18 ޖޫން 2018 - 10:31
މޮސްކޯ (ޖޫން 18) – ވޯލްޑް ކަޕުގައި ހޮނިހިރު ދުވަހު އައިސްލެންޑާ 1-1 އިން އާޖެންޓީނާ އެއްވަރުވުމަކީ ލަދުވެތިކަމެއް ކަމަށާއި އެގޮތަށް ކުޅެގެން ކޯޗު ޖޯޖް ސަމްޕައޮލީ އަށް އެނބުރި ގައުމަށް ނާދެވޭ ކަމަށް އާޖެންޓީނާގެ ކުރީގެ ކެޕްޓަން އަދި ކޯޗު ޑިއެގޯ މަރަޑޯނާ ބުނެފި އެވެ.
އާބާދީގައި ތިން ލައްކައެއްހާ މީހުން ދިރިއުޅޭ ކުޑަކުޑަ އައިސްލެންޑުން ވޯލްޑް ކަޕުގެ ތާރީހުގައި ކުޅުނު ފުރަތަމަ މެޗުގައި ގަދަފަދަ އާޖެންޓީނާއާ އެއްވަރުކުރީ ވަރުގަދަ ޑިފެންސިވް ކުޅުމެއް ދައްކައިގެންނެވެ. އާޖެންޓީނާގެ ސާޖިއޯ އަގުއޭރޯ ލީޑު ނަގައިދީފައިވަނިކޮށް އައިސްލެންޑުން އެއްވަރުކުރިއިރު، ފަހުން އަލުން ކުރި ހޯދަން އާޖެންޓީނާ އަށް ލިބުނު ޕެނަލްޓީ ކެޕްޓަން ލިއޮނަލް މެސީ އަތުން ބޭކާރުވީ އެވެ.
"އަހަންނަށް އިހުސާސް ކުރެވޭ ޓީމުގެ ތެރޭގައި ރުޅިވެރިކަމެއް އުޅޭކަމުގެ،" އެ މެޗު ބަލަން ސްޓޭޑިއަމަށް ދިޔަ މަރަޑޯނާ ބުންޏެވެ. "މިއީ ލަދުވެތިކަމެއް، އައިސްލެންޑުގެ ހުރިހާ ކުޅުންތެރިންނަކީ 1.90 މީޓަރު އިސްކޮޅުގައި ހުރި ކުޅުންތެރިންތަކެއްކަން އެނގި މެޗަށް ތައްޔާރުނުވެ ދިއުން،" މަރަޑޯނާ ބުންޏެވެ.
އާޖެންޓީނާ އަށް 1986 ވަނަ އަހަރުގެ ވޯލްޑް ކަޕް ކާމިޔާބުކޮށްދީ އަދި 1990 ވަނަ އަހަރު ފައިނަލަށް ގެންގޮސްދިން މަރަޑޯނާ ބުނީ ކުޅުންތެރިންނަށް އޭނާ އިނގިލި ދިއްނުކުރާ ކަމަށެވެ.
"މަސައްކަތުގެ ރޭޓް ދަށްވުމުން އެކަމަށް އަހަރެން އިނގިލި ދިއްކޮށްފާނަން. އެކަމަކު އަހަންނަށް ނެތް ކުޅުންތެރިންގެ ބޮލުގައި އެޅުވޭކަށް، ކުޑަމިނުން މެސީގެ ވެސް. އޭނާގެ ކިބައިގައި ހުރި ހިތްވަރެއްވިއްޔާ ލި،" މަރަޑޯނާ ބުންޏެވެ.
އެ މެޗުގައި މެސީ އަތުން ޕެނަލްޓީ ބޭކާރުވުމުން ގިނަ ބަޔެއްގެ ފާޑުކިޔުން ވަނީ އަމާޒުވެފަ އެވެ. މަރަޑޯނާ ބުނީ އޭނާ އަތުން ފަސް ޕެނަލްޓީ ބޭކާރުވި ކަމަށާއި އެކަމަކު އޭނާ އަކީ "ޑިއެގޯ މަރަޑޯނާ" ކަމަށެވެ.
"އަހަރެން ގަބޫލެއް ނުކުރަން އާޖެންޓީނާ އަތުން ދެ ޕޮއިންޓް ގެއްލުނީ މެސީ ޕެނަލްޓީ ގެއްލުވާލުމުން ކަމަށް،" 2010 ވަނަ އަހަރުގެ ވޯލްޑް ކަޕުގައި އާޖެންޓީނާ ގޮވައިގެން ކުއާޓާ ފައިނަލަށް ދަތުރުކުރި ކޯޗު ބުންޏެވެ.