުންނެވެ. ގްރޫޕް ސްޓޭޖުގެ ތިން މެޗުން މޮޅުވިއިރު، ދެ ވަނަ ބުރުގައި ޖަޕާން އަތުން މޮޅުވީ އެ ޓީމު ދެ ލަނޑު ޖަހާފައި އޮއްވައި ފަހަތުން އަރަ އެވެ.
ކުއާޓާގައި ބްރެޒިލްގެ މައްޗަށް ކުރިހޯދައި ގިނަ ބަޔަކަށް ހައިރާންކަން ގެނުވިއިރު، ސެމީގައި ފްރާންސާ ދެކޮޅަށް ނުކުންނައިރު ތާރީހު އޮތީ އެ ޓީމު ކޮޅަށް ބުރަވެފަ އެވެ. ބޮޑު މުބާރާތެއްގައި މިހާތަނަށް ބެލްޖިއަމާ ދެކޮޅަށް ކުޅުނު ތިން މެޗުން ވެސް ފްރާންސް ވަނީ މޮޅުވެފަ އެވެ. އެކަމަކު އަނެއް ކޮޅުން އޮތް ހިތްވަރަކީ އެންމެ ފަހުން މި ދެ ޓީމު ކުޅުނު ތިން މެޗުން ވެސް ބެލްޖިއަމް ބަލިވެފައި ނެތުމެވެ.
ފްރާންސާއި ބެލްޖިއަމް ކުޅޭ މެޗު ފަށާނީ މިރޭ ރާއްޖެ ގަޑިން 11 ޖަހާއިރު އެވެ.