27 ޖޫން 2018 - 21:26
ސެޕްޓެމްބަރު 23 ގައި އޮންނަ ރިޔާސީ އިންތިހާބުގައި ވާދަކުރުމަށް ޝަރުތު ހަމަވާ ހުރިހާ ކެންޑިޑޭޓުންނަށް ވެސް އެ ފުރުސަތު ލިބޭނެ ކަމަށް ބުނެ، އޮސްޓްރޭލިއާއަށް ދިވެހި ސަރުކާރުން ރައްދު ދީފި އެވެ.
އޮސްޓްރޭލިއާއިން އިއްޔެ ނެރުނު ނޫސް ބަޔާނެއްގައި ބުނީ، އިދިކޮޅު ސިޔާސީ ފަރާތްތައް ހައްޔަރުކޮށް، ކެމްޕޭން ކުރުމަށް ފުރުސަތު ނުދޭ ކަމަށާއި އެހެންވެ އިންތިހާބު އިންސާފުވެރިވާނެ ކަމާ މެދު ސުވާލު އުފެދޭ ކަމަށެވެ. އަދި ޑިމޮކްރަސީއާ ހިލާފަށް އަމަލުކުރަމުންދާ ކަމަށް ބުނެ ސަރުކާރަށް ފާޑު ކިޔާފައިވެ އެވެ.
އޮސްޓްރޭލިއާގެ މި ވާހަކަތަކަށް ރައްދު ދީ ދިވެހި ސަރުކާރުން މިއަދު ނެރުނު ބަޔާނުގައި ބުނީ މިނިވަން އިންސާފުވެރި އިންތިހާބެއް ބޭއްވުމަށް، އިލެކްޝަންސް ކޮމިޝަނާއެކު ސަރުކާރުން މަސައްކަތް ކުރަމުން އަންނަ ކަމަށެވެ. އަދި ޝަރުތު ހަމަވާ ހުރިހާ ކެންޑިޑޭޓުންނަށް ވެސް ހަމަހަމަކަމާއެކު އިންތިހާބުގައި ވާދަކުރުމުގެ ފުރުސަތު ލިބޭނެކަން ސަރުކާރުން ޔަގީންކުރާނެ ކަމަށް ބުންޏެވެ.
އޮސްޓްރޭލިއާއިން ވަނީ ސުލްހަވެރި ސިޔާސީ ހަރަކާތްތަކަށް ފުރުސަތު ދިނުމަށް ސަރުކާރަށް ގޮވާލާފަ އެވެ.
ރައްދުގައި ސަރުކާރުން ބުނީ ގާނޫނާ ގަވައިދުތަކާ އެއްގޮތްވާ ގޮތުގެ މަތިން ހަރަކާތްތައް ހިންގުން މުހިއްމު ކަމަށާއި އެކަމަކު ސިޔާސީ ބައެއް ފަރާތްތަކުން، ގާނޫނުތަކާ ހިލާފަށް އަމަލުކުރާތީ ކަންބޮޑުވާ ކަމަށެވެ. އަދި މިއީ ޑިމޮކްރަސީގެ އުސޫލުތަކާ ހިލާފު އަމަލުތަކެއް ކަމަށް ވެސް ސަރުކާރުން ބުންޏެވެ.
"ގާނޫނު އަސާސީއާ އެއްގޮތްވާ ގޮތުގެ މަތިން ހުރިހާ ފަރާތްތަކުން ވެސް އަމަލު ކުރޭތޯ ސަރުކާރުން ޔަގީން ކުރާނެ އެވެ." އޮސްޓްރޭލިއާއިން އެކި ދާއިރާތަކުން ރާއްޖެއަށް ވެދީފައިވާ އެހީތަކަށް ޝުކުރު އަދާކުރަމުން ސަރުކާރުގެ ބަޔާނުގައި ބުނެފައިވެ އެވެ.
ރިޔާސީ އިންތިހާބަށް ކެމްޕޭން ކުރުމަށް ހަމަހަމަ ފުރުސަތު ލިބޭނެ ކަމަށް ސަރުކާރުން ބުނި ނަމަވެސް، އިދިކޮޅު އެންމެ ބޮޑު ޕާޓީ އެމްޑީޕީން އެ ވާހަކަ ދޮގުކުރެ އެވެ.
އެމްޑީޕީން މިއަދު ބުނީ އިންތިހާބަށް އެ ޕާޓީން ކެމްޕޭން ކުރާނެ އެއްވެސް ފުރުސަތެއް ނުލިބޭ ކަމަށާއި އެކަން ކުރުމަށް ލިބިފައި އޮތީ ހަމައެކަނި އެ ޕާޓީގެ ހަރުގޭގެ ހަތަރު ފާރުން އެތެރެ ކަމަށެވެ.
"އަޅުގަނޑުމެން މަގުމައްޗަށް ނިކުތަސް ޓްރެފިކަށް އުނދަގޫވޭ. ނޫނީ ކޮންމެވެސް ގާނޫނަކާ އެބަ ހިލާފުވޭ. ޖަލްސާއެއް ބޭއްވިޔަސް، އެހެން ކަމެއް ކުރިޔަސް ކުރަން މި ޖެހެނީ މި ހަރުގޭގެ ހަތަރު ފާރުން އެތެރޭގައި،" އެމްޑީޕީގެ ޑެޕިއުޓީ ޗެއާޕާސަން އަލީ ނިޔާޒު މިއަދު ވިދާޅުވި އެވެ.
އެމްޑީޕީން މިދިޔަ ހަފުތާގައި ބާއްވަން އުޅުނު ދުވުމަކަށް ވެސް ފުލުހުން ހުރަސްއަޅައި އެ ޕާޓީގެ އިސް ބޭފުޅުންތަކެއް ހައްޔަރުކުރި އެވެ. އަދި ޕޯސްޓަރު ހިއްޕަން އުޅުމުން، ފުލުހުން ވަނީ އެކަން ވެސް ހުއްޓުވައިފަ އެވެ.