17 ޖޫން 2018 - 13:40
ރުވާންޑާ ގައުމީ ޓީމަށް ހަތަރު މެޗު ކުޅެފައިވާ ފޯވާޑެއް ކަމަށްވާ އަތުހިއޭ ކިޕްސަން ނިއު ރޭޑިއަންޓަށް ގެނެސްފި އެވެ.
އެ ޓީމުން އޭނާ ގެނައީ ސްޕެއިން ފޯވާޑް ގުއިލެމް މާޓީގެ ބަދަލުގަ އެވެ. މާޓީ ފޮނުވާލި އެކަށީގެންވާ ކުޅުމެއް ދެއްކޭ ގޮތް ނުވުމުންނެވެ.
މިހާރު ހުޅުވިފައިވާ މިޑް ސީޒަން ޓްރާންސްފާގެ ތެރޭގައި ކިޕްސަންގެ ނަން ނިއު އިން ޓީމު ލިސްޓަށް އިތުރުކުރާއިރު، އެސްޓީއޯ މާލޭ ލީގުގެ ފަހު މެޗުގައި މާޒިޔާއާ ދެކޮޅަށް އޭނާ އަށް ކުޅެވޭނެ އެވެ.
ޔޫގެންޑާ އަށް އުފަން ކިޕްސަން ވަނީ ރުވާންޑާ އާއި ޔޫގެންޑާގެ ފުރަތަމަ ޑިވިޝަނުގެ ކްލަބްތަކަށް ކުޅެފަ އެވެ. އޭޝިއާގެ ތަޖުރިބާއަށް ބަލާއިރު ކެމްބޯޑިއާގެ ފުރަތަމަ ޑިވިޝަނުގެ ދެ ޓީމަށް ކުޅުނެވެ. އެންމެ ފަހުން ކުޅުނީ މެލޭޝިއާ ޕްރިމިއާ ލީގުގެ ޔޫކޭއެމް އަށެވެ. ރުވާންޑާ ގައުމީ ޓީމަށް އުމުރުން 24 އަހަރުގެ ކިޕްސަން ކުޅުނީ 2010 ވަނަ އަހަރު އެފްރިކަން ކަޕް އޮފް ނޭޝަންސް ކޮލިފައިންގަ އެވެ.
ނިއުގައި ދެން ތިބި ބިދޭސީ ކުޅުންތެރިންނަކީ ސްޕެއިނުގެ ސެންޓްރަލް ޑިފެންޑަރު ޖޯޖް ގޮޓޯ އާއި ސްޕެއިން މިޑްފީލްޑަރު ކަންޑޭލާ އެވެ. އަފްގާނިސްތާން ޑިފެންޑަރު ހާރޫން އަމީރީ ވަނީ ޓީމާ މެދު ހިތްހަމަނުޖެހިގެން ފުރައިފަ އެވެ.