24 ޖޫން 2018 - 14:38
ވިކްޓަރީގެ ޑިފެންޑަރު އަލީ ޝާމިސް (ތޮއްޕޭ) އާއި ކުރިން ފުރަތަމަ ޑިވިޝަނުގެ ގިނަ ކްލަބްތަކަށް ކުޅުނު އިބްރާހިމް އަބްދުﷲ (އިއްބެ) ގެނެސް މާޒިޔާ އިން އެ ޓީމުގެ ޑިފެންސް ވަރުގަދަކޮށްފި އެވެ.
މާޒިޔާ އިން ވަނީ މި ސީޒަނުގައި އެ ޓީމުގެ ފަހަތަށް ކުޅުނު މިލޯސް ކޮވަސެވިޗް ދޫކޮށްލައިފަ އެވެ.
އިއްބެ އަކީ މާޒިޔާ އަށް ކުރިން ކުޅުނު ޑިފެންޑަރެކެވެ. ގައުމީ ޓީމުގައި ވެސް ހިމެނުނު އިއްބެ ވަނީ ފަހުން ވިކްޓަރީ އާއި ވީބީ އައްޑޫ އެފްސީ އަށް ކުޅެ ގިނަ ކާމިޔާބީތަކެއް ހޯދައިފަ އެވެ. ފުރަތަމަ ޑިވިޝަނުގައި އެންމެ ފަހުން އިއްބެ ކުޅުނީ ވެލެންސިއާ އަށެވެ. އެ ޓީމުގައި ހުއްޓައި ލިބުނު އަނިޔާއެއްގެ ސަަބަބުން އޭނާ ކުޅުމާ ދުރަށްދާން ޖެހުނެވެ. އަނިޔާއިން ރަނގަޅުވެ ފަހަކަށް އައިސް އޭނާ ފެނުނީ ދެ ވަަނަ ޑިވިޝަނުންނެވެ.
މި ފަހަރުގެ ދެ ވަނަ ޑިވިޝަނުގެ ޗެމްޕިއަންކަން ހޯދައި އަންނަ އަހަރު ފުރަތަމަ ޑިވިޝަނަށް ދަ ގްރާންޑޭ އަމީގޯސް ނިއުޖެނެރޭޝަން ސްޕޯޓްސް ކްލަބް (ދަ ގޭންގް) ޕްރޮމޯޓް ކޮށްދިނުމުގައި އިއްބެގެ ދައުރު ބޮޑެވެ. އޭނާ ވަނީ އެ ޓީމުގެ ފަހަތުގައި މޮޅު ކުޅުމެއް ދައްކައިފަ އެވެ.
ތޮއްޕޭ އަކީ މިދިޔަ ސީޒަނުގައި ވިކްޓަރީއާ ގުޅުނު ކުޅުންތެރިއެކެވެ. ކަނާތު ބެކަށް ކުޅޭ ތޮއްޕޭ މި ދިޔަ ސީޒަނުގެ ފަހު ބައިގައި ފެނުނީ ކްލަބް ގްރީން ސްޓްރީޓްސް އިންނެވެ. އެއީ ވިކްޓަރީ އަށް ދިވެހި ޕްރިމިއާ ލީގުން ޖާގަ ނުލިބުމާ ގުޅިގެންނެވެ. މި ސީޒަނުގައި އަލުން ވިކްޓަރީއާ ގުޅި ފުރަތަމަ މެޗުތަކުގައި ކުޅުނު ނަމަވެސް ވިކްޓަރީގެ ކޯޗު ލާޒްލޯ ކިސް ފަހުން ތޮއްޕޭ އަށް ފުރުސަތެއް ނުދެ އެވެ.
މި ދެ ކުޅުންތެރިންގެ އިތުރުން މާޒިޔާ އިން ވަނީ ފާއިތުވި އަހަރުތަކުގައި އެ ޓީމުގެ ފަހަތުގައި މޮޅު ކުޅުމެއް ދެއްކި ގައުމީ ޓީމުގެ ޑިފެންޑަރު އަމްދާން އަލީ (އެންޑީ)ގެ ނަން ވެސް ލިސްޓުގައި ޖަހައިފަ އެވެ. އެންޑީ އަށް އަނިޔާވެފައިވަނީ މިދިޔަ އަހަރު އުރީދޫ ދިވެހި ޕްރިމިއާ ލީގުގެ ފަހު މެޗުގައި ނިއުއާ ދެކޮޅަށް ކުޅުނު މެޗުގަ އެވެ. މި ފަހަރުގެ ސީޒަނުގެ ކުރީކޮޅުގައި ލިސްޓުގައި އެންޑީގެ ނަން ހިމަނާފައިނުވަނީ އޭނާ އަނިޔާގައި ހުރުމުންނެވެ.
މާޒިޔާ އިން ވަނީ މި ފަހަރު އެ ޓީމަށް ގެނައި އިޓަލީގެ ގޯލްކީޕަރު މައުރޯ ބޮއެޗިއޯ ދޫކޮށްލައިފަ އެވެ. އެ ޓީމުގެ ގޯލު މިހާރު ބަލަހައްޓަމުން އަންނަނީ އުއްމީދީ ކީޕަރު ހުސެން ޝަރީފް އެވެ. ދެ ވަނަ ކީޕަރަކަށް ހުންނާނީ ލޯން އެއްބަސްވުމެއްގެ ދަށުން ދަ ގޭންގަށް ދެ ވަނަ ޑިވިޝަނުގައި ކުޅެ މުބާރާތުގެ މޮޅު ކީޕަރުގެ މަގާމު ހޯދި އިޔާން އަބްދުލް އަލީމް އެވެ.