08 ޖޫން 2018 - 09:45
ބޮލީވުޑަށް ނުކުތް އިރު އެންމެ ބޮޑު ހުވަފެނަކަށްވީ ސަލްމާން ހާނާ އެކު މަސައްކަތްކުރުން ކަމަށް ބަތަލާ ޖެކްލިން ފެނާންޑޭޒް ބުނެފި އެވެ.
ސްރީ ލަންކާ އަށް އުފަން 32 އަހަރުގެ ބަތަލާ ބޮލީވުޑަށް ނުކުތީ ރިތޭޝް ދޭޝްމުކްއާ އެކު 2009 ގައި ކުޅުނު ފިލްމް "އަލައްދިން" އިންނެވެ. އޭގެ ފަހުން އޭނާ ކުޅުނު ކާމިޔާބު ފިލްމްތަކުގެ ތެރޭގައި މާޑާ 2 (2011) އަދި ރޭސް 2 (2013) ހިމެނެ އެވެ.
ނަމަވެސް ބޮލީވުޑްގައި ޑިމާންޑް ބޮޑު ބަތަލާއަކަށް ޖެކްލީވެގެން ގޮސް، އޭނާގެ ވިދުން ގަދަވީ 2014 ގައި ސަލްމާނާ އެކު ކުޅުނު "ކިކް" އަށް ފަހު އެވެ.
"އަހަންނަށް ސަލްމާނާ އެކު މަސައްކަތްކޮށްލަން ފުރުސަތު ލިބުނީ ކެރިއަރުގެ އަޑިގުޑަންގަނޑެއްގެ ތެރޭގައި އުޅެނިކޮށް،" ބޮލީވުޑް ހަންގާމާ އަށް ދިން އިންޓަވިއުއެއްގައި ޖެކްލިން ބުންޏެވެ. "ކިކް އިން ފުރުސަތު ލިބި ސަލްމާނާ އެކު މަސައްކަތްކޮށްލަން ލިބުމަކީ އަހަރެން ދެކުނު އެންމެ ބޮޑު ހުވަފެން."
ޖެކްލިން ބުނި ގޮތުގައި މިއަދު އޭނާ އަށް އާދެވިފައި ހުރި ހިސާބަށް އާދެވުނީ ސަލްމާންގެ އެހީ ވަރަށް ބޮޑަށް ލިބިގެންނެވެ. އެހެންވެ އެކަން ދުވަހަކު ވެސް ހަނދާން ނައްތައިނުލާނެ ކަމަށާއި ސަލްމާނަށް އަބަދު ވެސް ޝުކުރުވެރި ވާނެ ކަމަށް ބުންޏެވެ.
ސަލްމާނާއި ޖެކްލީން ޖޯޑަކީ "ކިކް" އިން ބެލުންތެރިންނަށް ވަރަށް ކަމުދިޔަ ޖޯޑެއް ވެސް މެ އެވެ. އެހެންވެ އެ ފިލްމް ރިލީޒް ކުރިތާ 4 އަހަރު ފަހުން ސަލްމާނާ އެކު މަސައްކަތްކޮށްލަން ލިބުމަކީ ބޮޑު ނަސީބެއް ކަމަށް ވެސް ޖެކްލިން ބުންޏެވެ.
މި މަހުގެ 15 ގައި ރިލީޒް ކުރާ "ރޭސް 3" އެންމެ މުހިއްމު ތަރިންނަކީ ސަލްމާނާއި ޖެކްލިން އެވެ.
ރިޕޯޓްތައް ބުނާ ގޮތުން "ކިކް 2" އިން ވެސް މި ޖޯޑު ފެނުމުގެ ފުރުސަތު ބޮޑެވެ.
ސަލްމާން ބުނި ގޮތުގައި ޖެކްލީން އާ އެކު އޭނާ ފުރަތަމަ ކުޅެން އޮތް ފިލްމަކީ 2009 ގައި ރިލީޒް ކުރި "ލަންޑަން ޑްރީސްމް" އެވެ. އެކަމަކު އެ ފަހަރު ޖެކްލީންގެ ބަދަލުގައި ފިލްމުން ފުރުސަތު ލިބުނީ އާސިންއަށެވެ.