15 ޖޫން 2018 - 08:12
މި މަހުގެ 29 ގައި ރިލީޒް ކުރާ ފިލްމް "ސަންޖޫ" ގެ މަންޒަރެއް އުނިކޮށްދޭން އެދި ސެންޓްރަލް ބޯޑް އޮފް ފިލްމް ސެޓިފިކޭޝަން (ސީބީއެފްސީ) އަށް ސަންގާޝް ކިޔާ ފައުންޑޭޝަނަކުން ސިޓީއެއް ފޮނުވައިފި އެވެ.
އެ ފައުންޑޭޝަންގެ ވެރިޔާ ޕްރިތުވީ މަސްކޭ، ސީބީއެފްސީގެ ޗެއާމަން ޕްރަސޫން ޖޯޝީ އަށް އެޑްރެސްކޮށް ފޮނުވި ސިޓީގައި ބުނީ "ސަންޖޫ" ގެ ޓްރެއިލާ އިން ދައްކާ މަންޒަރުތަކުގެ ތެރޭގައި ޖަލުގެ ފާހާނާ އިން ލީކްވެ، ޖަލު ގޮޅި އަށް ނަޖިސް ބޭރުވާ މަންޒަރު ދެއްކުމުން އިންޑިއާގެ ޖަލު އޮތޯރިޓީ އާއި ޖަލު ބަލަހައްޓާ މުވައްޒަފުންނާ ދޭތެރޭ ނަފުރަތު އުފެދޭނެ ކަމަށެވެ.
އެހެންވެ ފިލްމް ސެންސަރު ކުރުމުގެ މަރުހަލާގައި އެ މަންޒަރު އުނިކޮށް ދޭން އެދޭ ކަމަށާއި ސީބީއެފްސީން އެކަމަށް އިޖާބަ ނުދޭ ނަމަ، ފިލްމް ރިލީޒް ކުރުން ހުއްޓުވައި ދިނުމަށް ކޯޓަށް މައްސަލަ ހުށަހަޅާނެ ކަމުގެ އިންޒާރު ވެސް ސިޓީގައި ދީފައިވެ އެވެ.
މި ސިޓީގެ ކޮޕީ ވަނީ "ސަންޖޫ" ގެ ޕްރޮޑިއުސަރު ވިންދޫ ވިނޯދް ޗޯޕްޅާ އާއި ޑައިރެކްޓަރު ރާޖްކުމާރް ހިރާނީގެ އިތުރުން އެކްޓަރު ރަންބީރު ކަޕޫރަށް ވެސް ފޮނުވައިފަ އެވެ.
ސަންގާޝް ފައުންޑޭޝަންގެ ސިޓީގައި ބުނި ގޮތުގައި ޖަލުތަކުގެ ހާލަތު ގޯސްކޮށް ދެއްކުމަކީ ގަބޫލު ކުރެވޭނެ ކަމެއް ނޫނެވެ. އަދި ޖަލަކީ އިންސާނުންނަށް އަދަބު ދޭން ލާ ތަނަކަށްވާތީ އެފަދަ ތަންތަނަކީ އިންސާނުން ބައިތިއްބަން އެކަށީގެންވާ ތަންތަން ނޫން ކަހަލަ ގޮތަކަށް ދެއްކުމަކީ ޖަލު އޮތޯރިޓީ އޮތް އިތުބާރު ވެސް ގެއްލޭނެ ކަމެއް ކަމަށް ބުނެފައިވެ އެވެ.
ސަންގާޝް އިން ބުނި ގޮތުގައި "ސަންޖޫ" ޖަލު މަންޒަރުގައި ނަޖިސް ބޭރުވާ ތަން ދެއްކުމަކީ ދުނިޔޭގެ ކުރިމަތީގައި އިންޑިިއާގެ އަގު ވެސް ވެއްޓިގެން ހިނގައިދާނެ ކަމެއް ކަމަށެވެ. އެހެންވެ އެންމެ މަސްލަހަތު ހުރި ގޮތަކީ އެ މަންޒަރު ފިލްމުން އުނި ކުރުން ކަމަށް ބުނެފައިވެ އެވެ.
ސަންގާޝް ފައުންޑޭޝަންގެ ސިޓީއާ ގުޅިގެން ސީބީއެފްސީންނާއި "ސަންޖޫ" ގެ ޓީމުން އަދި އެއްވެސް ވާހަކައެއް ނުދައްކަ އެވެ.
މި ފިލްމަކީ ސަންޖޭ ދަތުގެ ހަޔާތުގެ މައްޗަށް ބިނާކޮށް ހަދާފައިވާ ފިލްމެކެވެ. އެހެންވެ އޭނާ ޖަލުގައި ހޭދަ ކުރި ބައެއް ދުވަސްތައް ވެސް ފިލްމްގައި ދައްކުވައި ދެ އެވެ. އޭގެ ތެރެއިން މުހިއްމު މަންޒަރުތަކެއް "ސަންޖޫ" ގެ ޓްރެއިލާގައި ހިމަނާފައިވެ އެވެ.
"ސަންޖޫ" ގެ މަންޒަރެއް މައްސަލައަކަށްވެފައިވާ އިރު، ބޮލީވުޑްގެ ފިލްމްތަކަށް މި ކަހަލަ ތަފާތު އެތައް ކަމެއް އަބަދު ވެސް ކުރިމަތިވުމަކީ އާންމު ކަމެކެވެ.