05 ޖުލައި 2018 - 07:17
މިޒަމާނަކީ އަމިއްލަ ސަލާމަތާއި ރައްކާތެރިކަމަށް އަބަދުހެން ފާރަވެރިވެ ތިބެން ޖެހިފައިވާ ޒަމާނެކެވެ. ކޮންމެ ކޮންމެ ހާލަތަކީ ސަލާމަތަށް އެދި ފޯނު ކުރެވޭނެ ހާލަތެއް ނޫނެވެ. ނަމަވެސް ކުރިއަރާފައިވާ ޓެކްނޮލޮޖީގެ އެހީގައި، ފިތާލެވޭ ފިތަކުން ވެސް ސަލާމަތަށް އެދި ގޮވައިލެވެއެވެ. ރެލީ ސޭފްޓީ ބަޓްންއަކީ އިނގިލިކުރިން އެހީއަކަށް ގޮވާލެވޭ ކުޑަކުޑަ ފިތެކެވެ.
ދަބަހުގައި، ހެދުމުގައި ނުވަތަ ފޯނުގައި ވެސް ތަތްކޮށްލެވޭ މި ފިތަކީ އާއިލާ އާއި ރައްޓެހިން ނުވަތަ ރެލީ ބަޓްން ގެންގުޅޭ އަވަށްޓެރިން ނޫން ނަމަ ސީދާ ފުލުހުންނަށް ރިޕޯޓުކުރުވައިދޭ ވަސީލަތެކެވެ. އެހީއަށް އެދި ގޮވާނެ ބަޔަކު އިޚުތިޔާރުކުރުމުގެ ފުރުސަތު ލިއްބައިދެނީ ރެލީ އެޕުންނެވެ. އާއިލާ އާއި ރައްޓެހިންގެ ފޯނު ނަމްބަރުތައް ކަނޑައެޅިފައިވާ އަދަދަކަށް މި އެޕަށް އެޅެއެވެ. ރެލީ ފިތުން އެހީއަށް އެދި ގޮވަން އެންމެ ފަސޭހައީ ތިން ފަހަރު މި ފިތަށް ފިތާލައިގެންނެވެ. އޭރުން އިޚުތިޔާރުކޮށްފައިވާ ގުރޫޕަކަށް ވަގުތުން މެސެޖުދާނެއެވެ. މެސެޖުގައި އެމީހަކު ހުރި ހިސާބެއް އެނގެން އޮވެއެވެ.
ސަލާމަތަށް އެދި ގޮވުމުގެ އިތުރުން ރެލީ ބަޓްން ފަރުމާކޮށްފައިވަނީ ތިމާ އުޅޭނޫޅޭ އަންގައިދޭން ބޭނުން ނަމަ އެކަން ވެސް ކުރެވޭ ގޮތަށެވެ. މިކަމަށްޓަކައި ޖެހެނީ ވަގުތު ކަނޑައަޅައިގެން އެ ވަގުތެއް އެޕަށް އަޅާށެވެ. ވަގުތު ޖެހުމުން ތިމާ ހުރި ތަނެއް އާއިލާއަށް އަންގައިދޭނެއެވެ. ގެއަށް ނައިސް ގިނައިރު ވިޔަސް މަގުމަތީ ޓްރެފިކް ބޮޑުވެގެން ނާދެވި ލަސްވަނީކަން ނުވަތަ ނުރައްކާތެރި ހާލަތެއް ދިމާވެގެން އުޅެނީ ނަމަ އެކަން އާއިލާގެ ސަމާލުކަމަށް އަންނާނެއެވެ.
ރެލީ ފިތުގެ ސަބަބުން އެކަނި ބޭރަށް ނުކުތަސް ބޭރުގައި ކިތަންމެ ދަންވިޔަސް އެކަނިވެރިކަން ފިލުވައިދެއެވެ. އަދި ތިމާގެ ގާތް މީހުން އަޑުއިވޭ ހިސާބުގައި ތިބި ކަމުގެ ހިތްހަމަޖެހުން ލިއްބައިދެއެވެ.