20 ޖޫން 2018 - 11:33
ޕެރިސް (ޖޫން 20) - ފްރާންސްގެ ވެރިރަށް ޕެރިހުގެ ރޭލެއްގެ ތެރެއަށް ހޯމަ ދުވަހު ވިހޭ ކުއްޖާގެ އުމުރުން 25 އަހަރު ވަންދެން އެ ކުއްޖާ އަށް ހިލޭ ރޭލް ދަތުރުތައް ކުރެވޭ ގޮތަށް ޕެރިހުގެ ޕަބްލިކް ޓްރާންސްޕޯޓް ކުންފުނިން ހަމަޖައްސައިފި އެވެ.
ޕެރިހުގައި ޕަބްލިކް ޓްރާންސްޕޯޓުގެ ޚިދުމަތް ދޭ ސަރުކާރުގެ ކުންފުނި އާރްއޭޓީޕީން ފުރަތަމަ ޓްވީޓްކޮށްފައި ވަނީ ރޭލެއްގައި ޕަސިންޖަރަކު ބަލިވެއްޖެ ކަމަށް ބުނެ އެވެ. ނަމަވެސް ފަހުން ވަނީ ޕެރިހުގެ މެދުތެރޭގެ ކޮމިއުޓާ ލައިނެއްގައި ޕަސިންޖަރަކު ވިހައިފި ކަމަށާއި ދެ މައިންގެ ހާލު ރަނގަޅު ކަމަށް ބުނެ އެވެ. އަދި ކުޑަ ކުއްޖާ އަށް ހިލޭ ދަތުރުތައް ހަމަޖެއްސިކަން ވަނީ އިއުލާން ކޮށްފަ އެވެ.
ރޭލުގައި އަންހެން މީހާ ވިހެއުމުގައި ބައެއް ޕަސިންޖަރުންނާއި ރޭލްގެ އިމަޖެންސީ މަސައްކަތު މީހުންނާއި ރޭލްގެ ސްޓާފުންގެ އެހީތެރިކަން ދީފައިވެ އެވެ. ކުއްލިއަކަށް ދިމާވި މި ހާދިސާއާ ގުޅިގެން ބައެއް ރޭލްތަކުގެ ދަތުރުތައް ވަނީ ހުއްޓުވައިފަ އެވެ.