29 ޖުލައި 2016 - 16:11
އިންޑިއާގެ އުއްތަރް ޕްރަދޭޝްގައި 15 ރުޕީސް (3.44 ދިވެހި ރުފިޔާ)ގެ ދަރަންޏަކާ ހެދި ދެމަފިރިއަކަށް ހަމަލާދީ މަރާލައިފި އެވެ.
ދަށް ފަންތީގެ މީހުންގެ ގޮތުގައި އިންޑިއާގައި ބަލާ ދާލީތު ކޮމިއުނިޓީ އަށް ނިސްބަތްވާ މި ދެމަފިރިންގެ ތެރެއިން ފިރިމީހާ މަރާލާފައި ވަނީ ބޯ ބުރިކޮށްލައިގެންނެވެ. އަންހެން މީހާ މަރާލާފައި ވަނީ ތަޅައި އަނިޔާކޮށްގެންނެވެ.
ފުލުހުން ބުނީ މި ދެމަފިރިން މަރާލާފައި ވަނީ، މަތީ ފަންތީގެ މީހުންގެ ގޮތުގައި ބަލައި ވިޔަފާރިވެރިޔަކު ކަމަށެވެ. މި އަނިޔާވެރި އަމަލު ހިންގާފައި ވަނީ އޭނާގެ ފިހާރައިން ދަރަންޏަށް ނަގާފައިވާ ބިސްކޯދުތަކަކަށް ދައްކަންޖެހޭ 15 ރުޕީސް ނުދީގެން ކަމަށް ފުލުހުން ބުންޏެވެ.
އަޝޯކް މިޝްރާ ނަމަކަށް ކިޔާ ވިޔަފާރިވެރިޔާ މިހާރު ވަނީ ހައްޔަރުކޮށްފަ އެވެ.
ފުލުހުންނާ ހަވާލާދީ ޕްރެސް ޓްރަސްޓް އޮފް އިންޑިއާ އިން ބުނެފައި ވަނީ ދެމަފިރިން މަރާލާފައި ވަނީ ބުރާސްފަތި ދުވަހުގެ ވަރަށް ހެނދުނުގެ ވަގުތެއްގައި މަސައްކަތަށް ދަނިކޮށް މައިންޕޫރީ އަވަށުގައި ކަމަށެވެ.
އެ ދެމަފިރިން 15 ރުޕީސް ދޭންޖެހިފައި ވަނީ މީގެ ދެތިން ދުވަސް ކުރިން އެ މީހުންގެ ދަރިންނަށް ދަރަންޏަށް ގަނެދިން ތިން ޕެކެޓް ބިސްކޯދުގެ ބަދަލުގަ އެވެ. ވިޔަފާރިވެރިޔާ މަގުމަތިން އެ ދެމަފިރިންނާ ދިމާކޮށް ފައިސާ އަށް އެދެން ފެށުމުން އެ ދެމަފިރިން ވަނީ އެ ދުވަހުގެ މަސައްކަތުން ފައިސާ ލިބުމުން 15 ރުޕީސް ދޭނެ ކަމަށް ވެސް ބުނެފަ އެވެ. އެކަމަކު ފައިސާ ލިބުން ލަސްވެއްޖެ ކަމަށް ބުނެ އެދެމަފިރިން މަރާލީ އެވެ.
މި އަނިޔާވެރި މަރާ ގުޅިގެން ދާލިތު ކޮމިއުނިޓީގެ މީހުން ދަނީ މުޒާހަރާ ކުރަމުންނެވެ. އެގޮތުން އެ މީހުން ދަނީ މަގުތައް ބަންދުކޮށް ދަތުރުފަތުރަށް ހުރަސް އަޅަމުންނެވެ.