16 ޖޫން 2018 - 12:20
މާލޭގައި އިންޑިއާ މީހަކަށް ހަމަލާދީ ރޭ ޒަހަމްކޮށްލައިފި އެވެ.
އައިޖީއެމްއެޗްގެ އޮފިޝަލަކު މިއަދު ވިދާޅުވީ އިންޑިއާ މީހަކަށް ތޫނު އެއްޗަކުން ހަމަލާ ދިނުމުގެ ސަބަބުން އެމީހާއަށް ފަރުވާ ދިނުމަށް ހޮސްޕިޓަލަށް ގެނައީ ރޭ 11 ޖަހަން އުޅެނިކޮށް ކަމަށެވެ.
އޭނާގެ ބުރަކައްޓަށާއި އަތަށް ތޫނު އެއްޗެއް ހަރާފައިވާ ކަމަށް ވެސް މީޑިއާ އޮފިޝަލް ވިދާޅުވި އެވެ.
"އަތުގެ ލޭ ހޮޅިއެއް ފަޅައިގެން ގޮސްފައި ވަނީ. އެމީހާ އަށް އަދިވެސް ފަރުވާ ދެމުން އަންނަނީ އައިޖީއެމްއެޗްގައި. އޭނާގެ ހާލު ހާލު ސްޓޭބަލް،" އޮފިޝަލް ވިދާޅުވި އެވެ.
ފުލުހުންގެ މީޑިއާ އޮފިޝަލަކު ވިދާޅުވީ، އިންޑިއާ މީހާ ޒަހަމްވީ، އިތުރު ބިދޭސީ މީހަކާ ދެމެދު ހިނގި ދެބަސްވުމަކަށް ފަހު ކަމަށެވެ. އޯކިޑް މަގުގައި ހިނގި މި މާރާމާރީ ހިންގި ކަމަށް ބެލެވޭ މީހާ ފިލާފައިވާތީ އެމީހާ ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ބުންޏެވެ.