18 ޖޫން 2018 - 08:18
"މީ ޓޫ" އަކީ ހޮލީވުޑުން ދާދި ފަހުން ތިލަވި ޖިންސީ ފުރައްސާރައާ ދެކޮޅަށް ހިންގާ ހަރަކާތެކެވެ. ޖިންސީ ގޯނާއެއް ކުރިމަތިވެފައިވާ އެ ވާހަކަ ދައްކަން ހިތްވަރުދޭ މުހިންމު ހަރަކާތެކެވެ. އެފަދަ ކަމެއް ކުރިމަތިވެފައިވާ މީހެއް ނަމަ، އެ މީހަކަށް ގާނޫނީ ގޮތުން ވެސް މި ހަރަކާތުގައި އެހީވާނެ އެވެ.
އެކަމަކު މިއީ މީޓޫގެ ހަވާސާގެ ވާހަކައެކެވެ. އޮސްޓްރޭލިއާގެ ފެޝަން ލޭބަލެއް ކަމަށްވާ ކޯލޯ އިން ދާދި ފަހުން ވަނީ މީޓޫގެ ނަމުގައި ކަލެކްޝަނެއް ނެރެފަ އެވެ. މީގެ ތެރޭގައި 33 ފަރުމާއެއް ހިމެނޭނެ އެވެ. އޭގެ ތެރޭގައި ބްލައުޒާއި ސްކާޓާއި ޖަމްޕަރާއި ކޯޓް ފަދަ ތަކެތި ހިމެނެ އެވެ.
މި ކަލެކްޝަންތަކުގެ އަގުތައް އުޅެނީ 29-599 ޑޮލަރާ ދެމެދުގަ އެވެ.
މީޓޫ ކަލެކްޝަނަކީ "ހިތްވަރު ގަދަ މީހުންނާއި ޒަހަމްތަކަށް ފަރުވާ ހޯދާ އަންހެނުންނަށް" ހާއްސަ ކަލެކްޝަނަށް ވިޔަސް މިއަށް މިހާރު ވަނީ ވަރަށް ބޮޑަށް ފާޑު ކިޔުންތައް ވެސް އަމާޒުވެފަ އެވެ. އެންމެ ބޮޑު މައްސަލައަކަށްވީ ކަލެކްޝަންގެ ބައެއް ފަރުމާތަކަށް ކިޔާ ނަންތަކެވެ.
ނަންތަކުގެ ތެރޭގައި ޓޭކް މީ އޮފް ސްލިޕް ޑްރެސް، ސެކްސް އޮން ލެގްސް އިން ނައިޓް، ބައުންސް ވިތު މީ އަދި ސެކްސް އޮން ލެގްސް ހިމެނެ އެވެ.
ޓްވިޓާގައި މި ކަލެކްޝަންތަކަށް ފާޑު ކިޔާފައިވާ ބައެއް މީހުން ބުނެފައިވާ ގޮތުގައި މީޓޫއަކީ ޖިންސީ ފުރައްސާރައާ މޫވްމަންޓަކަށް ވިޔަސް މީޓޫ ކަލެކްޝަނުން ދެމީ މުޅިން ތަފާތު މާނައެއް ކަމަށެވެ. އެގޮތުން ފަރުމާތަކަށް ދީފައިވާ ނަންތަކުން އަންހެނުން ސިފަކުރަނީ "ޖިންސީ އެއްޗެއްގެ" ގޮތުގައި ކަމަށް ބުނެފައިވެ އެވެ.
"ކިޔާފައި އެހެރަ ނަންތަކަކުން އަހަރެން ގަބޫލެއް ނުކުރަން މިއީ އަންހެނުން ބާރުވެރިކޮށް، އަންހެނުންނަށް ހިމާޔަތް ލިބޭ ކަހަލަ ގޮތަކަށް ނެރެފައިވާ ކަލެކްޝަނަ ކަމަކަށް،" މީހަކު ސޯޝަލް މީޑިއާގައި ބުންޏެވެ.
އެެއް ބަޔަކު ބުނެފައި ވަނީ ތިއަށް "މީޓޫ" ކިޔުމުގެ ކިޔާނެ އެހެން ނަމެއް ހޯދުން މާ ރަނގަޅު ވާނެ ކަމަށެވެ.
އެކަމަކު މި ކަލެކްޝަންގެ ފަހަތުގައި ހުރި ކޯލޯގެ ބާނީ ކަރިޝްމާ ކަސާބިއާ ސިފަ ކުރަނީ މީޓޫ ކަލެކްޝަނަކީ އަންހެނުންގެ ބާރުވެރިކަން ރަމްޒުކޮށް ދޭނެ އުފެއްދުންތަކެއްގެ ގޮތުގަ އެވެ.