26 ޖޫން 2018 - 07:16
އިންޑިއާގެ ޓީވީ ބަތަލާ މޯނީ ރޯއި ބަތަލާއެއްގެ ގޮތުގައި ބޮލީވުޑަށް ނުކުންނަ ފުރަތަމަ ފިލްމް "ގޯލްޑް" އާ އެކު އޭނާ އަށް ތައުރީފު ލިބެން ފަށައިފި އެވެ.
އޮގަސްޓް މަހުގެ 15 ގައި ރިލީޒް ކުރާ ފިލްމްގެ ޓްރެއިލާ ދައްކައިލުމާ އެކު، ގިނަ ބަޔަކު ބުނެފައި ވަނީ މޯނީގެ އެކްޓިން ވަރަށް ވެސް ފުރިހަމަ ކަމަށެވެ. އަދި ބޮޑު ސްކްރީނުން އަކްޝޭ ކުމާރާ އެކު، މޯނީ ދެކިލުމުގެ ޝައުގުވެރިކަން ވެސް ވަރަށް ބޮޑުވެއްޖެ ކަމަށް މީހުން ބުނެ އެވެ.
މި ފިލްމާ އެކު، މޯނީގެ ކެރިއަރަށް ބޮޑު ބަދަލެއް އަަންނާނެ އެވެ. "ނާގިން" ފަދަ ކާމިޔާބު އެތައް ސިލްސިލާއެއް ކުޅެފައިވާ 33 އަހަރުގެ ބަތަލާ އަށް މިހާރު ވެސް ވަނީ ބޮލީވުޑުން ގިނަ ފުރުސަތުތަކެއް ލިބެން ފަށައިފަ އެވެ. އެގޮތުން އަންނަ އަހަރު ރިލީޒް ކުރާ، ރަންބީރް ކަޕޫރާއި އާލިއާ ބަޓްގެ "ބުރައްމަސްތުރާ" ގެ މުހިއްމު ރޯލަކުން ވެސް މޯނީ ފެނިގެން ދާނެ އެވެ.
މީގެ އިތުރުން ޖޯން އަބްރަމް މިހާރު ޝޫޓް ކުރަމުން އަންނަ ރޯމިއޯ އަކްބަރު ވޯލްޓާ (ރޯ) ގެ ބަަތަލާގެ ރޯލް ވެސް މޯނީ އަށް ހުށަހަޅާފައިވާ ކަމަށް ރިޕޯޓްތައް ބުނެ އެވެ.
ހަމަ މިއާ އެކު ދާދި ފަހުން އިއުލާން ކުރި ރާޖްކުމާރް ރާއޯގެ "މޭޑް އިން ޗައިނާ" ގެ ބަތަލާގެ ރޯލް ވެސް މޯނީ އަށް ހުށަހަޅާފައިވާ ކަމަށް ބޮލީވުޑްގެ ހަބަރުތައް ގެނެސްދޭ ނޫސްތަކުން ބުނެފައިވެ އެވެ.
ރީމާ ކަތުގީ ޑައިރެކްޓްކޮށްފައިވާ "ގޯލްޑް" އަކީ 1947 ގައި އިންޑިއާ އަށް މިނިވަންކަން ލިބުމަށް ފަހު، ވާދަކުރާ 1948 ގެ އޮލިމްޕިކްގައި އިންޑިއާ އަށް ހޮކީން ރަން މެޑެލް ގެނެސްދޭ ހާދިސާ އަށް ބިނާކޮށް ހަދާފައިވާ ފިލްމެކެވެ.
މި ފިލްމްގައި މޯނީ ފެނިގެން ދާނީ ވަރަށް ވެސް އިންޑިއާވަންތަ ރޯލަކުންނެވެ.