16 ޖޫން 2018 - 12:21
ކަޒާން، ރަޝިއާ (ޖޫން 16) - މި ފަހަރުގެ ވޯލްޑް ކަޕްގައި ވާދަކުރާ ފްރާންސް ކުޅުންތެރިން އަމަލުކުރަން ހަރުކަށި ގަވާއިދުތަކެއް އެ ޓީމުގެ ކޯޗު ޑިޑިއޭ ޑެޝޯމްޕްސްގެ ލަފާގެ މަތިން އެކުލަވާލައިފި އެވެ.
ފްރާންސްގެ މީޑިއާތަކުން ރިޕޯޓްކުރާ ގޮތުގައި 2016 ވަނަ އަހަރު އަމިއްލަ ގައުމުގައި ބޭއްވި ޔޫރޯ ފުޓްބޯޅަ މުބާރާތުގެ ނާކާމިޔާބީ އަށް ފަހު ޑެޝޯމްޕްސް ވަނީ މިފަހަރުގެ ވޯލްޑް ކަޕްގެ ދުވަސްވަރުގައި ކުޅުންތެރިންގެ އަހުލާގު ހިފަހައްޓަން ގިނަ ފިޔަވަޅުތަކެއް އަޅަން ނިންމައިފަ އެވެ.
ފްރާންސްގެ ނޫހެއް ކަމަށްވާ ލެކުއިޕޭ އިން ރިޕޯޓްކުރާ ގޮތުގައި ވޯލްޑް ކަޕް ފެށުމުގެ ކުރިން ފްރާންސް ސްކޮޑުގައި ހިމެނޭ ހުރިހާ ކުޅުންތެރިންގެ ކްލަބާ އެކު މައްސަލައެއް އޮތްނަމަ އެކަން ހައްލު ކުރަން ޖެހެ އެވެ. އަދި މުސްތަގުބަލާ މެދު ސުވާލުތަކެއް އުފެދިފައިވާނަމަ ވޯލްޑް ކަޕްގެ ފުރަތަމަ މެޗުގެ ކުރިން އެކަމަށް ހައްލެއް ހޯދަން ޖެހެ އެވެ.
އެ ގޮތުން ދާދި ފަހުން ފްރާންސްގެ ތަރި އެންޓޮއިން ގްރީޒްމަން ވަނީ ބާސެލޯނާ އަށް އޭނާ ބަދަލުވާނެ ކަމަށް ދެކެވޭ ޓްރާންސްފާ ވާހަކަތަކަށް ނިމުމެއް ގެނެސްފަ އެވެ. ކުޑަ ވީޑިއޯއެއްގެ ޒަރިއްޔާއިން ގްރީޒްމަން ވަނީ އޭނާ އެތުލެޓިކޯ މެޑްރިޑްގައި މަޑުކުރާނެކަން އިއުލާންކޮށްފަ އެވެ. އަދި މޮނާކޯގެ ތޯމަސް ލެމާ އާއި ޖިބްރީލް ސިޑީބޭ ވަނީ އެތުލެޓިކޯ އަށް ބަދަލުވާން އެއްބަސްވުމަކަށް އަތުވެފަ އެވެ. މުސްތަގުބަލާ ގުޅޭގޮތުން ވަކިގޮތެއް ނުނިމުނީ ލިވަޕޫލްގެ މެޑިކަލް އިން ފެއިލްވި ލިޔޯން ކެޕްޓަން ނަބީލް ފެކީރް އެވެ. ލިޔޯނުން ވަނީ އަންނަ ސީޒަނުގައި ފެކީރް ފެންނާނީ އެ ކްލަބުން ކަމަށް ބުނެފަ އެވެ.
ފްރާންސް ކުޅުންތެރިންނަށް ދެން މަނާ ކޮށްފައިވަނީ ޓީމުގެ ޗޭންޖިން ރޫމް ތެރޭގައި ސޯޝަލް މީޑިއާ ބޭނުން ކުރުމެވެ. އަދި އިންސްޓަގްރާމް އާއި ސްނެޕްޗެޓް ފަދަ ސޯޝަލް މީޑިއާ އައުޓްލެޓްތަކަށް ވީޑިއޯ ނުލާން ވަނީ އަންގައިފަ އެވެ. ފްރާންސްގެ ބައެއް ކުޅުންތެރިން ކަމަށްވާ ކިލިއަން އެމްބާޕޭ އާއި ބެންޖަމިން މެންޑީ އަދި ޕައުލް ޕޮގްބާ އަކީ ޗޭންޖިން ރޫމްގައި ހިނގާ ކަންތައްތައް ސޯޝަލް މީޑިއާގައި މީގެ ކުރިން ހިއްސާ ކޮށްފައިވާ ކުޅުންތެރިންނެވެ.
ރިޕޯޓްތައް ބުނާގޮތުން މި ފަދަ ކަންތައްތައް ކުރާ ކުޅުންތެރިންނަށް ޑެޝޯމްޕްސް ވަނީ ފިޔަވަޅު އަޅަން ނިންމައިފަ އެވެ. އޭގެ ތެރޭގައި މެޗު ސްކޮޑުގައި ބޭނުންނުކުރުމާއި މުބާރާތުގައި ކުޅުންތެރިންނަށް ދޭން ނިންމާފައިވާ ބޯނަހުން ބައެއް އުނިކުރުން ވެސް ހިމެނެ އެވެ.
މި ފަހަރުގެ ވޯލްޑް ކަޕްގައި ފްރާންސް ކުޅޭ ފުރަތަމަ މެޗުގައި މިއަދު 3 ޖަހާއިރު ނުކުންނާނީ އޮސްޓްރޭލިއާއާ ދެކޮޅަށެވެ.