10 ޖުލައި 2018 - 07:07
ހޮލީވުޑްގެ މަޝްހޫރު އެކްޓަރު ޒެކް އެފްރޯނަކީ ކުއްލިކުއްލިއަށް ސްޓައިލަށް ބޮޑެތި ބަދަލުތަކެއް ގެންނަ ތަރިއެކެވެ. އެގޮތުން ފާޑުފާޑަށް ބޮލުގެ އިސްތަށިގަނޑު ހެދުމާއި ތަފާތު ކުލަތައް ޖެއްސުމަކީ އޭނާ އެހާ ބިރު ގަންނަ ކަމެއް ނޫނެވެ.
މި ދުވަސްކޮޅު އޭނާ ހުރީ ޑްރެޑްލޮކްސް އިސްތަށިގަނޑަކާ އެކުގަ އެވެ. އެ ސްޓައިލް އިންސްޓަގްރާމްގައި ހިއްސާކުރަމުން އޭނާ ކެޕްޝަނަކަށް ބޭނުން ކުރީ "މަޖަލަކަށް ކޮށްލި ކަމެކޭ" އެވެ.
ގިނަ ބަޔަކަށް އޭނާގެ އާ ސްޓައިލް ކަމުނުދިޔައީ އެ ކެޕްޝަނާ ހެދި ކަމަށް ވެދާނެ އެވެ. އެއް ބަޔަކު ވަނީ އެކަމަށް ފާޑު ކިޔައިފަ އެވެ.
މަޖަލަކަށްކޮށްލި ކަމެކޭ ބުނެ، ޑްރެޑްލޮކް އިސްތަށިގަނޑެއް ދައްކައިލީ ސަގާފީ ގޮތުން ބަޔަކަށް ކޮށްލި މަލާމާތެއްގެ ގޮތުގައި ކަމަށް ގިނަ ބަޔަކު ސިފަކޮށްފައިވެ އެވެ. މި ވައްތަރު ހެއާ ސްޓައިލަކީ އާންމުކޮށް އެފްރިކާގެ ބައްރުގެ ކަޅު މީހުންގެ ފަރާތުން ފެންނަ ސްޓައިލެކެވެ.
އެހެންވެ ޒެކް، 30، އަށް ފާޑުކީ ބައެއް މީހުން ބުނީ އޭނާ މަޖަލަކަށް ހަދާފައި މި ފަހަރު ކަޅު މީހުންނަށް މަލާމާތްކޮށްލީ ކަމަށެވެ. ނަމަވެސް އޭނާ އަށް ތާއީދުކޮށް ވާހަކަ ދެއްކި ބައެއް މީހުން ވަނީ ޒެކްގެ އިސްތަށިގަނޑަކީ އަސްލެއްކަމާ ދޭތެރޭ ސުވާލު އުފައްދައިފަ އެވެ.
އެއީ ވިގެއް ނަމަ، މަޖަލަކަށް އެކަންކޮށްލުމަކުން ގޯހެއް ނެތް ކަމަށް ބުނެފައިވެ އެވެ.