07 ޖޫން 2018 - 15:19
އެސްޓީއޯގެ ހިއްސާދާރުންނަށް މިދިޔަ އަހަރުގެ ފައިދާ އަންނަ އާދީއްތަ ދުވަހު ދޫކުރަން ފަށާ ގޮތަށް ހަމަޖައްސައިފި އެވެ.
ރާއްޖޭގެ އެންމެ ބޮޑު ވިޔަފާރި ކުންފުނިން މިއަދު ބުނީ މިދިޔަ އަހަރުގެ ކުންފުނީގެ ފައިދާގެ ތެރެއިން ހިއްސާދާރުންނަށް ހިއްސާއަކަށް 55ރ. ބެހުމަށް މިދިޔަ މަހުގެ 30 ވަނަ ދުވަހު ބޭއްވި އަހަރީ އާއްމު ޖަލްސާގައި ފާސްކޮށްފައި ވާތީ، އާދީއްތަ ދުވަހުން ފެށިގެން އެ ފައިސާ އެސްޓީއޯގެ ހެޑް އޮފީހުން ދޫކުރާނެ ކަމަށެވެ. އަދި ހިއްސާގެ ފައިދާ ބޭންކް އެކައުންޓަށް ޖަމާކުރުމަށް މިހާރު ރެޖިސްޓްރީކޮށްފައިވާ ފަރާތްތަކުގެ އެކައުންޓަށް، އާދީއްތަ ދުވަހުގެ ނިޔަލަށް ފައިސާ ޖަމާކޮށްދޭނެ ކަމަށް ވެސް އެ ކުންފުނިން ބުންޏެވެ.
އެސްޓީއޯ އިން ބުނީ ހިއްސާގެ ފައިދާ ހޯދަން ދާއިރު އައިޑީކާޑުގެ ކޮޕީ ނުވަތަ ހިއްސާގެ ސެޓްފިކެޓް ގެންދަން ޖެހޭނެ ކަމަށެވެ. އަދި ބަދަލުގައި އެހެން ފަރާތެއް ފޮނުވާ ނަމަ، އެ ފަރާތުގެ ނަމާއި އެޑްރެސް އަދި އައިޑީ ކާޑުގެ ކޮޕީއަކާއެކު ހިއްސާދާރު ސޮއިކޮށްފައިވާ ސިޓީއެއް ހުށަހަޅަންވާނެ ކަމަށް ވެސް އެ ކުންފުނިން ބުންޏެވެ. އަދި ހިއްސާދާރުގެ އައިޑީ ކާޑު ނުވަތަ ހިއްސާގެ ސެޓްފިކެޓްގެ ކޮޕީއެއް ވެސް ހުށަހަޅަންވާނެ ކަމަށް ވެސް އެސްޓީއޯ އިން ބުންޏެވެ.
އެ ކުންފުނިން ވަނީ މިހާތަނަށް ކުންފުނިން ދޫކޮށްފައިވާ ހިއްސާގެ ފައިދާ ނުނަގާ ތިބި ފަރާތްތަކުން އެ ފައިސާ ނެގުމަށް އިލްތިމާސްކޮށްފަ އެވެ.
އެސްޓީއޯއަށް މިދިޔަ އަހަރުގެ ވިޔަފާރިން ސާފު ފައިދާގެ ގޮތުގައި 211 މިލިއަން ރުފިޔާ އެސްޓީއޯ އަށް ލިބިފައި ވެ އެވެ.