16 ޖޫން 2018 - 22:57
ސަރަންސްކް، ރަޝިއާ (ޖޫން 16) – ދެ ވަނަ ހާފުގައި ޔޫސުފް ޕޯލްސަން ކާމިޔާބުކުރި ހަމައެކަނި ލަނޑާ އެކު ފީފާ ވޯލްޑް ކަޕުގައި މިރޭ ޕެރޫ އަތުން 1-0 އިން ޑެންމާކް މޮޅުވެއްޖެ އެވެ.
މި މެޗުން ބަލިވި ނަމަވެސް، 1982 ވަނަ އަހަރުގެ ފަހުން ފުރަތަމަ ފަހަރަށް ވޯލްޑް ކަޕުގައި ވާދަކުރާ ޕެރޫ ވަނީ ވަރަށް ރަނގަޅު ފައިޓެއް ދީފަ އެވެ. ފުރަތަމަ ހާފު ޖުމްލަކޮށް ޑެންމާކް ކޮންޓްރޯލްކުރި އިރު ދެ ވަނަ ހާފުގައި ޕެރޫ އިން ނުރައްކާކުރި އެވެ.
މިރޭގެ މެޗުގައި ޑެންމާކުގެ ގޯލް ބެލެހެއްޓީ 1992 ވަނަ އަހަރުގެ ޔޫރޯގެ ޗެމްޕިއަންކަން އެ ޓީމުން ހޯދިއިރު ގޯލްކީޕަރަކަށް ހުރި ޕީޓާ ޝުމައިކަލްގެ ދަރިފުޅު ކެސްޕާ ޝުމައިކަލް އެވެ. ލެސްޓާ ސިޓީއާ އެކު މީގެ ދެ އަހަރު ކުރިން އިނގިރޭސި ޕްރިމިއާ ލީގު ކާމިޔާބުކުރި ކެސްޕާ ވަނީ ރަނގަޅު ސޭވްތަކެއްކޮށްފަ އެވެ.
މިރޭގެ މެޗުގެ ފުރަތަމަ ހާފު ނިމެން ދެ މިނެޓަށް ވެފައިވަނިކޮށް ޕެރޫ އަށް ޕެނަލްޓީއެއް ލިބުނު ނަމަވެސް އެ ޓީމުގެ ކްރިސްޓިއަން ކުއޭވާ ފޮނުވާލި ބޯޅަ ދިޔައީ ގޯލުގެ މާ މަތިންނެވެ. ކުއޭވާ އަށް އޭރިއާ ތެރެއިން ޑެންމާކުގެ ޕޯލްސަން ކުރި ފައުލަކަށް ގެމްބިއާ ރެފްރީ ޕެނަލްޓީ ދިނީ ވީޑިއޯ ރީޕްލޭ އިން ބަލައިގެންނެވެ. މިއީ ވޯލްޑް ކަޕުގެ ތާރީހުގައި ވީއޭއާރް ބޭނުންކުރި ދެ ވަނަ ފަހަރެވެ. ފުރަތަމަ ބޭނުންކުރީ މިއަދު މެންދުރުފަހު އޮސްޓްރޭލިއާ އަތުން 2-1 އިން ފްރާންސް މޮޅުވި މެޗުގަ އެވެ.
ދެ ވަނަ ހާފު ފަށައިގެން ޑެންމާކުން ލީޑު ނެގީ 58 ވަނަ މިނެޓުގަ އެވެ. ޕޯލްސަން މި ގޯލް ޖެހީ ޑެންމާކުގެ ހުނަރުވެރި މިޑްފީލްޑަރު ކްރިސްޓިއަން އެރިކްސަން ދިން ބޯޅައަކުންނެވެ.
ޑެންމާކުގެ ގޯލާ އެކު ޕެރޫ އިން ވަރަށް ބޮޑަށް ކުރިއަށް ޖެހި ހަމަލާތައް ވަރުގަދަކުރި އެވެ. އެ ޓީމުގެ އެޑިސަން ފްލޮރެސް 60 ވަނަ މިނެޓުގައި ފޮނުވާލި ނުރައްކާތެރި ބޯޅަ ކެސްޕާ ސަލާމަތްކުރި އެވެ. އަދި 70 ވަނަ މިނެޓުގައި ގޯލް ކުރިމަތިން ނުރައްކާތެރި ބޯޅައެއް ޑެންމާކުގެ ޕޯލްސަން ވެސް ސަލާމަތްކުރި އެވެ.
މަނާބޭހަށް ޕޮޒިޓިވް ސަސްޕެންޝަނުގައި ހުއްޓާ ސްވިޒަލެންޑުގެ ކޯޓަކުން ސަލާމަތްކުރި ޕެރޫގެ ކެޕްޓަން ޕައޮލޯ ގުއެރޭރޯ މެޗުގެ 62 ވަނަ މިނެޓުގައި ކުޅެން އެރި އެވެ. އޭނާ 78 ވަނަ މިނެޓުގައި ލަނޑެއް ނުޖެހީ ކިރިޔާ އެވެ. އޭރިއާ ތެރެއިން އޭނާ ފުންނާބުން ފޮނުވާލި ބޯޅަ ދިޔައީ ގޯލް ދަނޑި ކައިރިން ބޭރަށެވެ. އޭގެ ފަހުން ވެސް ޕެރޫ އިން ޑެންމާކަށް ބާރުބޮޑުކުރި އެވެ. އެކަމަކު ލަނޑެއް ޖެހޭ ގޮތެއް ނުވި އެވެ.