10 ޖޫން 2018 - 13:24
މޯލްޑިވްސް ނެޝަނަލް ޑިފެންސް ފޯސް (އެމްއެންޑީއެފް)ގެ ކޯސްޓު ގާޑުގައި މަސައްކަތް ކުރެއްވި މޭޖަ އަބްދުލް މުހްސިން މުހައްމަދު ސިފައިންގެ ވަޒީފާ އިން މިދިޔަ ހަފުތާގައި ވަކިކޮށްފި އެވެ.
ސިފައިންގެ ވަޒީފާގައި ދިގު މުއްދަތެއް ހޭދަކުރެއްވި މުހްސިން ވަކިކުރީ، އެނގިފައިވާ ގޮތުގައި، ސިފައިންގެ މައި މަރުކަޒުގައި ބަންދުކޮށްފައި ބެހެއްޓުމަށް ފަހު އެވެ. އޭނާ ވަޒީފާ އިން ވަކިކުރުމުގެ ކުރިން ކެޕްޓަން ރޭންކަށް މަގާމް ދަށް ވެސް ކުރި އެވެ.
މުހްސިން ވަކިކުރި ސީދާ ސަބަބެއް ސާފެއް ނުވެ އެވެ.
އެމްއެންޑީއެފްގެ އިންފޮމޭޝަން އޮފިސަރު އިބްރާހިމް އާޒިމް ވިދާޅުވީ ވަކިވަކި ސިފައިންނާ ގުޅޭ ގޮތުން އަޅާ އިދާރީ ފިޔަވަޅުތަކުގެ މައުލޫމާތު އެތަނުން މީޑިއާތަކާ ހިއްސާނުކުރާ ކަމަށެވެ.
މި ފަހުން، ސިފައިން ހިންގި ގިނަ އޮޕަރޭޝަންތަކުގައި އިސްކޮށް މުހްސިން ހަަރަކާތްތެރިވެވަޑައިގެންފައިވާ ކަމަށާއި އޭގެ ތެރޭގައި، ސިޔާސީ ލީޑަރުންތަކެއް މިނިވަންކުރަން ދައުލަތުގެ މުއައްސަސާތަކުގެ މައްޗަށް ލާޒިމްކޮށް، ފެބުރުއަރީ 1 ގައި ނެރުނު އަމުރާ ގުޅިގެން ކުއްލި ނުރައްކަލުގެ ހާލަތު ސަރުކާރުން އިއުލާންކޮށް، އެ ކޯޓުގެ އުއްތަމަ ފަނޑިޔާރު އަބްދުﷲ ސައީދާއި ފަނޑިޔާރު އަލީ ހަމީދު ހައްޔަރުކުރުމުގެ އޮޕަރޭޝަނުގައި ވެސް އިސް ދައުރެއް އޭނާ އަދާކުރެއްވި ކަމަށް އަޑުއަރާފައިވެ އެވެ.
ސިފައިންގެ ސްޕެޝަލް ޕްރޮޓެކްޝަން ގްރޫޕް (އެސްޕީޖީ) ގައި ބޮޑީގާޑުންގެ ގޮތުގައި މަސައްކަތް ކުރި ސިފައިންގެ ތިން މީހަކު މިދިޔަ މާޗް މަހު ހައްޔަރުކޮށް އެ މީހުން ވެސް ވަނީ ސިފައިންގެ ވަޒީފާ އިން ވަކިކޮށްފަ އެވެ.