04 ޖުލައި 2018 - 07:03
ސައިފް އަލީ ހާން ކުޅުނު ފިލްމްތަކުގެ ފްރެންޗައިޒްތަކުގެ ތެރެއިން "ރޭސް" ގެ ތިން ވަނަ ބައިގައި މަސައްކަތްކޮށްލަން ފުރުސަތު ނުލިބުނަސް، އޭނާގެ އެހެން ފްރެންޗައިޒެއްގެ ދެވަނަ ބައިގެ މަސައްކަތް ފަށަން ތައްޔާރުވެއްޖެ އެވެ.
އެ ފިލްމަކީ 2013 ގައި ރިލީޒް ކުރި ޒޮމްބީ/ކޮމެޑީ ފިލްމް "ގޯ ގޯއާ ގޯން" އެވެ.
މި ފިލްމަކީ ސައިފްގެ އަމިއްލަ ފިލްމް ކުންފުނި އިލުމިނަތީ އާއި އިރޯސް އިން ޕްރޮޑިއުސް ކުރި ފިލްމެކެވެ. އޭނާއާ އެކު ފިލްމްގެ ކާސްޓުންގެ ތެރޭގައި ދެން ހިމެނެނީ ޅިޔަނު ކުނާލް ކޭމޫ (ސޯހާ އަލީ ހާންގެ ފިރިމީހާ)، ވީރް ދާސް އަދި ޕޫޖާ ގުޕްތާ އެވެ.
"ގޯ ގޯއާ ގޯން" ގައި ސައިފް ބްލޮންޑް އިސްތަށިގަނޑަކާ އެކު ކުޅުނު ބޮރިސްގެ ކެރެކްޓާވެގެން ދިޔައީ ވަރަށް ގިނަ ބަޔަކަށް މަޖާވި ކެރެކްޓާއަކަށެވެ. އެހެންވެ އެ ކެރެކްޓާ ޖާދޫ އިތުރަށް ދައްކައިލަން ވެސް ބޭނުންވެ އެވެ.
ޑީއެންއޭ އަށް ސައިފް ބުނި ގޮތުގައި "ގޯ ގޯއާ ގޯން" ޑައިރެކްޓް ކުރި ރާޖް އެންޑް ޑީކޭ ދެވަނަ ބައިގެ ސްކްރިޕްޓާ އެކު އައި އިރު، އޭނާ އަށް އޭތި ވަރަށް ކަމުދާ އެއްޗަކަށްވި އެވެ.
"އެކަމަކު ފުރަތަމަ ބަޔާއި ދެވަނަ ބައިގެ ޕްލޮޓްގައި ހުންނާނެ ބޮޑު ތަފާތެއް،" ސައިފް ބުންޏެވެ. "އަދި މި ފަހަރު ބޮރިސްގެ ކެރެކްޓާ ވެސް މާ ޝައުގުވެރި ވާނެ. ސްކްރިޕްޓް ޕޮލިޝް ކުރުމުގެ މަސައްކަތް ކުރިއަށް އެބަދޭ މިހާރު ވެސް."
"ގޯ ގޯއާ ގޯން 2" ގެ ޝޫޓިން ފަށާނީ އަންނަ އަހަރުގެ ޖެނުއަރީގަ އެވެ. އަދި އެ އަހަރުގެ މެދު ތެރޭގައި ފިލްމް ސިނަމާތަކަށް ގެންނާނެ އެވެ.
"އަހަންނަށް ވަރަށް ބޮޑު ޔަގީން ކަމެއް އެބަ އޮތް މި ފަހަރުގެ ފިލްމް ބެލުންތެރިންނަށް މާ ބޮޑަށް ވެސް ކަމުދާނެ ކަމަށް،" ސައިފް ބުންޏެވެ. "ދެވަނަ ބައި ހިޓަކަށްވެއްޖެ ނަމަ މި ފްރެންޗައިޒް އަހަރެމެން އިތުރަށް ވެސް ކުރިއަށް ގެންދާނަން."
ޖުމްލަ 190 ކްރޯޑް ރުޕީސް (2.8 މިލިއަން ޑޮލަރު) ހަރަދުކޮށްގެން ހެދި "ގޯ ގޯއާ ގޯން" އަށް ބޮކްސް އޮފީހުގައި 384.25 ކްރޯޑް ރުޕީސް (5.7 މިލިއަން ޑޮލަރު) ގެ އާމްދަނީއެއް ލިބުނެވެ.
މި ވަގުތު ރިލީޒް ވާނެ އެއްވެސް ފީޗާ ފިލްމެއް ނެތް، ސައިފް ދެން އެންމެ އަވަހަށް ފެނިގެން ދާނީ މި މަހުގެ 6 ގައި ނެޓްފްލިކްސް އިން ސްޓްރީމް ކުރަން ފަށާ ވެބް ސީރީޒް "ސެކްރެޑް ގޭމްސް" އިންނެވެ.
އޭނާ މި ފަހުން ކުޅުނު ހުރިހާ ފިލްމްތަކެއްހެންވީ ފްލޮޕެވެ. އޭގެ ތެރޭގައި މިދިޔަ ޖެނުއަރީ މަހު ރިލީޒް ކުރި "ކާލަކާންޑީ" އާއި މިދިޔަ އަހަރު ރިލީޒް ކުރި "ރަންގޫން" އާއި "ޝެފް" ވެސް ހިމެނެ އެވެ.